كوكشەتاۋدا ءبىر وتباسى جەتىمدەر ۇيىنەن 10 بالا اسىراپ الدى
مۇرات قابىلبايەۆ تالاي جىل مەشىتتە يمام بولىپ قىزمەت اتقارعان. جاراتقانعا جالبارىنىپ ءجۇرىپ، 9 جىل دەگەندە ۇلدى بولادى. ودان كەيىن جۇبايى ەكەۋى اقكول قالاسىنان جەتى جەتىمدى باۋىرلارىنا باسادى. مۇنشاما كوپ بالانى بىردەن اسىراپ الۋعا ماڭدايىندا جەتى سانى بار بۇزاۋدىڭ تۋىلۋى سەبەپ بولىپتى. ال بيىل ولار تاعى ءۇش بالانى شاڭىراقتارىنا اكەلگەن. بالالاردى تاربيەلەۋدەن وزىنە ايرىقشا ءلاززات الا بىلگەن مۇرات قابىلبايەۆ يمامدىقتان قىزمەتىن باسقا ارناعا اۋىستىردى.
«ءبىر كۇنى بالالارمەن وتكىزگەن قىزىقتى ساتتەرىمدى الەۋمەتتىك پاراقشاما جاريالادىم. كۇن سايىن وقىرماندار كوبەيدى. مۇنىڭ قوعامعا ماڭىزىن ءتۇسىنىپ، ون شاقتى ادامنان قۇرالعان كەڭەس قۇردىق. بۇل كەڭەس بالا اسىراپ الۋ جونىندەگى كەز كەلگەن سۇراققا جاۋاپ بەرە الادى. بۇل تەك ينتەرنەتپەن عانا ەمەس، سونداي-اق، ءىس جۇزىندە دە قولعا الىناتىن بولادى. قازىر وسىمەن اينالىسىپ جاتىرمىن»، - دەيدى مۇرات قابىلبايەۆ.
11 بالانىڭ جەتەۋى - وقۋشى. كىلەڭ ۇزدىكتەر. ءارقايسىسىنىڭ ۇلتى وزگە بولعانىمەن ءتالىم- تاربيەسى قازاقشا دەيدى بالۋان شولاقتىڭ نەمەرەسى، بالالاردىڭ اجەسى ايبات قۇدايبەرگەن قىزى.
«بۇلاردىڭ ءبارى وزدەرىن قازاقپىز دەپ سەزىنەدى. اكەلەرىنىڭ تەگىن العىسى كەلەدى. قاشان 16 عا تولعانىن كۇتىپ ءجۇر اسىعىپ»، - دەيدى ايبات شولاقوۆا.
بالالاردىڭ ءبىرى تولەگەن وسى ۇيگە كەلگەلى شىنايى، ناعىز ءومىردىڭ نە ەكەنىن ءتۇسىندىم دەيدى. ال وكسانانىڭ ايتۋىنشا، اكەسى مەن اناسى وزدەرىنە كوپ جاقسىلىق جاساعان.
باسىندا تاربيەلەۋ قيىنداۋ بولعانىمەن، قازىر ءبىز ءبىر داستارحان اينالاسىندا تاتۋ-ءتاتتى كۇن كەشىپ جاتقان جانۇيامىز دەيدى وتاعاسى. جەتىمدەر ماسەلەسىمەن قوسا مۇرات قابىلبايەۆ جاعدايى جوق جەسىر جاندارعا قامقورلىق كورسەتەتىن قوعامدىق قوردىڭ جۇمىسىن جەتىلدىرۋگە دە ءوز ۇلەسىن قوسىپ ءجۇر.
