جاپونيادان كەلگەن ماماندار 10 بالانىڭ جۇرەگىنە اشىق وپەراتسيا جاساماق

ولار جاس نارەستەلەر كارديولوگياسىن دامىتۋدىڭ باعدارلاماسىن ويلاستىرۋدا.

«ول جاڭا تۋعان بالانىڭ جۇرەگىندەگى كىناراتتى، ەرتە باستان انىقتاپ، ءتيىستى ەم-دوم جاساۋعا سەپتىگىن تيگىزەدى»، - دەيدى دارىگەرلەر. تىڭ جوبا تاجىريبە الماسىپ، الەمدەگى ەڭ وزىق تەحنولوگيالاردى ەنگىزۋدى كوزدەيدى.

جالپى كارديولوگيالىق ورتالىق اشىلعان ءۇش جىل ىشىندە 200 دەن استام بالانىڭ جۇرەگىنە ءتۇرلى دەڭگەيدەگى وپەراتسيالار جاسالىپتى. جاپوندىق بالالار كارديوحيرۋرگى، پروفەسسور شينتارا ەڭ الدىمەن بەس جاسار ساياتتىڭ جۇرەگىنە اشىق وپەراتسيا جاسادى. شىعىس قازاقستان وبلىسىنان كەلگەن ءسابيدىڭ جۇرەگىندە تەسىك بارىن اتا- اناسى كەش بىلگەن. ءتورت ساعاتقا سوزىلعان وپەراتسيا ءساتتى اياقتالدى.

باقىتگۇل شوراياقوۆا، ەمدەلۋشىنىڭ اناسى:

- وپەراتسيا 4 ساعاتقا سوعىلدى، اۋىر بولدى. قازىر بالام جاقسى، كەشەدەن باستاپ ءجۇرىپ تاماعىن ءىشىپ ءجۇر. ءبارى جاقسى، دارىگەرلەرگە العىسىمدى بىلدىرەمىن.

كارديولوگيالىق ورتالىقتا جىل باسىنان بەرى سەكسەنگە جۋىق شەبەرلىك ساعاتتارى وتكەن. قىتاي، ماجارستان، ليتۆا جانە رەسەي دارىگەرلەرىمەن ارىپتەستىك ورناپتى. ايتسە دە، جاس كارديوحيرۋرگتار «الەمدەگى ەڭ وزىق تەحنولوگيامەن جۇمىس جاسايتىن جاپوندىق مامانداردان ۇيرەنەرىمىز كوپ» دەيدى.

تيمۋر رايىمحانوۆ، وبلىستىق كارديولوگيا ورتالىعى بالالار بولىمشەسىنىڭ مەڭگەرۋشىسى:

- بۇل مامانداردىڭ بالالار حيرۋرگياسى بويىنشا جيناعان تاجىريبەلەرى مول. ءبىز ولاردان ۇيرەنگەنىمىزدى ءىس جۇزىندە قولدانامىز. سوندىقتان ءاربىر ارەكەتىن قالت جىبەرمەۋگە تىرىسامىز. ءبىزدىڭ جۇمىسىمىزدا شەبەرلىك ساعاتتارىنىڭ تيگىزەتىن پايداسى كوپ.

جاپوندىق پروفەسسورلار سونداي- اق ناۋقاستاردى جەكە قابىلداۋدان وتكىزىپ جاتىر. ولاردى ۋدز قوندىرعىلارى ارقىلى تەكسەرىپ، دياگنوز قويۋدا. ءۇش كۇن ىشىندە 12 جاسقا دەيىنگى 50 بالانى قاراعان. تاعى 30 ناۋقاس كەزەكتە تۇر.

شينتارو نەموتو، وساكو ۋنيۆەرسيتەتىنىڭ پروفەسسورى (جاپونيا):

- مۇنداي وپەراتسيالاردى جاساۋ ءۇشىن ارنايى تەحنيكا، كاسىبي بىلىكتىلىگى جوعارى ۇجىم بولۋى شارت. ولار بۇكىل الەم بويىنشا ۇزدىك سانالاتىن زاماناۋي ەمدەۋ تاجىريبەسى مەن تاسىلدەرىن قولدانادى. بارلىق كۇردەلى ماسەلەلەر تەك وزىق تەحنولوگيانىڭ ارقاسىندا شەشىلەدى. جاڭادان اشىلسا دا، سىزدەردىڭ كارديوورتالىقتارىڭىز تالاپقا ساي جابدىقتالعان. شىعىس قازاقستانمەن پاۆلودار وبلىسىنا ورتاق كارديولوگيالىق ورتالىق ءبىر جىل ىشىندە 150 گە جۋىق بالاعا مەديتسينالىق كومەك كورسەتەدى. بۇگىنگى تاڭدا مىڭ بالانىڭ جەتەۋى جۇرەك اقاۋىمەن تۋىلادى ەكەن. ونىڭ تورتەۋىنە وپەراتسيا قاجەتتىگىن تاجىريبە كورسەتكەن. نارەستەلەردىڭ شەتىنەۋىنىڭ بىردەن- ءبىر سەبەبى -  جۇرەك اقاۋى. نەعۇرلىم ەرتە انىقتاۋ ماڭىزدى. كۇردەلى سالانى بىرلەسىپ دامىتۋعا جاپوندىق دارىگەرلەر دە نيەتتى. ولار قازاقستانمەن ارىپتەستىكتى جالعاستىراتىندارىن ايتادى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى