الماتى الەمنىڭ 10 ۇزدىك قالالارىنىڭ قاتارىنا قوسىلدى
كۇن قۇرعاتپاي قارىشتاپ دامىپ كەلە جاتقان الماتى الەمنىڭ 10 ۇزدىك قالالارىنىڭ قاتارىنا قوسىلدى.
ىسكەرلەر شوعىرلانعان ايماقتاردى باعامداپ كورگەن زەرتتەۋشىلەر وڭتۇستىك استانانىڭ قارجى ورتالىعى رەتىندە سوڭعى 5 جىل بويى 9- ساتىدان تۇسپەي تۇرعانىن العا تارتقان. تارازىعا تۇسكەن قالالاردىڭ باسىم بولىگى شىعىس ازيا مەن تاياۋ شىعىس، سونداي-اق افريكا ەلدەرىنەن ەكەن. ايتا كەتەيىك، الماتى ماسكەۋ مەن ۆارشاۆا قالالارىنىڭ دا الدىن وراپ اكەتكەن. ايتسە دە، رەيتينگكە نيۋ-يورك پەن لوندون جانە توكيو سىندى اۋقاتتى قالالار كىرمەگەن.
«الماتىنىڭ قارجى ورتالىعى رەتىندە ۇزدىكتەر قاتارىنان كورىنۋىنە وسىعان دەيىنگى داعدارىستا ەشقانداي قارجى قۇرىلىمدارى تاقىرعا وتىرماۋى سەبەپ. وعان قوسا، قازاقستان قور بيرجاسى دا قۇلدىراعان جوق. سونداي-اق بانكتىك ينفراقۇرىلىم دا دامۋ ۇستىندە. ال كورشىلەس رەسەي مەملەكەتىندە قازىر جاعداي كەرىسىنشە ورىن الۋدا. سالىنعان سانكسيالاردىڭ سالدارىنان بانكتىك سەكتور ەداۋىر تومەن»، - دەدى ەكونوميست ءۋاليحان تولەشوۆ.
الماتى دامۋىنىڭ ادىمدى بولۋى ءۇشىن كاسىپكەرلەرگە دەگەن قولداۋ دا قارقىندى. ماسەلەن، ماسكەۋدە كورپوراتيۆتى تابىس سالىعى 30 پايىزدى قۇراسا، بىزدە بۇل كورسەتكىش 20 پايىزعا جەتەدى. وعان قوسا، جەكە تابىس سالىعى كورشى ەلدە 15 پايىزدان اسسا، ەلىمىزدىڭ بيزنەس وكىلدەرى تاپقانىنىڭ 10 پايىزىن تولەۋگە مىندەتتى. تىلگە تيەك ەتەرلىگى، الماتى كاسىپكەرلەرى جەرگىلىكتى قازىنانىڭ 60 پايىزىن قۇراپ وتىر. ايتا كەتەيىك، الماتىنىڭ كەدەندىك وداق اياسىندا تاۋار اينالىمى بىلتىر 5 ميلليارد 245 ميلليون دوللاردى قۇراعان. ءونىمنىڭ باسىم بولىگى، ياعني 95 پايىزدان استامى رەسەي ەلىنەن اكەلىنەدى. ال قالعان ءونىم بەلارۋس ۇلەسىندە.
«2014 -جىلدىڭ قاڭتار-جەلتوقسان ايىنداعى كورسەتكىشتى ايتاتىن بولساق، كەدەندىك وداق اياسىنداعى مەملەكەتتەردىڭ ءوزارا ساۋدا-ساتتىق كولەمى 5 ميلليارد 245 ميلليون 318 ا ق ش دوللارىن قۇرادى. ال ەكسپورت بولسا، 602 ميلليوندى قۇرادى، يمپورت 4 ميلليارد 642 ميلليون 920 قۇرادى»، - دەدى الماتى ق. ستاتيستيكا دەپارتامەنتىنىڭ باس مامانى ەسبول رىسبايەۆ.
ايتا كەتەيىك، الەمنىڭ 160 تان استام ەلىمەن ساۋدا-ساتتىق جۇرگىزەتىن الماتىنىڭ تاۋار اينالىمى بىلتىر 16 ميلليارد ا ق ش دوللارىن قۇراعان. ونىڭ باسىم بولىگى يمپورتقا تيەسىلى. سىرتتان الىپ شاھارعا 12 ميلليارد دوللارعا تاۋار اكەلىنىپتى. قالعان 3 ميلليارد دوللار كولەمىندەگى وتاندىق ءونىم وزگە ەلگە جىبەرىلگەن، دەپ جازادى «الماتى» تەلەارناسى.
