اناردىڭ 10 ءتۇرلى پايداسى
انار جەمىسى شىرىنى قانداي دارۋمەنگە باي ەكەنى بارلىعىمىزعا دا تانىس. ويتكەنى بۇل جەمىس تۋرالى از جازىلىپ جۇرگەن جوق. بۇل پوستتا انار جەمىسىنىڭ ەرەكشە قاسيەتتەرىنە، پايدالى جاقتارىنا توقتالسام دەيمىن:
1. انار ادام ورگانيزمىن قۇنارلى زاتتارمەن قامتاماسىز ەتىپ وتىرادى. ونىڭ قۇرامىندا 15 ءتۇرلى امين قىشقىلى بار. سونىمەن قوسا، К, С, В9, В6 دارۋمەندەرى مەن مينەرالدارعا (كاليي، مىرىش، فوسفور) باي. انار - كالورياسى تومەن جەمىس. 100 گرام جەمىستە بار- جوعى 72 كيلوكالوريا بولادى. تومەندە كەلتىرىلگەن ينفوگرافيكادا 100 گرام انار جەمىسىنىڭ قۇرامىنداعى دارۋمەندەر مەن مينەرالداردىڭ مولشەرى سيپاتتالعان.
2. شىرىنىن (قۇرامىندا تانين بولۋىنا بايلانىستى) جانە جەمىسىنىڭ قابىعىن مەديسينا اسقازاننىڭ جۇمىسى بۇزىلعاندا، ال كەپكەن بۇتاقتارى مەن ءدىڭىنىڭ قابىعىن ىشەك قۇرتىنا قارسى ءدارى رەتىندە قولدانادى.
اسقازانى اۋىراتىندار، اسقازان ءسولىنىڭ قىشقىلى جوعارى، گاستريتپەن اۋىراتىندار، سونداي- اق ەنتەروكوليتتسەن اۋىرعاندا اناردىڭ اشى سۇرىپتارىن پايدالانۋعا بولمايدى!
3. قاننىڭ قۇرامىندا تەمىر از بولسا جانە ادام سۇيەكتەرى سىنعاندا تەز ءبىتىپ كەتۋ ءۇشىن اناردى جەۋ كەرەك.
4. انار شىرىنىنىڭ تاعى دا ءبىر ەرەكشە قاسيەتى - ول رادياتسيا اسەرىنە شالدىققاندارعا كومەكتەسەدى.
5. انار شىرىنى يممۋنيتەتتىڭ جاعدايىن جاقسارتادى، ناتيجەسىندە اعزا تۇماۋ سياقتى اۋرۋلارعا شالدىقپايدى. جوتەل كەزىندە ءتىپتى انار شىرىنىمەن تاماق شايۋعا كەڭەس بەرىلەدى.
6. انار قۇرامىندا كاليدىڭ مولشەرى وتە كوپ بولعاندىقتان، ول قان قىسىمىن تومەندەتۋ ءۇشىن وتە ءتيىمدى بولىپ تابىلادى.
7. اناردىڭ قۇرامىندا قابىنۋعا قارسى تۇراتىن زات بار جانە ول بۋىن اۋرۋلارىنا شالدىققان ادامداردىڭ شەمىرشەكتەرى ىدىراۋىنىڭ الدىن الۋدا ماڭىزدى ءرول اتقارادى. انار شىرىنى، سونداي- اق، ادامدى بۋىن قابىنۋىنا شالدىقتىراتىن فەرمەنتتەردىڭ ارتۋىنا كەدەرگى جاسايدى جانە شەمىرشەكتەردىڭ بۇزىلۋىنىڭ الدىن الادى. انار قۇرامىندا وتە كوپ مولشەردى ەستروگەن ەلەمەنتى بار. بۇل ەلەمەنت ايەل ادامداردىڭ سۇيەكتەرىنىڭ قاۋساپ كەتۋىنىڭ الدىن الادى.
8. انار اعاشى - جۇماق اعاشى. يبن ابباستىڭ جەتكىزۋىنشە: «ءبىزدىڭ پايعامبار (وعان اللانىڭ سالەمى مەن يگىلىگى بولسىن) انار داندەرىن بىرتىندەپ جەيتىن. ءبىز ودان: «نەگە ولاي جاسايسىز؟ » دەگەنىمىزدە: «جەر بەتىندە بويىندا ءبىر ءدانى ءجانناتتان بولماعان بىردە- ءبىر انار اعاشى جوق. مەن وسى داندەردىڭ ءبىرى ءجانناتىق دەپ ۇمىتتەنەمىن» ، - دەپ جاۋاپ بەردى» (تاباراني) . ال ءالي (اللا رازى بولسىن) اللا ەلشىسىنىڭ (وعان اللانىڭ سالەمى مەن يگىلىگى بولسىن) : «اناردىڭ قىزىل ەتىن جەڭىزدەر، سەبەبى ول اسقازاندى تازارتادى» (احماد يبن حانبال)، - دەپ ايتقانىن ەستىگەن.
9. انار كوسمەتيكا سالاسىندا اسا كەڭ تارالعان. ول تەرىنى بوس راديكالداردىڭ اسەرىنەن قورعايدى، تەرىنى قالپىنا كەلتىرۋ پروتسەستەرىن بەلسەندىلەندىرەدى، ونى قورەكتەندىرەدى جانە جانداندىرادى. سونداي- اق كوللاگەن مەن ەلاستيننىڭ سينتەزدەلۋىنە مۇمكىندىك تۋعىزادى، بۇل ءاجىم قىرتىستارىنىڭ جازىلۋىنا، تەرىنىڭ تىعىزدىعى مەن سوزىلىمدىلىعىن ۇلعايتادى.
10. بي-بي-سي تەلەارناسىنىڭ حابارلاۋى بويىنشا، لوس انجەلەستەگى كاليفورنيا ۋنيۆەرسيتەتى زەرتتەۋشىلەرىنىڭ ءبىر توبى 65-70 جاس اراسىنداعى پروستات اۋرۋىنا شالدىققان ەر ادامداردىڭ ءبىر توبىن باقىلاۋعا العان ەكەن. بۇل ادامدار حيرۋرگيالىق جولمەن نەمەسە لازەرلىك تەراپيا ارقىلى پروستات اۋرۋىنان ەمدەلۋگە تىرىسىپتى. ءبىراق تەكسەرۋ كەزىندە بايقالعان بەلگىلەرگە قاراعاندا بۇل ادامداردىڭ اۋرۋى ودان ارى ءورشىپ كەتكەن. زەرتتەۋشىلەر اۋرۋعا شالدىققان وسى ادامداردىڭ بىرنەشەۋىن تاڭداپ الىپ، ولارعا كۇنىنە بەلگىلى ءبىر مولشەردە انار شىرىنىن بەرىپ تۇردى. بۇل شارانىڭ ناتيجەسىندە وسى ادامدارداعى پروستات اۋرۋىنىڭ ءورشۋ جىلدامدىعى انار شىرىنىن ىشكەننەن كەيىن ايتارلىقتاي باسەڭدەدى.
ايجان جامبىلباي
