سپورت: قازاقستان تاەكۆوندوشىلارى 10 مەدالگە قول جەتكىزدى

«G-1 دارەجەسىندەگى جارىس فۋدجەيرا قالاسىندا ءوتتى. وعان الەمنىڭ ءار ەلىنەن كەلگەن 550 سپورتشى قاتىستى. جارىستىڭ اشىلۋ سالتاناتىنا فۋدجەيرانىڭ مۇراگەر حانزاداسى شەيح موحاممەد بين حاماد بين موحاممەد ءال- شاركيدىڭ ءوزى قاتىسىپ، تۋرنيردىڭ بەدەلىن كوتەردى»، دەلىنگەن حابارلامادا.

ال، قازاقستان قۇراماسى 3 كۇنگە سوزىلعان جارىس قورىتىندىسى بويىنشا 2 كۇمىس پەن 8 قولا مەدالدى قانجىعاسىنا بايلاپ، ۇزدىكتەر قاتارىنا ءىلىندى.

اقتىق سىنداردا 67 كەلى مەن 73 كەلى سالماقتا ونەر كورسەتكەن قىزدارىمىزعا ساتتىلىك جەتىسپەي، فەرۋزا ەرگەشوۆا مەن ايگۇل ەلۋباي ەكىنشى ورىندارعا تابان تىرەدى. ال فاريزا الدىوڭعاروۆا (49 ك گ)، راحات دۋلاتوۆا (53 ك گ)، گۇلىم بيبالايەۆا (67 ك گ)، ايزەرە ىرگەباي (67 ك گ)، مەرەكە ءجۇنىسوۆا (+73 ك گ)، دينارا ۇزاقباي (+73 ك گ)، نۇرلان مىرزابايەۆ (74 ك گ) جانە دە قۇرامادان بولەك بارعان قايىرجان يسلامحانوۆ (63 ك گ) قولا مەدالدى قاناعات ەتتى.

ايتا كەتەلىك، بىلتىر ءدال وسىنداي جارىستا قازاقستان سپورتشىلارى تەك 2 مەدالگە عانا قول جەتكىزگەن بولاتىن.

فەدەراتسيا پرەزيدەنتى ۆياچەسلاۆ كيمنىڭ ايتۋىنشا، بۇل جەتىستىككە ءبىرىنشى كەزەكتە سپورتتىق جەكپە- جەك جانە كۇش قولدانىلاتىن سپورت تۇرلەرى كونفەدەراتسياسىنىڭ قۇرامىنداعى قازاقستان تاەكۆوندو فەدەراتسياسىنىڭ ەرەن ەڭبەگى ارقاسىندا قول جەتىپ وتىر.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى