ەلباسى كىتاپحاناسى جارتى جىلدا 10 مىڭعا جۋىق وقىرمان قابىلدادى
قازىر كىتاپحانا قورى ۇلعايىپ كەلەدى. جاڭا كىتاپتار، قۇجاتتار مەن شەتەلدىك مارتەبەلى مەيمانداردىڭ سىيلىقتارى دا كىتاپحانادان ورىن تاپتى. ەلباسى كىتاپحاناسى - تاعىلىمى مول، مۇمكىندىگى زور مەكەمە. سوندىقتان وقىرماندار مۇندا ەلىمىزدىڭ تۇپكىر-تۇپكىرىنەن ارنايى كەلەدى.
ەڭسەلى كىتاپحانا جارتى جىلدا 10 مىڭنان استام وقىرمان قابىلداپ ۇلگەردى. ولاردىڭ باسىم كوپشىلىگىن وقۋشىلار مەن ستۋدەنتتەر قاۋىمى قۇرايدى. ەلباسى كىتاپحاناسى استانانىڭ ايشىقتى مادەني ورتالىقتارىنىڭ بىرىنە اينالىپ كەلەدى. وقۋشى، وقىتۋشىمەن قاتار، شەتەلدەن ساپارلاپ كەلگەن مارتەبەلى مەيماندار دا مۇندا باس سۇقپاي كەتپەيدى.
جارتى جىل ىشىندە ءبىرقاتار مەملەكەت باسشىلارى ساۋلەتى مەن داۋلەتى جاراسقان عيماراتتىڭ عاجاپتارىمەن تانىس بولدى. سونداي-اق جۇزدەگەن دەلەگاتسيالار مەن ارنايى قوناقتار جەتىپ ارتىلادى. پرەزيدەنت تاپسىرماسىمەن بوي كوتەرگەن كىتاپحانانىڭ ماقساتى - بىلىكتى ۇرپاق تاربيەلەۋ.
سوندىقتان ەلباسى ساپالى ءبىلىم بەرۋ مەن كىتاپحانانىڭ دامۋىن جەكە قاداعالايدى. كىتاپحانانىڭ قورى قوماقتى. نۇرسۇلتان نازاربايەۆتىڭ جەكە قورىنان الىنعان كىتاپتار مەن قۇجاتتار، سونداي-اق ۇزىن سانى 40 مىڭعا جۋىق ەڭبەك ورنالاسقان. ال ەلەكتروندىق بازا ارقىلى الەمدىك كەڭىستىككە شىعىپ، 13 ميلليون مالىمەتكە قول جەتكىزۋگە بولادى.
اۆتورلارى: م. ىبىرايىم، ق. ءابىلدين
