اتىراۋدا 10 بالاسى بار انا باسپانا سۇراپ وتىر

وتەعاليەۆتەر جاتاقحانانىڭ ءبىر بولمەسىن پانالاپ وتىر.

ەكى كۇن قاتارىنان توقتاماي جاۋعان جاڭبىر دا ولاردىڭ ەڭسەسىن ءتۇسىرىپ جىبەرگەن. ويتكەنى توبەلەرىنەن سۋ سورعالاپ، 12 ادام جان باعىپ وتىرعان جەر قازىر سىز تارتىپ تۇر. الدى كامەلەتكە ەندى جەتكەن شيەتتەي بالا-شاعانىڭ جارتىسى جاتاتىن جەر بولماعاندىقتان، تامىر-تانىستى جاعالاپ كەتىپتى.

التىن القا يەگەرى جانارگۇل نۇرىمبەتوۆا توبەدەن ىشكە اققان سۋدى ءسۇرتىپ الەك. تەك بالا-شاعاسى پانالاپ وتىرعان بۇل بولمە دە وزىنىكى ەمەس. تۋىسقانى ۋاقىتشا تۇرۋعا بەرگەن باسپانانىڭ توبەسىن جازدا جابىلىپ ءجۇرىپ جاماپ-جاسقاعان. ءبىراق 2 تاۋلىك بويى توقتاماي جاۋعان قار ارالاس جاڭبىر ەڭبەكتى ەش قىلدى.

جانارگۇل نۇرىمبەتوۆا، كوپبالالى انا:

- ەندى مەنىڭ باسقا باراتىن جەرىم جوق. وسى 10 بالامدى كيىندىرىپ، اكىمدىككە بارىپ وتىرماسام باسقا امالىم جوق. ءۇيدىڭ ءىشى كوگەرگەن ءيىس. بالالار وكپە اۋرۋىنا شالدىعا ما دەپ قورقام. جوتەلەدى، اۋرۋحاناعا جاتىپ شىقتى.

كۇندىز بالالارى دىمقىل تارتقان سالقىن ۇيدە بولسا، كەشكىسىن كورشى-قولاڭدى جاعالاپ، قوناتىن جەر ىزدەپ كەتەدى.

زاۋرە ادىلبايەۆا، كورشىسى:

- جىلاپ ءجۇر بالالارىن قولتىقتاپ، تۇندە تومەندە 4 قاباتتا تۇرامىز، بىزگە دە سۋ كەتىپ جاتىر. ءبىراق، كوريدورىمىزعا كەتپەگەسىن تۇندە وراپ الىپ ، 3-4 بالاسىن قاسىما الىپ جاتتىم.

تۇرعىنداردىڭ ايتۋىنشا، ەسكى جاتاقحانا يەسىز. سۇرىلەتىن اپاتتى ۇيلەر قاتارىندا دا جوق. ال نۇرىمبەتوۆتەردىڭ وزگە جەردەن پاتەر جالداۋعا جاعدايلارى جوق. جالعىز وتاعاسىنىڭ 60 مىڭ تەڭگە تابىسى ءىشىپ-جەمنەن ارتىلمايدى.

جەتى قىز، ءۇش ۇلدىڭ اۋزىنان جىرعان كۇننىڭ وزىندە جالعا بەرۋشىلەر كوپبالالى وتباسىن ۇناتا بەرمەيدى. سوندىقتان ءبىر پاتەرگە قول جەتكىزۋ - بۇلاردىڭ باستى ارمانى. ءبىراق بۇل جۋىقتا ورىندالا قويمايتىن سەكىلدى. اتقامىنەرلەر اتىراۋدا مۇنداي وتباسىلاردىڭ كوپ ەكەنىن ايتادى.

كەنجەگۇل مۇساعاليەۆا، اتىراۋ قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ باس مامانى:

- جانارگۇل نۇرىمبەتوۆا حالىقتىڭ الەۋمەتتىك جاعىنان قورعالاتىن ءالسىز توپتارى جاتاتىن وتباسىلار تىزىمىنە 2012 - جىلدىڭ 6- قىركۇيەگىنەن باستاپ تىركەلگەن. بۇگىنگى كۇنى كەزەكتەگى رەتتىك سانى 2447. ق ر تۇرعىن ءۇي قاتىناستارى تۋرالى زاڭىنا سايكەس، جانارگۇل نۇرىمبەتوۆانىڭ ءوتىنىشى كەزەگىنە سايكەس قاناعاتتاندىرىلادى.

دەگەنمەن، قالالىق اكىمدىك قىزمەتكەرلەرى وتەعاليەۆتەردىڭ جاعدايىمەن تانىسىپ قايتۋعا ۋادە ەتتى. ءبىراق وعان كوپ بالالى وتباسى اسا سەنبەيدى. سەبەبى، جاعدايىن ايتىپ، ارىز جازعان جەردىڭ بارلىعى كەيىن ولاردى ۇمىتىپ كەتكەن.

31-ارنا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى