ەلباسى 10 جاستاعى الماتىلىققا حات جازدى
مەملەكەت باسشىسىمەن كەزدەسكەندە ەرجان يسابايەۆتىڭ جاسى نە ءبارى ەكىدە بولعان. «سەگىز جىل بۇرىن الماتىدا ورنالاسقان ناۋرىزباي باتىر ەسكەرتكىشىنىڭ اشىلۋىنا ءبىز ەرجانمەن كەلگەن بولاتىنبىز. سول شاراعا دا ەلباسى ن. نازاربايەۆ قاتىستى. ول بىزگە جاقىنداپ، ەرجاندى كوتەرىپ الدى. مەن سول كەزدە «باتاڭىزدى بەرىڭىز»، - دەپ ءوتىندىم.
ءبىزدى فوتوعا دا ءتۇسىردى. كەيىن بۇل سۋرەت ءتۇرلى فورۋمداردا، ب ا ق بەتتەرىندە ءجيى كەزدەسەتىن بولدى»، - دەيدى ەرجاننىڭ اكەسى باۋىرجان يسابايەۆ.
«21 - قازاندا ۇلىمىز 10 جاسقا تولدى. وسىنىڭ الدىندا ءبىز تۋعان كۇندى قالاي اتاپ وتەمىز، قانداي دوستارىن، سىنىپتاستارىن، كورشىلەرىن شاقىرامىز دەپ اقىلداستىق. سول كەزدە ەرجان: «اكە، پرەزيدەنتتى مەنىڭ تۋعان كۇنىمە شاقىرايىق. ول ءۇشىن نە ىستەۋ كەرەك؟» - دەپ ايتتى. مەن وعان دوستارىڭدى قالاي شاقىراسىڭ، شاقىرتۋ جازاسىڭ با، سوندا ول كىسىگە دە جىبەر دەدىم. ەرجان ۇلكەن ۇلىمىز نۇرجانمەن بىرگە بولمەلەرىنە جۇگىرىپ كەتىپ قالدى دا، 40 مينۋتتان سوڭ حات اكەلدى. مەن تاڭقالدىم. كەلەسى كۇنى ءبىز بىرگە «قازپوشتاعا» باردىق»، - دەيدى باۋىرجان يسابايەۆ.
حاتتىڭ سىرتىنا ەرجان پرەزيدەنتتىڭ جەكە قولىنا تاپسىرۋ قاجەتتىگىن جازعان. ول ەلباسىنا ءوزىنىڭ اعاسىمەن بىرگە ءاردايىم كومەككە كەلۋگە دايىن ەكەندىگىن جازدى.
«وسىدان كەيىن حاتتىڭ جەتكەنى تۋرالى ايتىپ، تەلەفون ارقىلى حابارلاستى، پرەزيدەنتتىڭ جاۋاپ حاتى الماتى اكىمدىگىنە، ودان سوڭ بىزگە جەتكىزىلدى. قازىر بالا قاتتى اسەرلەنىپ ءجۇر، مەن وعان «پرەزيدەنت ساعان جاقسى وقىپ، العا قاراۋىڭ كەرەكتىگىن ايتتى» دەپ ايتامىن، - دەدى بالانىڭ اكەسى.
ەرجانعا قايتارعان جاۋاپ حاتىنىڭ سوڭىندا ەلباسى تىلەكتەرىن بىلاي دەپ جازعان بولاتىن: «...ەندىگى جولى حاتتى قازاقشا جازاتىن بول. ايتقان تىلەكتەرىڭە راحمەت. وتانعا قىزمەت ەتۋ، ونى ءسۇيۋ زور باقىت. ول ءۇشىن جاقسى وقىپ، كوپ ءبىلىم ال. اناڭا، اكەڭە مەنەن سالەم. ساۋ بول، باقىتتى بول!».
24.kz
