عالامنىڭ عاجايىپ 10 عيماراتى - فوتو
سىزدەرگە ۇسىنىلىپ وتىرعان وسىناۋ تىلسىم عيماراتتار - جارقىن بولاشاقتىڭ ايقىن كەپىلى. ەندەشە، عالامنىڭ عاجايىپ عيماراتتارىمەن تانىس بولىڭىزدار:
1. پاتشا مۇناراسى
پاتشا مۇناراسى بولاشاقتا الەمدەگى ەڭ بيىك عيماراتتار كوشىن باستاماق. اراب ەلىننىڭ تورىنەن ورىن العان بۇل عيمارات 2019 - جىلى قولدانىسقا بەرىلەدى دەپ بولجام جاسالۋدا. 1.2 ميلليارد ا ق ش دوللارىنا سالىنىپ جاتقان عيماراتتىڭ ىشىندە: كوندومينيمدەر، كەرەمەت كەڭسەلەر، وبسەرۆاتوريا، «Four Seasons» قوناق ءۇيى جانە 157 قاباتىندا الەمدەگى ەڭ بيىك تەرراسا ورنالاسپاق.
2. شاڭحاي مۇناراسى
قىتايداعى 121 قاباتتى شاڭحاي مۇناراسىنىڭ قۇرىلىسى 1993 - جىلى باستالعان بولاتىن. اراعا 21 جىل سالىپ، قۇرىلىس جۇمىستارى اياقتالدى. 4.2 ميلليارد ا ق ش دوللارى جۇمسالعان الىپ عيماراتتا ءالى دە ارلەۋ جۇمىستارى جۇرگىزىلىپ جاتىر. الەمدەگى بيىكتىگى جاعىنان ەكىنشى ورىندا تۇرعان بۇل عيماراتتىڭ سالتاناتتى اشىلۋ ءراسىمى 2015 - جىلى وتەدى دەپ جوسپارلانۋدا. دەسە دە، عاجايىپ عيماراتقا قىزىعۋشىلىق تانىتقان ميلليونداعان ادام تاڭعاجايىپ ونەر تۋىندىلارىنىڭ كورەرمەنى بولىپ ۇلگەردى. كوكپەن تالاسقان «كوك شاتىر» تابيعات اپاتتارىنا ءتوزىمدى اينەكپەن قاپتالعان.
3. دۋباي پەرل
دۋبايدا الەمنىڭ بولشەگى فورماسىندا جاساندى ارالدار جاسالعان بولاتىن. قاراپايىم تۇرعىن ۇيگە ۇقساس بيىك ساۋدا ورتالىعىن سالۋعا ازىرگە جۇمباق بولىپ وتىرعان اتاقتى ادام شەشىم قابىلداعان. پارسى شىعاناعىنىڭ كورىنىسىمەن 73 قاباتتى دۋباي پەرل قۇرىلىسى 2009 - جىلى باستالعان جانە 2016 - جىلى اياقتالۋى ءتيىس. "ىشكى قالادا" كوكتەگى كوپىر ارقىلى جالعاسقان 4 مۇنارا جانە حالىقارالىق دۋباي كينوفەستيۆالى وتەتىن 1800 ورىندى پرەميۋم-تەاتر سالۋ جوسپارلانعان.
4. Agora Garden
شيىرشىقتالعان قوس قاناتتى اگورا باقشاسى 2016 - جىلى تابيعات پەن ادام اراسىنداعى ۇيلەسىمدىلىكتىڭ ۇزدىك ۇلگىسى بولادى دەپ كۇتىلۋدە. 20 قاباتتى يرەك پىشىندەس عيمارات تۇتاستاي جاسىل جەلەك جامىلعان. كەرەك دەسەڭىز، ءار قاباتتا بالكون-باقشالار بار. ونىمەن قويماي، بۇل عيمارات، قۋات كوزىن كۇننەن الىپ، جاۋىن سۋىن وڭدەي الادى.
5. World One
كوكپەن تالاسقان 117 قاباتتى World One عيماراتىنىڭ ارلەۋ جۇمىستارى اياقتالسا، الەمدەگى ەڭ بيىك تۇرعىن ءۇي جانە مۋمبايداعى ەڭ بيىك عيمارات بولارى ءسوزسىز. سونداي- اق، ول مۋمبايداعى بايلاردىڭ باسپاناسىنا اينالماق. سونىمەن قوسا، دجوردجيو ءارمانيدىڭ ديزاينىمەن جاسالعان عيماراتتا، قىزمەت بابىندا پايدالانىلاتىن، 3-4 بولمەلى (ءار قايسى 1.5 ميلليون ا ق ش دوللارى تۇرادى ) 300 گە تارتا ۇلكەن ءۇي-جاي قوسىمشا سالىنعان. 126 قاباتتى ءۇندى مۇناراسىنىڭ سالىنىپ جاتقانىن ەسكەرسەك، بۇل عيماراتتىڭ "مۋمبايداعى ەڭ بيىك عيمارات" اتاعىن ۇزاق ۋاقىت ۇستاپ تۇرا المايدى-اۋ.
6. ابدوللا پاتشانىڭ مۇناي زەرتتەۋ جانە وقىتۋ ورتالىعى (KARSARC)
بۇل - وسى تىزىمدەگىلەرمەن سالىستىرعاندا جەرگە ەڭ جاقىن ورنالاسقان عيمارات. ءبىراق ساۋد ارابيانىڭ ەر- ريادتاعى عاجاپ KARSARC كوپۇلتتى بەيكوممەرتسيالىق ورتالىقتان گورى جەيمس بوند وقيعاسىنداعى زۇلىمنىڭ ىنىنە كوبىرەك ۇقسايدى. التى بۇرىشتى شاقپاق ءورىمدى، كريستالل ءتارىزدى وزگەشە ديزاين - يراك ارحيتەكتورى زاحي حاديدتىڭ ءتول تۋىندىسى. قۇرىلىس 2009 -جىلى باستالىپ، قازىرگى ۋاقىتتا تەك الماستى جاقتاۋى عانا اياقتالعان. ازىرگە، عيماراتتىڭ اشىلۋ مەرزىمى بەلگىسىز.
7. سۋجوۋداعى جۋننان ورتالىعى
جاقىندا عانا قىتايدىڭ سۋجوۋ قالاسىندا بيىكتىگى 730 مەتر، 138 قاباتتى الپاۋىت ورتالىقتىڭ قۇرىلىسى باستالدى. بۇل ورتالىقتىڭ قۇرىلىسى وڭايعا سوقپاسى بەسەنەدەن بەلگىلى. الايدا، 4.5 ميلليارد ا ق ش دوللارىنا باعالانعان جوبا بەلگىلەنگەن مەزگىلىندە (2020 - جىلى) قولدانىسقا بەرىلسە، قىتايداعى ەڭ بيىك عيمارات، ال الەمدە بولسا ەڭ بيىك عيماراتتاردىڭ ۇشتىگىنە ەنەدى.
8. Lotte World Tower
جوعارىداعى الىپ عيماراتتاردىڭ كوشىن ارى قاراي وڭتۇستىك كورەيا جالعاستىرادى. سەۋلدە 556 مەترلىك، 123 قاباتتى Lotte World Tower سالىنىپ جاتىر. 2016 -جىلى قولدانىسقا بەرىلگەلى تۇرعان عيماراتتىڭ ىشىندە: ءتۇرلى دۇكەندەر، كەڭسەلەر، اپارتامەنتتەر، قوناق ۇيلەر، ت. ب. قىزمەت كورسەتۋ ورتالىقتارى سالىنۋدا. سونىمەن قاتار، پيراميدالىعىمەن ەرەكشەلەنگەن سولتۇستىك كورەيانىڭ «Ryugyong» قوناق ءۇيىن «تاقتان ءتۇسىرىپ»، كورەيانىڭ جارتى شارىنا توبەدەن قاراماق.
9. داۆانگ تاۋلى شيپاجايى
قاراپايىم قوناق ۇيلەردەن شارشادىڭىز با؟ ولاي بولسا، 2016 - جىلى قوس جارتاسپەن «قۇشاقتاسا ورنالاسقان» قىتايدىڭ داۆانگ تاۋلى شيپاجايى سىزدەردى اسىعا كۇتەدى. 170 مەتر اۋماقتى الىپ جاتقان الىپ شيپاجايدا مۇز ايدىنى، جابىق شاڭعى كەشەنى، اكۆاپاركپەن قاتار اسپالى باقشا ورىن العان.
10. «Songjiang» قوناق ءۇيى
جارتاس پەن كولدىڭ اراسىندا سالىنعان «Songjiang» قوناق ءۇيى قىتايدىڭ جوعارى ساناتتى دەمالىس ورىندارىنىڭ ءبىرى بولادى دەپ كۇتىلۋدە. شاڭحايعا جاقىن جەردەن قونىس تەپكەن بۇل قوناق ءۇي داۆانگ تاۋلى شيپاجايى سەكىلدى جارتاستا ورنالاسقان. ۇستىنەن سىلدىراي اعىپ جاتقان سارقىراما اسەم عيماراتتىڭ سۇلۋلىعىن ارتتىرا تۇسەدى. ءبىر قاراعاندا، بۇل اسەمدىك جوعارىدان انىق كورىنبەۋى مۇمكىن. الايدا، جاقىننان كوز تاستاساڭىز، سۋ استىنداعى تىلسىم ءبىر كورىنىسكە قانىق بولاسىز.
دايىنداعان: ەربول جۇماباي ۇلى
