جەڭىمپاز 10 ميلليون تەڭگەگە يە بولادى
ونىڭ سوزىنە قاراعاندا، تۋرنير «نۇر وتان» پارتياسىنىڭ 15 جىلدىعىنا ورايلاستىرىلدى. وعان قازاقستاننىڭ بارلىق ايماعىنىڭ شاباندوزدارى قاتىسادى. «جەڭىمپاز 10 ميلليون تەڭگەگە قول جەتكىزەدى. جۇلدەگەرلەر دە باعالى سىيلىقتارعا يە بولادى. ءار وبلىستىڭ نامىسىن قورعايتىن جىلقىنىڭ سانى 10 نان اسپاۋى ءتيىس. سوندىقتان 160 جىلقى قاتىسۋى مۇمكىن. الايدا ازىرگە الماتى مەن اقمولا وبلىستارى عانا 10 جىلقىدان قاتىستىراتىنىن ايتتى. ال وزگە وبلىستار 3-4 جىلقىنى تىركەدى. ءتىزىم تولىق قۇرىلمادى. قاتىسۋشىلاردىڭ بارلىعى كەلگەن جوق. تۋرنير ۇلتتىق سپورت تۇرلەرىنە اۋەس جانداردىڭ قىزىعۋشىلىعىن تۋدىرىپ، جىل سايىن ۇيىمداستىرىلاتىن جاقسى داستۇرگە اينالادى دەگەن ۇمىتتەمىن»، - دەپ قوستى ول.
«سوڭعى كەزدەرى ءداستۇرلى قازاق بايگەسى دامىماي وتىر. نەگىزىنەن مۇنداي جارىستارعا بارلىعىنا بەلگىلى بۋدانداستىرۋ جولىمەن الىنعان اعىلشىن تازا قاندى جىلقى تۇقىمى قاتىسادى. ءبىزدىڭ جىلقىلار ازىرگە ولارمەن باسەكەلەسە المايدى. سوندىقتان ءداستۇرلى قازاق بايگەسى مەن جىلقىلارىمىزدى ناسيحاتتاۋ ماقساتىندا 43 شاقىرىمدىق ۇلكەن الامان بايگە ۇيىمداستىردىق. جارىس تەگىستەلمەگەن، تابيعي جولدا بولماق. مىقتىسى باس جۇلدەگە يە بولادى»، - دەدى ب. تىلەۋحان.
وسى شارا اياسىندا «ات سىنشىسى» بايقاۋى وتەدى دەپ اتالىپ ءوتىلدى. بۇل بايقاۋ بويىنشا ماراپاتتاۋ «تولىباي سىنشى»، «كۇرەڭباي سىنشى»، «كەيحاۋىس سىنشى» اتالىمدارى بويىنشا جۇزەگە اسادى.
ءتۋرنيردى «نۇر وتان» پارتياسى جانە «سامۇرىق-قازىنا» ا ق قولداۋىمەن ق ر ۇلتتىق سپورت تۇرلەرى قاۋىمداستىعى جانە ق ر مادەنيەت جانە سپورت مينيسترلىگى ۇيىمداستىردى.
