وسىدان 10 جىل بۇرىن الاپات سۋنامي كەزىندە سۋعا كەتكەن قىز امان تابىلدى
"ءبىز كۇيەۋىم ەكەۋمىز قۇدايعا مىڭ تاۋبە ەتتىك، العىسىمىز شەكسىز، ون جىلدان كەيىن قىزىمىزبەن قايتا قاۋىشتىرعانى ءۇشىن" دەيدى 42 جاستاعى جاماليا ەسىمدى ايەل.
2004 - جىلى سۋماترا ارالىنىڭ جاعالاۋىندا قۋاتتىلىعى 9,2 بالدىق جەر سىلكىنىسى تىركەلىپ، بيىكتىگى 20 مەترلىك تولقىندار يندونەزيا ارالدارىن شايىپ كەتكەن بولاتىن. تابيعي اپات ورىن العان ساتتە سەپتي رانگكۋتيدىڭ وتباسى تۇگەلىمەن پانا ىزدەپ، قاشا جونەلگەن.
جاماليا ۇلكەن ۇلىن، ال سەپتي كىشكەنتاي ەكى قىزىن جەتەكتەپ جۇگىرگەن ەكەن. سۋ بەلگە كەلگەن كەزدە وتاعاسى 4 جاسار راۋدحاتۋل جاننا مەن ونىڭ اعاسىن اعاش تاقتايعا وتىرعىزىپ، ءوزى قۇرعاق جەرگە شىعىپ ۇلگەرىپتى. ال، بيىك تولقىندار ەكى ءسابيدى الىسقا اعىزىپ اكەتكەن.
سۋ كەرى قايتىپ، جاعداي قالپىنا كەلگەن كەزدە سەپتي مەن جاماليا ەكى بالاسىن ءبىراز ىزدەگەن كورىنەدى. الايدا، جاقىن ماڭنان تابىلماعان سوڭ ولار ۇمىتتەرىن ءۇزىپ، سولتۇستىك سۋماترا پروۆينسياسىنا كوشىپ كەتكەن.
ال، اعىستىڭ ەكپىنىمەن بانياك ارحيپەلاگىنىڭ ءبىر ارالىنا جەتكەن ەكى بالانى ەكى ءتۇرلى وتباسى ءبولىپ الىپ كەتىپتى. راۋدحاتۋلدى جەرگىلىكتى بالىقشىلاردىڭ ءبىرى اسىراپ العان. سول ۋاقىتتان بەرى ونىڭ جاڭا ەسىمى - ۆەنني. قىزدىڭ ايتۋىنشا، اعاسى دا ارالعا امان جەتكەن ەكەن. الايدا، ونى وزگە بىرەۋلەر الىپ كەتىپتى.
اراعا ون جىل سالىپ راۋدحاتۋلدى وسى ەلدىمەكەنگە كەلگەن تۋىس اعاسى كەزدەيسوق بايقاپ قالعان. ول دەرەۋ قىزدىڭ اناسىنا حابارلاسىپ، ءمان-جايدى ايتىپ بەرىپتى.
"مەن انامدى العاش كورگەنىمدە جۇرەگىم سىزداپ قويا بەردى. كوپتەن بەرى ىزدەگەنىمدى اقىرى تاپتىم. ءبىز ءبىر-ءبىرىمىزدى قۇشاقتاعان ساتتەگى سەزىمدى سوزبەن جەتكىزە المايمىن، ەرىكسىز جىلاي بەردىك" دەيدى راۋدحاتۋل.
قىزدى اسىراپ العان وتباسىعا دا وڭاي ءتيىپ وتىرعان جوق. اسىراندى قىزعا ابدەن باۋىر باسقان ولار رامازان ايى بىتكەنگە دەيىن اتا-اناسىنان بالانى الىپ كەتپەۋىن سۇراپتى. جاماليا مەن سەپتي ولاردىڭ بۇل تىلەگىن ورىنداپ، راۋدحاتۋل ەكى كۇن بۇرىن عانا ءوز ۇيىنە ورالدى.
"ەندى سول ارالعا قايتا ورالىپ، ۇلىمىز اريفتى ىزدەيتىن بولامىز. مەنىڭ جۇرەگىم ونىڭ ءتىرى ەكەنىن سەزەدى" دەيدى جاماليا تىلشىلەرگە بەرگەن سۇحباتىندا.
Baq.kz
