مۇناي ءوندىرۋ 107,4 ميلليون تونناعا دەيىن ۇلعايادى - اسەت ەرعاليەۆ

بۇل تۋرالى ۇكىمەت وتىرىسىندا 2022-2026 -جىلدارعا ارنالعان الەۋمەتتىك- ەكونوميكالىق دامۋى بولجامىنىڭ جوباسىن تانىستىرۋ كەزىندە ۇلتتىق ەكونوميكا ءمينيسترى اسەت ەرعاليەۆ ءمالىم ەتتى، دەپ حابارلايدى قازاقپارات ءتىلشىسى.

«2022 -جىلى مۇناي ءوندىرۋ 87,9 ميلليون توننانى قۇراپ، 2026 -جىلى 107,4 ميلليون تونناعا دەيىن ۇلعايادى. 2022 -جىلى تاۋارلار ەكسپورتى 60,1 ميلليارد ا ق ش دوللارى دەڭگەيىندە بولجانىپ وتىر جانە 2026 -جىلعا قاراي 79,8 ميلليارد ا ق ش دوللارىنا دەيىن ۇلعايادى. تاۋارلار يمپورتى 2022 -جىلى 40,8 ميلليارد ا ق ش دوللارىنان 2026 -جىلى 43,4 ميلليارد ا ق ش دوللارىنا دەيىن ۇلعايادى» ، - دەدى ءا. ەرعاليەۆ.

ونىڭ ايتۋىنشا، ساۋدا بالانسىنىڭ سالدوسى 19,3 ميلليارد ا ق ش دوللارىنان 36,4 ميلليارد ا ق ش دوللارىنا دەيىن وسەدى. وسى ماكروەكونوميكالىق كورسەتكىشتەردى ەسكەرە وتىرىپ، بيۋدجەتتىك پارامەترلەردىڭ كەلەسى بولجامى ازىرلەندى. رەسپۋبليكالىق بيۋدجەتتىڭ كىرىستەرى 2022 -جىلى بولجامدار بويىنشا 9,2 تريلليون تەڭگەنى، 2023 -جىلى - 9,7 تريلليون تەڭگەنى، 2024 -جىلى - 10,4 تريلليون تەڭگەنى قۇرايدى.

«كەپىلدەندىرىلگەن ترانسفەرتتى 2022 -جىلى - 2,4 تريلليون تەڭگە، 2023 -جىلى - 2,2 تريلليون تەڭگە جانە 2024 -جىلى - 2 تريلليون تەڭگە مولشەرىندە ايقىنداپ، الەۋمەتتىك مىندەتتەمەلەردى قارجىلاندىرۋعا باعىتتاۋ ۇسىنىلىپ وتىر»، - دەدى مينيستر.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى