اقمولا وبلىسىنىڭ اكىمى 105 جاستاعى كەيۋانانى ناۋرىز مەيرامىمەن قۇتتىقتادى
دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.
تىل ەڭبەككەرى ءساليما اليەۆا قازىر 105 جاستا. قاريانىڭ ايتۋىنشا، سوعىس جىلدارىندا تىلدا تىنىمسىز ەڭبەك ەتىپ، سول ءومىردىڭ اۋىرتپالىعى مەن قيىندىقتارىن كورگەن. جۇبايى 1941 -جىلى سوعىسقا اتتانىپ، ستالينگراد، بۋداپەشت قالالارىندا جاۋعا قارسى ۇرىسقا قاتىستى. كەيىن سوعىس اياقتالعان سوڭ 1944 -جىلى ەلگە ورالدى. ەكەۋى بالالارىن ءوسىرىپ، تاربيەلەدى. 1994 -جىلى جارى دۇنيەدەن ءوتتى.
بۇگىنگى كۇنى ءساليما بايازيت قىزى نەمەرەلەرى مەن شوبەرەلەرىنىڭ قىزىعىن كورىپ وتىر. كەيۋانا جاسى عاسىردان اسسا دا، ءالى تىڭ تىلدا سىڭىرگەن ەڭبەگى ءۇشىن العان ناگرادالار مەن «التىن القا» مەدالىن ماقتانىشپەن ومىراۋىنا تاعىپ الادى. بۇگىندە اقجاۋلىقتى اجە كوكشەتاۋدا جيەن نەمەرەسى عادىلجان مەن كەلىنى نازگۇل قولىندا تۇرادى.
جالپى، قاريا وسى كۇنى 23 نەمەرەدەن 25 شوبەرە ءسۇيىپ وتىر. كەزدەسۋ بارىسىندا ايماق باسشىسى تاۋەلسىزدىك جىلدارىنداعى بارلىق جەتىستىكتەر سوعىس جانە تىل ارداگەرلەرىنىڭ لايىقتى ەرلىگى مەن ەڭبەگىنىڭ ارقاسىندا الىنعانىن اتاپ ءوتتى.
« ۇلىستىڭ ۇلى كۇنى - ناۋرىز مەرەكەسىندە كوپ جىلدىق ادال ەڭبەگىڭىز ءۇشىن، تاجىريبەڭىز بەن مەيىرىمدىلىگىڭىز ءۇشىن سىزگە مىڭ العىس ايتامىن! ناۋرىز مەرەكەسى جەتىستىك، مولشىلىق پەن تاتۋلىق اكەلسىن. اركەز ورتامىزدا امان وتىرعايسىز. شاڭىراعىڭىزعا ىرىزدىق پەن بەرەكە نۇرى شالقىسىن»، - دەدى ەرمەك مارجىقپايەۆ.
ءوز كەزەگىندە، تىل ەڭبەككەرى ايماق باسشىلىعىنا كورسەتكەن قامقورلىعى ءۇشىن العىس ءبىلدىرىپ، وتانىمىزعا بەيبىت اسپان مەن باقىتتى ءومىر تىلەدى. سونداي- اق، وسى كۇنى وبلىس اكىمى قارتتار مەن مۇگەدەكتەرگە ارنالعان «ءۇمىت شاڭىراق» پانسيوناتىنا بارىپ، ناۋرىز مەيرامىمەن قۇتتىقتادى.
اۆتور: اسلان وسپانوۆ
