شەتەلدەگى اكتيۆىنىڭ سوماسى 100 ميلليون دوللاردان اساتىن ادامدار كاپيتالىنىڭ زاڭدىلىعى تەكسەرىلەدى - زاڭ
ونىڭ سوزىنە قاراعاندا، اتالعان زاڭ جوباسىن قابىلداۋ كەزىندە ماجىلىستەگى بارلىق ساياسي پارتيالاردىڭ فراكسيالارى، ءبىرمانداتتى وكرۋگتەردەن سايلانعان دەپۋتاتتار قۇجات جوباسىن ماقۇلدايتىندارىن ايتىپ، ۇسىنىلعان تۇجىرىمداردى تولىعىمەن قولداعان. كەيىن ءماجىلىس قابىلداعان زاڭدى سەنات تا ماقۇلداعانى بەلگىلى.
دەگەنمەن، سنەجانا يماشيەۆانىڭ ايتۋىنشا، پارلامەنتكە كەيبىر ساراپشىلار مەن زاڭگەرلەردەن، كونستيتۋتسيا ماماندارىنان قابىلداناتىن زاڭنىڭ اتازاڭعا سايكەستىگىن تەكسەرۋ قاجەتتىگى تۋرالى ءوتىنىم تۇسكەن.
«پرەزيدەنت زاڭعا قول قويماي تۇرىپ ونىڭ اتا زاڭعا سايكەستىگىن تەكسەرتۋ ءۇشىن كونستيتۋتسيالىق سوتقا جۇگىندى. كەشە كونستيتۋتسيالىق سوت ونى اتا زاڭعا ساي دەپ تانىپ، نورماتيۆتىك قاۋلى شىعاردى»، - دەپ جازدى دەپۋتات Facebook پاراقشاسىندا.
دەپۋتات ەلىمىزدە ات توبەلىندەي توپتىڭ جەردىڭ ءۇستى مەن استىنداعى بايلىقتى ءوزارا ەنشىلەپ العانىن، سونىڭ ىقپالىمەن ەكونوميكادا، ساياساتتا ۇستەمدىك قۇرىپ كەلگەنىن، ال قالعان حالىق ۇلكەن تابىس تاپپاق تۇگىل، جايلى تۇرمىسقا زار بولىپ وتىرعانىن ايتادى.
«ارينە، باي بولۋعا ەشكىم تىيىم سالعان جوق. الەمنىڭ كەز كەلگەن ەلىندە شەكسىز باي دا، شەكىز كەدەي دە بار شىعار. ءوز داۋلەتىن اقىلى مەن ءبىلىمىنىڭ، تىنىمسىز ەڭبەكتىڭ ارقاسىندا ەسەلەپ جاتقاندارعا ەشقانداي سۇراق جوق. ال قولىنداعى قىزمەتىنىڭ، جوعارى لاۋازىم يەلەرىمەن تانىستىعىنىڭ، اكىمشىلىك رەسۋرستاردىڭ، اۋىز جالاسقان جەمقورلىقتىڭ ارقاسىندا كاپيتال يەمدەنگەندەرگە يەمدەنگەندەرگە سۇراق تۋىنداۋى ادىلەتتى. ولار قولىنداعى بايلىقتىڭ قايدان كەلگەنىن، قانداي جولمەن كەلگەنىن دالەلدەۋ كەرەك. زاڭنىڭ باستى ماقساتى قالاي ورىندالاتىنىن ۋاقىت كورسەتەر. قۇقىقتىق نەگىز كەرەك ەدى - جاسالدى. قاجەت بولسا تولىقتىرىلادى»، - دەيدى ءماجىلىس دەپۋتاتى.
سنەجاننا يماشيەۆا زاڭسىز الىنعان اكتيۆتى قىلمىستىق ىستەن تىس تاركىلەۋدىڭ الەمدىك تاجىريبەدە بار ءتاسىلىن ۇلتتىق زاڭناماعا ەنگىزەتىنىن ايتادى.
بۇل جەردە «ەرىكتى قايتارۋ» جانە «ازاماتتىق ماجبۇرلەپ قايتارۋ» قۇرالدارى قولدانىلادى. اۋەلى اكتيۆىنىڭ سوماسى 100 ميلليون دوللاردان اساتىن ادامداردىڭ كاپيتالىنىڭ زاڭدىلىعى تەكسەرىلەدى. بۇل تۇلعالاردى ۇكىمەت مۇشەلەرى مەن پارلامەنت دەپۋتاتتارىنان، قوعامدىق ۇيىم وكىلدەرىنەن قۇرالعان ارنايى كوميسسيا تىزىمگە الادى. تىزىمگە ەنگەن ادامدار كاپيتالىنىڭ زاڭدىلىعىن اشىپ كورسەتۋ كەرەك دەگەن ءسوز. زاڭدىلىعىن دالەلدەۋ ءۇشىن ءتيىستى دەكلاراتسيا تاپسىرادى. زاڭسىز اكتيۆتەردى ىزدەۋ مەن قايتارۋ ءىسى باس پروكۋراتۋرانىڭ جانىنان قۇرىلاتىن كوميتەتكە جۇكتەلەدى. قايتارىلعان اكتيۆتەر قورعا اۋدارىلىپ، ءارى قاراي قازاقستاندىقتاردىڭ الەۋمەتتىك ماسەلەلەرىن شەشۋگە باعىتتالادى.
«باس پروكۋراتۋرا جانىنداعى زاڭسىز اكتيۆتەردى قايتاراتىن كوميتەتى قولدا بار قاراجاتتان قارجىلاندىرادى. بۇدان بولەك بالاما جولى دا كوزدەلگەن. قاجەت بولعان جاعدايدا كوميتەت جۇمىسىنا العاشقى لەكپەن قايتارىلعان قاراجات تا جۇمسالۋى مۇمكىن»، - دەيدى سنەجانا يماشيەۆا.
