قايتالاناتىن كودتاردىڭ كەسىرىنەن بيۋدجەتكە 100 ميلليارد تەڭگە تۇسپەي قالعان

«سيفرلاندىرۋدى دامىتۋدىڭ جاڭا جاعدايىندا ۇيالى بايلانىس - كوممۋنيكاتسيا قۇرالى عانا ەمەس، سونىمەن قاتار جەكە دەرەكتەردى، قاراجاتتى، بانك كارتالارىن ساقتاۋعا ارنالعان پلاتفورما. سونداي- اق، گادجەتتىڭ كومەگىمەن ونلاين رەجيمدە كرەديت، ميكروقارىز رەسىمدەۋگە جانە ءتۇرلى مەملەكەتتىك قىزمەتتى الۋعا بولادى. وسى ورايدا ەلگە ۇيالى تەلەفونداردى، سونىڭ ىشىندە IMEI قايتالاناتىن كودتارىن اكەلۋدىڭ «سۇر» سحەماسى جونىندە ايتا كەتكەن ءجون»، - دەدى باعدات مۋسين ۇكىمەت وتىرىسىندا بايانداما جاساپ.

ءمينيستردىڭ مالىمەتىنشە، قازىر ەلىمىزدە ۇيالى كومپانيالار جەلىسىنىڭ سايكەستەندىرۋ كودتارىنىڭ دەرەكقورىندا (IMEI كود) قايتالاناتىن 3,7 ميلليون ابونەنت بار.

«قايتالاناتىن ابونەنتتەردىڭ بولۋىنان مەملەكەت بيۋدجەتىنە سالىق پەن الىم تۇرىندە شامامەن 100 ميلليارد تەڭگە تۇسپەي قالعان. سونىمەن قاتار قايتالاناتىن IMEI كودتار قۇقىق قورعاۋ ورگاندارىنا ۇرلانعان ۇيالى تەلەفونداردى ىزدەۋ جانە ولاردى بۇعاتتاۋ بويىنشا جەدەل جۇمىس جۇرگىزۋگە مۇمكىندىك بەرمەي وتىر»، - دەيدى ول.

ب. مۋسيننىڭ ايتۋىنشا، مينيسترلىك «IMEI كودتار دەرەكقورىن» كەدەن قىزمەتىنىڭ جۇيەسىمەن ينتەگراتسيالاۋدى جانە ابونەنتتەردى تىركەۋ كەزىندە بيومەتريانى قولدانۋدى جوسپارلاپ وتىر.

«قازىردىڭ وزىندە ىشكى ىستەر مينيسترلىگىمەن بىرلەسىپ، ۇرلانعان تەلەفونداردىڭ IMEI كودتارىن تەكسەرۋگە بولادى»، - دەيدى ۆەدومستۆو باسشىسى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى