ءۇش ايدا 100 دەن كوپ بانكتىك اۋدارىم العاندار تاۋەكەل ايماعىنا تۇسەدى - كوميتەت
وسىعان وراي مەملەكەتتىك كىرىستەر كوميتەتى قازاقستاندىقتار ورىنداۋى ءتيىستى مىندەتتەمەلەرىن ەسكەرتتى، دەپ حابارلايدى قازاقپارات ءتىلشىسى.
«بانكتەر جىلدام اۋدارىمداردى ەنگىزۋمەن ادامداردىڭ موبيلدى قارجىلىق وپەراتسيالارعا قول جەتىمدىلىگىن جاقسارتتى جانە كەڭەيتتى. دەگەنمەن، تەك قاراپايىم ازاماتتارعا ارنالعان جىلدام اۋدارىمدار كاسىپكەرلىك قىزمەتتە كەڭىنەن قولدانىلا باستادى. ءۇش اي قاتارىنان 100 جانە ودان دا كوپ ءارتۇرلى ادامنان اۋدارىم العاندار تاۋەكەل ايماعىنا تۇسەدى. ولار تۋرالى مالىمەتتەر ق ر مەملەكەتتىك كىرىستەر كوميتەتىنە بەرىلەتىن بولادى. ءوز كەزەگىندە جەكە تۇلعا تىركەۋ ەسەبىنە تۇرىپ، سالىقتاردى اۋدارا باستاۋعا نەمەسە وسى قاراجاتتىڭ پايدا بولۋىن تۇسىندىرۋگە مىندەتتى بولادى. تولەنگەن سالىقتار مەكتەپ سالۋ، زەينەتاقى تولەمدەرى، كوپبالالى انالارعا كومەك كورسەتۋ، ەلدى اباتتاندىرۋ سياقتى الەۋمەتتىك ماڭىزدى قاجەتتىلىكتەرگە جۇمسالادى»، - دەلىنگەن ق ر مەملەكەتتىك كىرىستەر كوميتەتىنىڭ حابارلاماسىندا.
كاسىپكەرلىك قىزمەتتى جۇزەگە اسىرۋدان تابىس الۋ بەلگىلەرى بار وپەراتسيالارعا جاتقىزۋ ولشەم شارتتارىنا ءبىر جەكە تۇلعانىڭ قاتارىنان كۇنتىزبەلىك ءۇش ايدىڭ ءارقايسىسى ىشىندە 100 جانە ودان دا كوپ ءارتۇرلى تۇلعالاردان كاسىپكەرلىك قىزمەتتى جۇزەگە اسىرۋعا ارنالماعان بانك شوتىنا اقشا قاراجاتىن الۋى جاتادى.
سالىق كودەكسى اياسىندا 2025-جىلعا دەيىن ەكىنشى دەڭگەيدەگى بانكتەر قولدا بار ساناتتاردى تولىقتىرا وتىرىپ، جەكە تۇلعالاردىڭ مىناداي ساناتتارى بويىنشا مالىمەتتەردى مەملەكەتتىك كىرىستەر ورگاندارىنا كەزەڭ-كەزەڭىمەن بەرەدى:
1-كەزەڭ (2022-جىلعى 1- قاڭتاردان 2023-جىلعى 1- قاڭتارعا دەيىن) - مەملەكەتتىك قىزمەتشىلەر مەن ولاردىڭ جۇبايلارى، سونداي-اق ولارعا تەڭەستىرىلگەن ادامدار جانە ولاردىڭ جۇبايلارى؛
2-كەزەڭ (2023-جىلعى 1- قاڭتاردان 2024-جىلعى 1- قاڭتارعا دەيىن) - بيۋجەت سالاسىنىڭ قىزمەتكەرلەرى جانە ولاردىڭ جۇبايلارى، سونداي-اق كۆازيمەملەكەتتىك سەكتور سۋبەكتىلەرىنىڭ قىزمەتكەرلەرى جانە ولاردىڭ جۇبايلارى؛
3-كەزەڭ (2024-جىلعى 1- قاڭتاردان 2025-جىلعى 1- قاڭتارعا دەيىن) - زاڭدى تۇلعالاردىڭ باسشىلارى، قۇرىلتايشىلارى (قاتىسۋشىلارى) جانە ولاردىڭ جۇبايلارى، جەكە كاسىپكەرلەر جانە ولاردىڭ جۇبايلارى؛
4-كەزەڭ (2025-جىلعى 1- قاڭتاردان باستاپ) - حالىقتىڭ قالعان بارلىق ساناتتارى.
2023-جىلى ەكىنشى دەڭگەيدەگى بانكتەر جانە بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمدار ءبىرىنشى كەزەڭنەن باستاپ تۇلعالار بويىنشا مالىمەتتەر بەرۋدى جوسپارلايدى.
مەملەكەتتىك كىرىستەر كوميتەتى بۇيرىق جەكە تۇلعالاردىڭ، ادال سالىق تولەۋشىلەردىڭ جەكە اۋدارىمدارىنا اسەر ەتپەيتىنىن اتاپ ءوتتى. بۇل ءىس-شارا سالىق مونيتورينگىن جۇرگىزۋ كەزىندە تيىمدىلىكتى ارتتىرۋعا، ق ر زاڭناماسىنىڭ نورمالارىن ساقتاۋعا جانە سالىق تولەۋدەن جالتارۋدان بولاتىن زالالدىڭ الدىن الۋعا باعىتتالعان.
