رەسەيدە روزا باعلانوۆانىڭ 100 جىلدىعىنا ارنالعان مەرەكەلىك ءىس-شارالار ءوتىپ جاتىر
وسى داتاعا وراي ەلدە اۋقىمدى ءىس-شارالار - كونسەرتتەر، كورمەلەر، وعان ارنالعان فيلمدەردىڭ تانىستىرىلىمى مەن كورسەتىلىمى ت. ب. كورەرمەن نازارىنا ۇسىنىلىپ كەلەدى.
حالىقتىڭ سۇيىكتى ءانشىسىنىڭ مەرەيتويى رەسەيدە دە تويلانىپ جاتىر، دەپ حابارلايدى قازاقپارات ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
بۇگىن رەسەي استاناسى ماسكەۋ قالاسىندا فوتوكورمە اشىلىپ مەرەكەلىك كونسەرت ءوتتى. ءىس-شاراعا قازاقستاننىڭ مادەنيەت جانە سپورت ءمينيسترى داۋرەن ابايەۆ، زيالى قاۋىم مەن قازاق دياسپوراسىنىڭ وكىلدەرى قاتىستى.
«وسىنداي ءىرى ءىس-شارالار قازاقستاندا عانا ەمەس، باسقا ەلدەردە دە وتكىزىلىپ جاتقانى قۋانتادى. مۇنداعى فوتوسۋرەتتەردىڭ ءارقايسىسى روزا باعلانوۆانىڭ ماعىنالى ءومىرىنىڭ جارقىن ساتتەرىن عانا ەمەس، سونىمەن بىرگە بۇكىل ءداۋىردىڭ ورلەۋىن دە بەينەلەيدى»، - دەدى مينيستر داۋرەن ابايەۆ حالىق شارۋاشىلىعى جەتىستىكتەرىنىڭ كورمەسى الاڭىندا وتكەن كورمەنىڭ اشىلۋى اياسىندا.
فوتوكورمەدە ءارتيستىڭ ءومىرى مەن شىعارماشىلىعىنىڭ ءارتۇرلى قىرىن تانىتاتىن 30 دان استام بىرەگەي فوتوسۋرەت قويىلعان. كورمە 7 بولىمنەن تۇرادى: «ءبىرىنشى روزا»، «سوعىس جىلدارىنداعى ەرلىك پەن داڭق»، «شىعارماشىلىق شىڭى»، «ءار ءان - جاۋھار»، «بۇكىل الەمدى جاۋلاپ العان روزا»، «قوعامدىق-ساياسي قىزمەت» جانە «حالىق سۇيىسپەنشىلىگىنە بولەنگەن جارقىن ءومىر».
داۋرەن ابايەۆتىڭ ايتۋىنشا، ءانشىنىڭ 100 جىلدىعى يۋنەسكونىڭ اتاۋلى كۇندەر كۇنتىزبەسىنە ەنگەن، ال قازان ايىندا ۇيىمنىڭ شتاب- پاتەرىندە ر. باعلانوۆانىڭ قۇرمەتىنە ۇلكەن كونسەرت جوسپارلانعان. سونداي-اق، قاراشا ايىندا قازاقستان استاناسىندا حالىقارالىق ۆوكاليستەر بايقاۋى وتەدى.
«روزا باعلانوۆا - ءداۋىر سيمۆولى جانە حالىقتىڭ سۇيىكتىسى. قازالى وڭىرىنەن شىققان تۋما تالانتتىڭ قازاق حالقىنىڭ مۋزىكاسى مەن قازاقستان كومپوزيتورلارىنىڭ شىعارماشىلىعىن ەلىمىزدەن تىسقارى جەرلەرگە تانىمال ەتۋگە جانە تانىتۋعا قوسقان زور ۇلەسىن ايتپاي كەتۋ مۇمكىن ەمەس. روزا باعلانوۆا ەكىنشى دۇنيەجۇزىلىك سوعىس جىلدارىندا كونتسەرتتىك بريگادا قۇرامىندا قىزىل ارميا جاۋىنگەرلەرىنىڭ الدىندا ءان ايتىپ، مايدان دالاسىنان جارالانعانداردى الىپ شىقتى. بەيبىت ۋاقىتتا دا روزا ءتاجىباي قىزى بۇكىل الەمگە كونتسەرتتەرمەن ونەر كورسەتتى، قوعامدىق ىستەرمەن بەلسەندى اينالىستى، قايىرىمدىلىق شارالارىنا قاتىستى»، - دەپ اتاپ ءوتتى داۋرەن ابايەۆ مەرەكەلىك كونسەرتتە.
ايتا كەتەيىك، كونتسەرتتىك باعدارلاما اياسىندا روزا رىمبايەۆا، ايگۇل ۇلكەنبايەۆا، ءمادينا ءسادۋاقاسوۆا، رۋھيا بايدۇكەنوۆا جانە باسقا دا وتاندىق تانىمال ارتيستەر ونەر كورسەتتى.
