تاياۋدا وقۋلىقتاردىڭ 100 پايىزى سيفرلىق فورماتتا بولادى - باعدات مۋسين

بۇل تۋرالى باعدارلاماشىلاردى مەرەكەسىمەن قۇتتىقتاعان سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ءوزىنىڭ Facebook-تەگى رەسمي پاراقشاسىندا جازدى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسى بويىنشا ءبىز ارتىق بيۋروكراتيانى جويا وتىرىپ، 175 بيزنەس- ۇدەرىستى جەتىلدىردىك. ال، 2025-جىلعا دەيىن ءبىز 5 مىڭ بيزنەس-پروتسەسكە تولىق رەينجينيرينگ جاسايتىن بولامىز.

بۇگىنگى كۇنى مەملەكەتتىك قىزمەتتەردىڭ %94 ونلاين تۇردە قولجەتىمدى. ونىڭ ىشىندە 25 قىزمەت پرواكتيۆتى فورماتتا كورسەتىلەدى. ەڭ سۇرانىسقا يە مەملەكەتتىك قىزمەتتەر سمارتفونداردا قول جەتىمدى جانە وتكەن جىلمەن سالىستىرعاندا ولاردى پايدالانۋ 17,5 پايىزعا ارتقان. سونىمەن قاتار، ءبىز حالىققا قىزمەت كورسەتۋ ورتالىقتارىن جاڭعىرتۋدى باستادىق. قازىردىڭ وزىندە 8 جاڭا فرونت-وفيس جۇمىس ىستەپ تۇر»، - دەپ جازدى مينيستر.

باعدات مۋسيننىڭ مالىمەتىنشە، «ehealth» ەلەكتروندى دەنساۋلىق ساقتاۋ جۇيەسىن قۇرۋ جۇمىستارى جۇرگىزىلۋدە. ول ازاماتتارعا قىزمەت كورسەتۋ ورنىنا قاراماستان، سىرقاتىنىڭ تاريحى مەن بارلىق دياگنوزدارىن ءبىر بازادا توپتاستىراتىن ۇلتتىق دەنساۋلىق پاسپورتىن قالىپتاستىرۋعا مۇمكىندىك بەرمەك.

«اۋىلدىق مەكتەپتەر ينتەرنەت- ينفراقۇرىلىمىمەن تولىق قامتاماسىز ەتىلگەن. ءبىراق بۇل تۇرعىدا ءالى دە بەلسەندى تۇردە جۇمىس ىستەۋ كەرەكپىز. وقۋشىلار مەن مۇعالىمدەر ينتەرنەتتى وقۋ پروتسەسىندە پايدالانا الۋى ءۇشىن مەكتەپىشىلىك ينتەرنەتتى تاراتۋ جەلىلەرىن دامىتۋ قاجەت. جاقىن ارادا وقۋلىقتاردىڭ 100 پايىزى سيفرلاندىرىلاتىن بولادى جانە كوپتەگەن كىتاپتاردى الىپ ءجۇرۋ قاجەتتىلىگى بىرتىندەپ جويىلاتىن بولادى» , - دەپ ءمالىم ەتتى باعدات مۋسين.

مينيستر جۇمىستاردىڭ ناتيجەسىن بايانداي كەلە، ارىپتەستەرىن بۇگىنىگى باعدارلاماشىلار كۇنىمەن قۇتتىقتادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى