اتىراۋلىق شەبەر نۇرلىبەك بيسەمبايەۆ ايىنا 100 دومبىرا جاسايدى

اتىراۋ قالاسىنا تاياۋ ورنالاسقان بەرەكە اۋىلىندا تۇراتىن نۇرلىبەك بيسەمبايەۆتىڭ ماماندىعى - دومبىراشى. ماماندىعىن قازاقتىڭ ۇلتتىق اسپابىمەن بايلانىستىرعان ول الدىمەن د. نۇرپەيىسوۆا اتىنداعى حالىق مۋزىكاسى اكادەمياسى جانىنداعى مۋزىكا كوللەدجىن بىتىرگەن. كەيىن ح. دوسمۇحامەدوۆ اتىنداعى اتىراۋ ۋنيۆەرسيتەتىنەن جوعارى ءبىلىم العان.

«بالا كەزىمنەن دومبىراعا قىزىعۋشىلىعىم وياندى. جوعارى ءبىلىم العاننان كەيىن بەرەكە اۋىلىنداعى مەكتەپتە دومبىرا كلاسىن اشىپ، بالالارعا ءدارىس بەردىم. قولىم بوساعان ساتتە دومبىرا جاساۋدى قولعا الدىم. قازىر تاپسىرىس ەلىمىزدىڭ ءار وڭىرىنەن تۇسەدى. ويتكەنى، بالالاردىڭ ساپالى دومبىرادا ويناعانىن قالادىم. ۇلتتىق اسپاپتىڭ داۋىسى كۇمبىرلەپ، تازا شىعۋى كەرەك. ال، بازارلار مەن وزگە ساۋدا ورىندارىندا ساتىلاتىن اسپاپتاردىڭ ساپاسى كوڭىلدەن شىقپايدى»، - دەيدى نۇرلىبەك بيسەمبايەۆ.

ونىڭ ايتۋىنشا، اكەسى دومبىرا جاساۋمەن اينالىسقان. ءوزى دومبىرا جاساۋدى اكەسىنەن ۇيرەنگەن.

«اكەمنىڭ قولونەردەگى جولىن جالعاستىرۋدى ماقسات ەتتىم. ءسويتىپ، دومبىرانى جاساۋعا بەت بۇردىم. قازىر العاشقى جاساعان تۋىندىم سارايشىق اۋىلىنداعى مۋزەيدە تۇر. دومبىرا جاساۋدى مەڭگەرگەن سوڭ، شەبەرحانا اشتىم. قازىر دومبىرا جاساۋدى كاسىبىمە اينالدىردىم»، - دەيدى جەرگىلىكتى شەبەر.

نۇرلىبەك بيسەمبايەۆ كاسىبىن باستاۋ ءۇشىن مەملەكەتتىك باعدارلاما ارقىلى جەڭىلدەتىلگەن نەسيە العان. سول قارجىعا ستانوكتار مەن قاجەتتى ماتەريالداردى ساتىپ، شەبەرحانا اشقان.

«قازىر شەبەرحانادا ايىنا 100 گە جۋىق دومبىرا جاسايمىز. دومبىرا جاساۋعا اعالارىم كومەكتەسەدى. بىرنەشە ادامدى جۇمىسقا الدىم. الماتىدان ۇيەڭكى، قاراعاي، قارا اعاش، قىزىل اعاشتى تاپسىرىسپەن الدىرامىن. ءبىز جاساعان دومبىرانىڭ باعاسى ماتەريالى مەن جاسالۋى كۇردەلىلىگىنە بايلانىستى بولادى. ۇلتتىق اسپاپتىڭ باعاسى 20 مىڭ تەڭگەدەن باستالادى. كاسىبي دومبىراشىلار قىمبات دومبىراعا تاپسىرىس بەرەدى»، - دەيدى نۇرلىبەك بيسەمبايەۆ.

ول بولاشاقتا دومبىرا شەبەرحاناسىن كەڭيتىپ، ايىنا 5 مىڭ جاساۋدى كوزدەپ وتىر. بۇل ءۇشىن قوسىمشا ستانوكتار ساتىپ الماق.

«مەنىڭ ماقساتىم - كوپ اقشا تابۋ ەمەس، ساپالى ۇلتتىق اسپاپ جاساۋ. ءوزىم دومبىراشى بولعاندىقتان، دومبىرانىڭ دىبىسىن بىردەن اجىراتامىن. سول سەبەپتەن، دومبىرا جاساۋ كەزىندە بۇعان ەرەكشە نازار اۋدارامىن. ەڭ باستىسى، مۋزىكا مەكتەپتەرىندەگى بالالار ساپالى اسپاپتا ويناۋدى ۇيرەنۋى كەرەك»، - دەيدى شەبەر.

ەسكە سالا كەتەلىك، بۇدان بۇرىن اتىراۋلىق شەبەر يلونا كيم شايىردان ءتۇرلى بۇيىم جاسايتىنىن حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى