نۇر-سۇلتاندا ناۋرىز مەيرامىنا وراي 100-دەن استام ءىس- شارا وتەدى
نۇر-سۇلتان قالاسىنىڭ اكىمدىگى قازاقپارات تىلشىسىنە ناۋرىز مەرەكەسىندە ەلوردادا قانداي شارالار وتەتىنى تۋرالى اقپارات بەردى. اكىمدىك مالىمەتى بويىنشا، ناۋرىز مەرەكەسىنە وراي قالادا 100-دەن استام ءىس- شارا وتەدى.
«قالا تۇرعىندارى كونسەرتتەرگە، مەرەكەلىك باعدارلامالارعا، كورمەلەرگە، قويىلىمدارعا، ۇلتتىق سپورت تۇرلەرى بويىنشا جارىستارعا، سەرۋەنگە جانە ت. ب. قاتىسا الادى»، - دەپ جازىلعان اكىمدىكتىڭ جولداعان جاۋابىندا.
18-19-ناۋرىزدا قالادا الەۋمەتتىك از قامتىلعان، كوپبالالى وتباسىلارعا، جالعىز باستى قارت ادامدارعا جانە حالىقتىڭ الەۋمەتتىك وسال توپتارىنىڭ باسقا دا ساناتتارىنا ازىق- تۇلىك سەبەتتەرىن تاراتۋ جوسپارلانۋدا.
سونىمەن قاتار، 19-ناۋرىز كۇنى ساعات 11:00-دە ەلوردانىڭ دوستىق ءۇيى الاڭىندا قازاقستان حالقى اسسامبلەياسى قالا تۇرعىندارى ءۇشىن «قوش كەلدىڭ، ءاز ناۋرىز!» ءىس-شاراسىن وتكىزەدى. قوناقتاردى كونسەرتتىك باعدارلاما، قولدانبالى ونەر بويىنشا ماستەر-كلاستار، جارمەڭكە جانە ۇلتتىق سپورتتىق ويىندار بويىنشا جارىستار كۇتەدى. دوستىق ۇيىندە كيىز ۇيلەر مەن التىباقان ورناتىلىپ، ناۋرىز كوجە دايىندالادى. كيىز ۇيلەردىڭ ىشىندە ەلوردالىق ەتنومادەني بىرلەستىكتەردىڭ ۇلتتىق ناقىشتاعى ەكسپوزيتسيالارى قويىلادى.
سونداي-اق، ءاربىر كيىز ۇيدە قولدانبالى ونەر بويىنشا شەبەرلىك سىنىپتارى كورسەتىلەدى. ساعات 12.00-دە «بۇقا تارتىس»، «اسىق اتۋ»، «گىر كوتەرۋ»، «قازاقشا كۇرەس»، «قول كۇرەس» سياقتى ۇلتتىق سپورت جارىستارى باستالادى. جارىس جەڭىمپازدارىنا اقشالاي سىيلىقتار بەرىلەدى. ەلوردانىڭ ەتنومادەني ورتالىقتارى، كاسىبي، كوركەم ۇجىمدارى كونتسەرتتىك باعدارلاما ۇسىنباق.
18-31-ناۋرىز ارالىعىندا قۋىرشاق تەاترى «ناۋرىز- دۋمان» قۋىرشاقتار شوۋىنا شاقىرادى. قويىلىمداردىڭ باستالۋ ۋاقىتى: 10:00، 12:00، 14:00 جانە 16:00. قالانىڭ ورتالىقتاندىرىلعان كىتاپحانا جۇيەسى دە مەرەكەدەن تىس قالعان جوق. قالالىق كىتاپحانالار كۇن سايىن ناۋرىز مەيرامىنا وراي ءىس- شارالار وتكىزەدى.
19-ناۋرىزدا №3-بۇقارالىق كىتاپحانادا «ۇلىستىڭ ۇلى كۇنى ناۋرىز» اڭگىمە- ويىنىن، №2-بۇقارالىق كىتاپحانادا «نۇر سەبەلە - ۇلىستىڭ ۇلى كۇنى» مەرەكەلىك كەشىن، №10-بۇقارالىق كىتاپحانادا «قازاقشا ستيلدەگى دەفيلە» تاريح ساعاتىن، №15-بۇقارالىق كىتاپحانادا «ۇلىستىڭ ۇلى كۇنى - ءاز ناۋرىز!» كىتاپ كورمەسىن ۇيىمداستىرۋ جوسپارلانۋدا.
«ساكەن سەيفۋللين مۇراجايى وسى اپتادا الەۋمەتتىك جەلىلەردە ناۋرىز مەيرامى مەن قازاق ۇلتتىق داستۇرلەرىنە ارنالعان ونلاين- ءىس- شارالار وتكىزەدى»، - دەپ جازادى اكىمدىك ماماندارى. جوسپار بويىنشا ناۋرىز مەيرامىن قالانىڭ ءتورت اۋدانىنداعى 20-دان استام ورىندا تويلاۋ كوزدەلىپ وتىر. 22-ناۋرىزدا ساعات 11:00-دەن 15:00-گە دەيىن بارلىق اۋداندا، سونىڭ ىشىندە ەلوردانىڭ ەلدى مەكەندەرىندە «ناۋرىز دۋمان 2022» مادەني-بۇقارالىق ءىس- شارالار ۇيىمداستىرىلادى.
«ءىس- شارادا ۆەدومستۆولىق باعىنىستى ۇيىمداردىڭ ارتىستەرى مەن شىعارماشىلىق ۇجىمداردىڭ قاتىسۋىمەن كونسەرتتىك باعدارلاماسى، ءتۇرلى كوستيۋم كيگەن كەيىپكەرلەر مەن قۋىرشاقتار شوۋىنىڭ باعدارلاماسى قاراستىرىلعان. سونداي-اق، جينالعان جۇرت ۇلتتىق سپورت تۇرلەرى بويىنشا جارىستارعا قاتىسا الادى، ونىڭ ىشىندە - ارقان تارتۋ، اسىق اتۋ، توعىز قۇمالاق جانە ت. ب. بۇل كۇنى مەرەكەنىڭ باستى بەلگىسى - ناۋرىز كوجە ۇلتتىق تاعامى دا جۇرتشىلىققا تاراتىلادى»، - دەيدى اكىمدىك وكىلدەرى.
الماتى اۋدانىندا مەرەكەلىك ءىس-شارا «قازاق ەلى» مونۋمەنتى الاڭىندا، «ستۋدەنتتەر» ساياباعىندا، بايقوڭىر اۋدانىندا - «اتاتۇرىك» ساياباعىندا، جازۋشىلار اللەياسىندا، ەسىل اۋدانىندا - ەكسپو اۋماعىندا جانە ۇركەر ەلدى مەكەنىندە، سارىارقا اۋدانىندا - «كوكتال» ساياباعىندا جانە Demalys Promenade الاڭىندا وتەدى.
ناۋرىز دۋمانى ەلوردادا 25-ناۋرىزعا دەيڭن جالعاساتىن ءتۇرى بار. سەبەبى 25-ناۋرىزدا ەلوردانىڭ مەملەكەتتىك اكادەميالىق فيلارمونياسىندا «ناۋرىز سىيى» ۇلتتىق سىيلىعىنىڭ قورىتىندى شاراسى وتەدى.
سونىمەن قاتار، 18-22-ناۋرىز ارالىعىندا ارناساي كوشەسى، 109 بويىنداعى ساۋدا پاۆيلونىنىڭ اۋماعىندا ناۋرىز مەرەكەسىنە وراي ۇلكەن اۋىل شارۋاشىلىعى جارمەڭكەسى ۇيىمداستىرىلادى. بۇل جەردەن تۇرعىندارىزدەگەن ءونىمىن بازار باعاسىنان %15 ارزانعا ساتىپ الا الادى.
