ەلوردادا ناۋرىز مەيرامىنا وراي 100 دەن استام ءىس-شارا وتەدى
قالا تۇرعىندارى كونسەرتتەرگە، مەرەكەلىك باعدارلامالارعا، كورمەلەرگە، قويىلىمدارعا، ۇلتتىق سپورت تۇرلەرى بويىنشا جارىستارعا، سەرۋەنگە جانە ت. ب. قاتىسا الادى، دەپ حابارلايدى قازاقپارات نۇر-سۇلتان اكىمدىگىنىڭ رەسمي سايتىنا سىلتەمە جاساپ.
قالانىڭ ءتورت اۋدانىندا ناۋرىز مەيرامى اتاپ وتىلەتىن 20 دان استام ورىن انىقتالدى.
22- ناۋرىزدا ساعات 11:00 دەن 15:00 گە دەيىن بارلىق اۋداندا، سونىڭ ىشىندە ەلوردانىڭ ەلدى مەكەندەرىندە «ناۋرىز دۋمان 2022» مادەني-بۇقارالىق ءىس-شارالار ۇيىمداستىرىلادى. ءىس-شارادا ۆەدومستۆولىق باعىنىستى ۇيىمداردىڭ ارتىستەرى مەن شىعارماشىلىق ۇجىمداردىڭ قاتىسۋىمەن كونسەرتتىك باعدارلاماسى، ءتۇرلى كوستيۋم كيگەن كەيىپكەرلەر مەن قۋىرشاقتار شوۋىنىڭ باعدارلاماسى قاراستىرىلعان.
سونداي-اق، جينالعان جۇرت ۇلتتىق سپورت تۇرلەرى بويىنشا جارىستارعا قاتىسا الادى، ونىڭ ىشىندە - ارقان تارتۋ، اسىق اتۋ، توعىز قۇمالاق جانە ت. ب.
بۇل كۇنى مەرەكەنىڭ باستى بەلگىسى - ناۋرىز كوجە ۇلتتىق تاعامى دا جۇرتشىلىققا تاراتىلادى. الماتى اۋدانىندا مەرەكەلىك ءىس-شارا «قازاق ەلى» مونۋمەنتى الاڭىندا، «ستۋدەنتتەر» ساياباعىندا، بايقوڭىر اۋدانىندا - «اتاتۇرىك» ساياباعىندا، جازۋشىلار اللەياسىندا، ەسىل اۋدانىندا - ەكسپو اۋماعىندا جانە ۇركەر ەلدى مەكەنىندە، سارىارقا اۋدانىندا - «كوكتال» ساياباعىندا جانە Demalys Promenade الاڭىندا وتەدى.
سونىمەن قاتار، 18-19- ناۋرىزدا قالادا الەۋمەتتىك از قامتىلعان، كوپبالالى وتباسىلارعا، جالعىز باستى قارت ادامدارعا جانە حالىقتىڭ الەۋمەتتىك وسال توپتارىنىڭ باسقا دا ساناتتارىنا ازىق-تۇلىك سەبەتتەرىن تاراتۋ جوسپارلانۋدا.
ال، 19- ناۋرىز كۇنى ساعات 11:00 دە ەلوردانىڭ دوستىق ءۇيى الاڭىندا قازاقستان حالقى اسسامبلەياسى قالا تۇرعىندارى ءۇشىن «قوش كەلدىڭ، ءاز ناۋرىز!» ءىس-شاراسىن وتكىزەدى. قوناقتاردى كونسەرتتىك باعدارلاما، قولدانبالى ونەر بويىنشا ماستەر-كلاستار، جارمەڭكە جانە ۇلتتىق سپورتتىق ويىندار بويىنشا جارىستار كۇتەدى.
دوستىق ۇيىندە كيىز ۇيلەر مەن التىباقان ورناتىلىپ، ناۋرىز كوجە دايىندالادى. كيىز ۇيلەردىڭ ىشىندە ەلوردالىق ەتنومادەني بىرلەستىكتەردىڭ ۇلتتىق ناقىشتاعى ەكسپوزيتسيالارى قويىلادى. سونداي-اق، ءاربىر كيىز ۇيدە قولدانبالى ونەر بويىنشا شەبەرلىك سىنىپتارى كورسەتىلەدى.
ساعات 12.00 دە بەس باعىت بويىنشا ۇلتتىق سپورتتىق جارىستار باستالادى: «بۇقا تارتىس»، «اسىق اتۋ»، «گىر كوتەرۋ»، «قازاقشا كۇرەس»، «قول كۇرەس».
جارىس قورىتىندىسى بويىنشا جەڭىمپازدارعا اقشالاي سىيلىقتار بەرىلەدى. كونسەرتتىك باعدارلامامەن ەلوردانىڭ ەتنومادەني ورتالىقتارىنىڭ كاسىبي، كوركەم ۇجىمدارى ونەر كورسەتەدى.
18-31- ناۋرىز ارالىعىندا قۋىرشاق تەاترى «ناۋرىز-دۋمان» قۋىرشاقتار شوۋىنا شاقىرادى.
قويىلىمداردىڭ باستالۋ ۋاقىتى: 10:00، 12:00، 14:00 جانە 16:00.
قالانىڭ ورتالىقتاندىرىلعان كىتاپحانا جۇيەسى دە مەرەكەدەن تىس قالعان جوق. قالالىق كىتاپحانالار كۇن سايىن ناۋرىز مەيرامىنا وراي ءىس-شارالار وتكىزەدى.
17- ناۋرىزدا 3№ بالالار كىتاپحاناسى «جاساي بەر، ءاز ناۋرىز» اقپارات ساعاتىن، ال 4№ بالالار كىتاپحاناسى - «كوڭىل كوتەرەمىز ناۋرىز مەرەكەسىن قارسى الامىز» مەرەكەلىك كالەيدوسكوپىن، سونداي-اق «ناۋرىز - بىرلىك، بەيبىتشىلىك جانە جاڭارۋ مەرەكەسى!» ءىس-شارالارىن وتكىزەدى. ءدال وسى كۇنى 5№ بۇقارالىق كىتاپحانادا «سالەم، ناۋرىز!»، ورتالىق قالالىق كىتاپحانادا - «جارقىرا، جاينا ناۋرىزىم!»، 9№ بۇقارالىق كىتاپحانادا - «ۇلىستىڭ ۇلى كۇنى ناۋرىز» كەشى ۇيىمداستىرىلادى.
18- ناۋرىزدا 2№ بالالار كىتاپحاناسىندا «اتا-بابا ءداستۇرلى- ادەپتىلىك نەگىز» اتتى مەرەكەلىك كەزدەسۋ، 4№ بۇقارالىق كىتاپحانادا «ناۋرىز دۋمان» ۇلتتىق تاريح ساعاتى، 7№ بۇقارالىق كىتاپحانادا «ارمىسىڭ ءاز ناۋرىز! اق مول بولسىن!»، 8№ بالالار كىتاپحاناسىنا «ناۋرىز كەلەدى!» ءىس-شاراسى وتكىزىلەدى.
19- ناۋرىزدا 3№ بۇقارالىق كىتاپحانادا « ۇلىستىڭ ۇلى كۇنى ناۋرىز» اڭگىمە-ويىنىن، 2№ بۇقارالىق كىتاپحانادا «نۇر سەبەلە - ۇلىستىڭ ۇلى كۇنى» مەرەكەلىك كەشىن، 10№ بۇقارالىق كىتاپحانادا «قازاقشا ستيلدەگى دەفيلە» تاريح ساعاتىن، 15№ بۇقارالىق كىتاپحانادا «ۇلىستىڭ ۇلى كۇنى - ءاز ناۋرىز!» كىتاپ كورمەسىن ۇيىمداستىرۋ جوسپارلانۋدا.
ساكەن سەيفۋللين مۇراجايى وسى اپتادا الەۋمەتتىك جەلىلەردە ناۋرىز مەيرامى مەن قازاق ۇلتتىق داستۇرلەرىنە ارنالعان ونلاين- ءىس-شارالار وتكىزەدى. 25- ناۋرىزدا ەلوردانىڭ مەملەكەتتىك اكادەميالىق فيلارمونياسىندا «ناۋرىز سىيى» ۇلتتىق سىيلىعى وتەدى.
جوبا تەك مادەنيەتتى عانا ەمەس، سونىمەن بىرگە ۇلتتىق بايلىقتىڭ الۋان تۇرلىلىگىن بىلدىرەتىن حالىق شەبەرلەرىنە ارنالعان. 18-22- ناۋرىز ارالىعىندا ارناساي كوشەسى، 109 بويىنداعى ساۋدا پاۆيلونىنىڭ اۋماعىندا ناۋرىز مەرەكەسىنە وراي ۇلكەن اۋىل شارۋاشىلىعى جارمەڭكەسى ۇيىمداستىرىلادى، وندا ونىمدەر بازار باعاسىنان %15 عا تومەنگە ساتىلادى.
