بيىل ارال تەڭىزىنىڭ 100 مىڭ گەكتار قۇرعاعان تابانىنا سەكسەۋىل ەگىلدى
بۇل تۋرالى ق ر ەگترم ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ مىندەتىن اتقارۋشى ەرلان قۇتپانبايەۆ ايتىپ بەردى، دەپ حابارلايدى قازاقپارات.
«عالىمداردىڭ زەرتتەۋلەرى بويىنشا، ارال تەڭىزىنىڭ قۇرعاعان تابانىنىڭ اۋدانى 4,5 ميلليون گەكتاردى قۇرايدى، ونىڭ 2,2 ميلليون گەكتارى قازاقستان اۋماعىندا ورنالاسقان. ارال تەڭىزىنىڭ جوعالۋى - قازاقستاننىڭ عانا ەمەس، بۇكىل الەمنىڭ پروبلەماسى. تەڭىزدىڭ قۇرعاۋىنا بايلانىستى جىل سايىن 100 ميلليون تونناعا دەيىن تۇز، شاڭ جانە قۇم پايدا بولادى، ولار قۇمدى جانە تۇزدى داۋىلدارمەن ەۋروپا مەن انتاركتيكاعا دا جەتۋى مۇمكىن. توپىراقتىڭ سورتاڭدانۋى مەن توزۋى، ءشولدىڭ ۇلعايۋى وسىمدىكتەر مەن جانۋارلار الەمىنىڭ دامۋىنا جانە وسى ايماقتاعى جەرگىلىكتى حالىقتىڭ دەنساۋلىعىنا كەرى اسەرىن تيگىزەدى.
مەملەكەت باسشىسىنىڭ ارال تەڭىزىنىڭ قۇرعاعان تابانىنا سەكسەۋىل كوشەتتەرىن وتىرعىزۋ تاپسىرماسىن ورىنداۋ شەڭبەرىندە 2025-جىلعا دەيىن تەڭىز تابانىنداعى 1,1 ميلليون گەكتار القاپقا سەكسەۋىل وتىرعىزۋدىڭ قادامدىق كەستەسى ازىرلەنىپ، بەكىتىلدى. بيىل سەكسەۋىل كوشەتتەرى 100 مىڭ گ ا القاپتا جۇرگىزىلدى، 2022-2025-جىلدارى جىل سايىن 250 مىڭ گەكتارعا ەگىزىپ وتىرادى»، - دەدى ەرلان قۇتپانبايەۆ.
مەملەكەت باسشىسىنىڭ تاپسىرماسىن جۇزەگە اسىرۋ ءۇشىن مينيسترلىك ورمان ءوسىرۋ جۇمىستارىن ۇيلەستىرۋ شتابىن جانە رەسپۋبليكالىق كوميسسيانى قۇرعان. قازىرگى ۋاقىتتا 100 مىڭ گەكتار القاپقا سەكسەۋىل وتىرعىزۋ بويىنشا 2021-جىلعى جوسپار تولىق ورىندالدى، ونىڭ ىشىندە 64 مىڭ گەكتار القاپ كوشەتتەرى مينيسترلىك كۇشىمەن، 36 مىڭ گەكتار القاپ - قىزىلوردا وبلىسى اكىمدىگىنىڭ كۇشىمەن جۇرگىزىلگەن.
جالپى فيتوورمانمەليوراتسيالىق جۇمىستاردى جۇرگىزۋ كەزىندە ورمان شارۋاشىلىعى جانە جانۋارلار دۇنيەسى كوميتەتىنىڭ «رەسپۋبليكالىق ورمان سەلەكتسيالىق-تۇقىم ءوسىرۋ ورتالىعى» ر م ق ك قىزمەتكەرلەرى جانە وبلىس اكىمدىگىنىڭ ورمان شارۋاشىلىعى مەكەمەلەرى دايىنداعان 230 توننا سەكسەۋىل تۇقىمى جۇمسالدى. سونداي-اق، تۇقىم دايىنداۋ ءۇشىن ماۋسىمدىق جۇمىسقا 718 ادام قابىلداندى، مەحانيكالاندىرىلعان ەگىستىكتى جۇرگىزۋ ءۇشىن 51 ادام جۇمىلدىرىلعان.
«اەروەگۋ بويىنشا بيىلعى جوسپاردى ۋاقىتىلى ورىنداۋ ءۇشىن قىركۇيەكتەن جەلتوقسان ايىنا دەيىن ارالدىڭ قۇرعاعان تابانىنا 35 دانا تەحنيكا جۇمىلدىرىلدى. ونىڭ ىشىندە: 15 دانا ت-150 تراكتورى، جانار-جاعارماي مەن اۋىز سۋدى تاسىمالداۋعا ارنالعان 6 جۇك اۆتوماشيناسى، جۇمىسشىلاردى تاسىمالداۋعا ارنالعان 4 جوعارى ءوتىمدى اۆتوماشينا، 6 ۆاگون جانە 4 موتوتسيكل بار. سونداي-اق، 2022-جىلى اەروەگۋ وتكىزۋ ءۇشىن جالپى اۋدانى 64 مىڭ گەكتار توپىراق دايىندالدى»، - دەيدى ەرلان قۇتپانبايەۆ.
قازىرگى ۋاقىتتا مينيسترلىك حالىقارالىق دونورلاردى، ونىڭ ىشىندە دۇنيەجۇزىلىك بانكتى، حالىقارالىق ىنتىماقتاستىق جونىندەگى گەرمانيا قوعامىن (GIZ)، ا ق ش حالىقارالىق دامۋ جونىندەگى اگەنتتىگىن (USAID) جانە باسقا دا حالىقارالىق ۇيىمداردى ارالدىڭ قۇرعاعان تابانىنا توپىراق- ىزدەستىرۋ جانە كونسۋلتاتسيالىق جۇمىستار جۇرگىزۋ، قىزىلوردا وبلىسىنىڭ ورمان مەكەمەلەرىنىڭ ماتەريالدىق-تەحنيكالىق بازاسىن نىعايتۋ بولىگىنە تارتۋ جۇمىستارىن جۇرگىزىپ جاتىر.
