اتىراۋ وبلىسىنا رەسەيدەن 100-دەن استام كولىك جالعان قۇجاتپەن اكەلىنگەن

وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى، پوليتسيا پولكوۆنيگى بەرىك امانگەلدىنىڭ ايتۋىنشا، رەسەيدەن اكەلىنگەن كولىك قۇجاتىنىڭ 3 كولىككە تيەسىلى ەكەنى انىقتالعان.

«اتىراۋ وبلىسىنىڭ اۋماعىندا 8 - قاراشادا «قاۋىپسىز جول» جەدەل- پروفيلاكتيكالىق ءىس- شاراسى باستالدى. پاترۋلدىك پوليتسياسى قىزمەتكەرلەرى ءىس- شارانىڭ العاشقى كۇنى ساعات 17:00 شاماسىندا «اقتاۋ- اتىراۋ» تاس جولىندا جىلدامدىقتى شامادان تىس اسىرعانى ءۇشىن رەسەيدە تىركەلگەن «Toyota Ipsum» ماركالى اۆتوكولىگىن توقتاتتى. اۆتوكولىكتىڭ قۇجاتتارىن تەكسەرۋ كەزىندە تىركەۋ بەلگىسى مەن ماركاسى سايكەس كەلمەيتىنى انىقتالدى. كولىكتەگى مەملەكەتتىك بەلگى «Nissan Fuga» جانە «ماز» اۆتوكولىكتەرىنە دە تىركەلگەنى بەلگىلى بولدى. قازىر اتالعان دەرەككە قاتىستى قر قىلمىستىق كودەكستىڭ 386-بابىنىڭ 1-بولىگىمەن قىلمىستىق ءىس قوعالدى» - دەيدى بەرىك امانگەلدى.

ونىڭ ايتۋىنشا، وبلىس اۋماعىنا رەسەيدەن جالعان تىركەۋ نومىرىمەن جانە قۇجاتپەن اكەلىنگەن 100-دەن استام اۆتوكولىك انىقتالعان.

«مۇنداي كولىكتەردى ساتىپ العان ادامدار رەسەيدە تىركەۋدە تۇر دەپ ويلايدى. ەگەر ول سەنىمحاتپەن نەمەسە ساقتاندىرۋ ءپوليسى نەگىزىندە ساتىلسا، يەسى كولىك سالىعىن تولەمەۋ ءۇشىن كەز كەلگەن ۋاقىتتا ودان باس تارتادى. ال، قازاقستاندىق جۇرگىزۋشى جول اپاتىنا تۇسسە، ساقتاندىرۋ تولەمىن الا المايدى. سول سەبەپتەن، شەتەلدەردە تىركەۋدە تۇرعان كولىكتەردى ساتىپ الاردا اكىمشىلىك پوليتسيا نەمەسە جەرگىلىكتى پوليتسيا قىزمەتى باسقارماسىنا جۇگىنىپ، تەكسەرتىپ الۋ قاجەت» - دەيدى بەرىك امانگەلدى.

ەسكە سالا كەتەلىك، بۇعان دەيىن اتىراۋ وبلىسىندا 10 ايدا شەتەلدىك تىركەۋدەگى كولىك اپاتىنان 17 ادام قازا بولعانىن حابارلاعان ەدىك.

اۆتور: بەك مۇستافا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى