ليۆاندا 100 گە جۋىق بىتىمگەرلىك اسكەر ساربازدارى كوروناۆيرۋسقا شالدىقتى
جەكسەنبى كۇنى ب ۇ ۇ- نىڭ ليۆانداعى ۋاقىتشا اسكەري كۇشتەرى (UNIFIL) 90 ساربازدىڭ كوروناۆيرۋس جۇقتىرعانىن مالىمدەدى.
مالىمدەمەدە كوروناۆيرۋسقا شالدىققان اسكەرلەردىڭ قاي ەلدىكى ەكەنى ايتىلماعان. الايدا ولاردىڭ بارلىعى وقشاۋلاندىرىلعان. ب ۇ ۇ- نىڭ بىتىمگەرلىك كۇشتەرى ليۆاندا وسى ۇيىمنىڭ قاۋىپسىزدىك كەڭەسىنىڭ رەزوليۋتسياسىنا سايكەس 1978-جىلدان بەرى قىزمەتى ەتىپ كەلەدى.
ولاردىڭ باستى ماقساتى يزرايل- ليۆان دەماركاتسيالىق شەكاراسىنداعى جاعدايعا مونيتورينگ جۇرگىزۋ.
ميسسيا 6 اي سايىن ۋاقىتشا مانداتىن ۇزارتىپ وتىرادى. UNIFIL كۇشتەرى قۇرامىندا بۇگىندە 45 مەملەكەتتىڭ 10 مىڭنان استام ساربازى بار.
ميسسيا قۇرامىندا قازاقستاندىق اسكەريلەر دە قىزمەت ەتەدى. قازاقستاننىڭ 120 ساربازدان قۇرىلعان KAZBAT بىتىمگەرلىك باتالونى ءۇندىستاننىڭ بىتىمگەرلىك باتالونىنىڭ قۇرامىندا قىزمەت ەتەدى.
قازاقستاندىق ساربازدار، جەرگىلىكتى جاعدايدى باقىلاپ، باقىلاۋ بەكەتتەرىندە تۇرادى. اتىستى توقتاتۋ شارالارىنىڭ ورىندالۋ بارىسى مەن قارۋلى كۇشتەردىڭ جانە اسكەري تەحنيكانىڭ ورنالاسقان جەرىن باقىلايدى.
سوڭعى ۋاقىتتا ليۆاندا COVID-19 ۆيرۋسىمەن ناۋقاستانعاندار سانىنىڭ وسكەنى بايقالدى. ينفەكتسيانىڭ سالدارىنان 293 ادام قايتىس بولدى. ەلدىڭ 24 مىڭعا جۋىق تۇرعىنى كوروناۆيرۋسپەن اۋىرادى.
