ق ر پرەزيدەنتىنىڭ كومەكشىسى ايدا بالايەۆا ءبىر اپتادا 100 دەن استام ازاماتتى قابىلداعان
«مىنە، جاڭا لاۋازىمداعى جۇمىسىمنىڭ ءۇش اپتاسى ءوتتى. وسى ۋاقىت ىشىندە ءبولىمنىڭ جۇمىسىن ۇيىمداستىرۋ بويىنشا ەڭ ماڭىزدى قادامدار جاسالدى. ءبىر اپتا ىشىندە 100 دەن استام ازاماتتى جەكە قابىلدادىم. مۇنىڭ ۇلكەن ەموتسيالىق جۇگى بار»، - دەپ جازدى ايدا بالايەۆا Facebook-تەگى پاراقشاسىندا.
ونىڭ ايتۋىنشا، حالىقتى تولعاندىراتىن نەگىزگى ماسەلەلەر - تۇرعىن ءۇي، بانك نەسيەلەرى، سوت شەشىمدەرى مەن قۇقىق قورعاۋ ورگاندارىنىڭ ارەكەتتەرى.
«كوپتەگەن ادامدار قۇقىقتىق ساۋاتتىلىقتىڭ تومەن بولۋىنا بايلانىستى قيىن جاعدايعا تاپ بولىپ، جوعارى تۇرعان مەملەكەتتىك ورگاندارعا ءۇمىت ارتادى. بۇل جەردە كوتەرىلگەن ماسەلەلەردىڭ ءبارىن قىسقا مەرزىمدە شەشۋگە بولمايتىنىن ءتۇسىنۋ ماڭىزدى. بۇگىندە نۇر-سۇلتان قالاسىنىڭ اكىمدىگىندە تۇرعىن ءۇي كەزەگىندە 48 مىڭعا جۋىق ادام تۇرادى. كوبى ۇزاق جىلدار بويى كەزەكتە تۇر. سوندىقتان، ادام پرەزيدەنت اكىمشىلىگىنە جۇگىنگەندىكتەن عانا تۇرعىن ءۇي بەرۋ مۇمكىن ەمەس»، - دەپ اتاپ ءوتتى مەملەكەت باسشىسىنىڭ كومەكشىسى.
ول ءوز جازباسىندا باسپانا ماسەلەسى تۇرعىن ءۇي كەزەگى نەگىزىندە شەشىلۋ كەرەك دەگەن پىكىرىن ايتتى.
«تۇرعىندارعا پرەزيدەنت اكىمشىلىگىنىڭ سوت شەشىمىنە اسەر ەتۋگە قۇقىعى جوق ەكەنىن ءتۇسىندىرۋ ماڭىزدى. سوت شاعىمدارىن تەك جوعارعى سوت نەمەسە باس پروكۋراتۋرا عانا قاراي الادى. ءبىزدىڭ مىندەتىمىز- ساپالى قۇقىقتىق كومەك كورسەتۋ، پروبلەمالاردى شەشۋدىڭ قولايلى جولدارى مەن الگوريتمدەرىن تابۋ. وسى اپتادا مەن الماتىدان كەلگەن پروبلەمالىق يپوتەكالىق توپپەن كەزدەستىم. جوعارعى سوتتىڭ، باس پروكۋراتۋرانىڭ، ۇلتتىق بانكتىڭ جانە جوعارى بىلىكتى زاڭگەرلەردىڭ قاتىسۋىمەن ارنايى جۇمىس توبى قۇرىلدى. وسىلايشا ءارى قاراي جۇمىس ىستەيمىز» - دەپ جازعان ا. بالايەۆا جاقىن ارادا ازاماتتاردى جەكە قابىلداۋ ءۇشىن وڭىرلەردى ارالايتىنىن مالىمدەدى.
«وسىعان بايلانىستى، ءبىزدىڭ ازاماتتىق قوعامىمىزعا جانە ۇكىمەتتىك ەمەس ۇيىمدارعا حالىقتىڭ قۇقىقتىق ساۋاتتىلىعىن، مەدياتسيا ينستيتۋتتارىن دامىتۋعا بەلسەندى تۇردە جاردەمدەسۋگە شاقىرامىن. بىرلەسكەن كۇش - جىگەرىمىزبەن عانا ازاماتتار ءۇشىن دە، جەرگىلىكتى اتقارۋشى ورگاندار ءۇشىن دە ايتارلىقتاي ناتيجەلەرگە قول جەتكىزەتىنىمىزگە سەنىمدىمىن. ءبىز بىرلەسىپ جۇيەلى پروبلەمالاردى انىقتاۋعا جانە ولاردى شەشۋدىڭ وڭتايلى جولدارىن تابۋعا كومەكتەسۋىمىز كەرەك» - دەپ تۇيىندەدى ايدا بالايەۆا.
ەسكە سالساق، مەملەكەت باسشىسىنىڭ جارلىعىمەن ايدا بالايەۆا ق ر پرەزيدەنتىنىڭ كومەكشىسى - قازاقستان رەسپۋبليكاسى پرەزيدەنتى اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى بولىپ تاعايىندالعان بولاتىن.
