ارىس تۇرعىندارى 100 مىڭ تەڭگە قاراجاتتى قاشان الا الادى؟
بۇل تۋرالى بۇگىن ب ا ق وكىلدەرىمەن وتكەن بريفينگتە تۇركىستان وبلىسى اكىمىنىڭ ورىنباسارى جولدىمۇرات امانبايەۆ مالىمدەدى، دەپ حابارلايدى قازاقپارات ءتىلشىسى.
جولدىمۇرات امانبايەۆتىڭ ايتۋىنشا، ارىستىق تۇرعىندارعا 100 مىڭ تەڭگەدەن بەرۋ ءۇشىن 4 ميلليارد 478 ميلليون تەڭگە قاجەت. ونىڭ 2 ميلليارد تەڭگەسىن رەسپۋبليكالىق بيۋجەتتەن ءبولۋ قاراستىرىلىپ وتىر. قالعان 2 ميلليارد 478 ميلليون تەڭگە قاراجاتتى وبلىستىق بيۋجەتتەن ءبولۋ قاراستىرىلعان. ول قارجىلاردى بيۋجەتتەن ءبولۋ ءۇشىن وبلىستىق ءماسليحاتتى وتكىزۋ قاجەت.
«100 مىڭ تەڭگە ءبولۋ ءۇشىن ەكى اپتانىڭ ىشىندە 44 مىڭنان اسا ادام تۋرالى مالىمەت جينايمىز. سول جارىلىس بولعان كۇنى تىركەۋدە تۇرعان ازاماتتاردىڭ ءتىزىمىن جاسايمىز. ول ءۇشىن اكىمدىكتىڭ ەسىگىن توزدىرىپ قاجەتى جوق. سەبەبى، ەشكىمنەن قۇجات جينامايمىز. ول جۇمىستى ءبىز جۇيەلەپ جۇرگىزەتىن بولامىز. سول مالىمەتكە قارسى 25 ىنە دەيىن دايىنداپ بولساق دەگەن جوسپار بار. بارلىق تۇسكەن مالىمەتتى ءبىز تۇگەل تەكسەرىپ شىعامىز. وتباسىندا اكە شەشەسى مەن بەس بالاسى بار بولسا، بالالاردىڭ اتا-اناسىنان اقشانى كىمگە اۋدارۋ كەرەكتىگىن سۇرايمىز. ولار كىمنىڭ ەسەپ شوتىنا اقشانى اۋدارۋ كەرەكتىگىن وزدەرى شەشەتىن بولادى. اتا-انالاردان بۇل تۋرالى ءوتىنىش جازدىرىپ الامىز»، - دەدى وبلىس اكىمىنىڭ ورىنباسارى. جولدىمۇرات امانبايەۆتىڭ سوزىنشە، بۇل جۇمىستارعا «قازپوشتا» مەكەمەسى مەن «حالىق بانكى» جۇمىلدىرىلاتىن بولادى.
وبلىس اكىمى ورىنباسارىنىڭ ايتۋىنشا كۇنى بۇگىنگە دەيىن ارىس قالاسى تۇرعىندارىن قولداۋعا ارنالعان قورعا 1 ميلليارد 219 ميلليون تەڭگەدەن استام قاراجات ءتۇستى. بۇل قارجىدان ازىرگە ءبىر تيىن دا جۇمسالماعان.
