بالالار مەكتەپكە دەيىنگى بىلىممەن 100 پايىز قاشان قامتىلادى؟
«قازىرگى ۋاقىتتا ەلىمىزدە 10 مىڭنان اسا مەكتەپكە دەيىنگى ءبىلىم بەرۋ ۇيىمدارىنا 881 مىڭ بالا بارادى. ءبىراق كەزەكتە ءالى 118 مىڭ بالا تۇر. ەندىگى نەگىزگى ماقسات - وسى بالالاردى مەكتەپكە دەيىنگى ءبىلىم جانە تاربيەمەن 100 پايىز قامتۋ. بۇل دەڭگەيدە مەملەكەتتىك-جەكەشەلىك ارىپتەستىك تەتىگى جاقسى جۇمىس ىستەۋدە. جەكە بالاباقشالاردى جاپپاي اشۋ ءۇشىن سانيتارلىق ەرەجەلەر مەن نورمالار جەڭىلدەتىلدى. ناتيجەسىندە، ءبىز 95 پايىز قامتۋعا قول جەتكىزدىك»، - دەپ توقتالدى مينيستر.
وسى ورايدا ول قالالار مەن وڭىرلەردىڭ اۋدان ورتالىقتارىندا سىبايلاس جەمقورلىق جاعدايلارىن جانە كەزەكتىلىكتىڭ قايتالانۋىن بولدىرماۋ ماقساتىندا بالاباقشالارعا جولداما بەرۋ قىزمەتى اۆتوماتتاندىرىلعانىن اتاپ ءوتتى.
«كادرلاردىڭ ساپالىق قۇرامىن جاقسارتۋ ءۇشىن تاربيەشىلەر بىلىكتىلىگىن ارتتىرۋدىڭ ءبىرىڭعاي جاڭارتىلعان باعدارلاماسى ازىرلەندى جانە ەنگىزىلدى. مەكتەپكە دەيىنگى ۇيىمداردىڭ 20 پايىزىندا ەرەكشە ءبىلىم بەرۋ قاجەتتىلىگى بار بالالار ءۇشىن جاعداي جاسالعان. ولارعا بالاباقشاعا ءبىرىنشى كەزەكتە ورنالاسۋ قۇقىعى بەرىلدى»، - دەدى ۆەدومستۆو باسشىسى.
ونىڭ اتاپ وتۋىنشە، الداعى ۋاقىتتى مەكتەپكە دەيىنگى ءبىلىم سالاسىندا ىسكە اسىرىلاتىن بىرنەشە ماقسات بار.
بۇل تۇرعىدا 1 جانە 3 جاستاعى بالالاردىڭ مەكتەپكە دەيىنگى تاربيە جانە وقىتۋمەن قامتاماسىز ەتۋ؛ مەكتەپكە دەيىنگى ءبىلىم ساپاسىن كوتەرۋ؛ بالالار قاۋىپسىزدىگىن قامتاماسىز ەتۋ؛ بالاباقشا تاربيەشىلەرىنىڭ جالاقىسىنىڭ تومەندىگى؛ بالاباقشالاردى ليتسەنزيالاۋدى قايتا قاراستىرۋ سەكىلدى باعىتتار قامتىلعان.
