كوپبالالى وتباسىلارعا ارنالعان تۇرعىن ءۇي سالۋعا 100 ميلليارد تەڭگە بولىنەدى

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، 2019-جىلعا ارنالعان رەسپۋبليكالىق بيۋجەتتى ناقتىلاۋ تۋرالى زاڭ جوباسىندا قاراجاتتى 3 باعىت بويىنشا ءبولۋ كوزدەلەدى.

«ءبىرىنشى باعىت - جالپى سوماسى 444,3 ميلليارد تەڭگەگە «نۇر وتان» پارتياسىنىڭ سەزىندە مەملەكەت باسشىسى ايتقان «الەۋمەتتىك قامقورلىق» الەۋمەتتىك شارالارىن ىسكە اسىرۋ. وسى قاراجات اياسىندا مىنالار جوسپارلانىپ وتىر: ازاماتتاردىڭ جەكەلەگەن ساناتتارىن الەۋمەتتىك قولداۋدى كۇشەيتۋ - 224,3 ميلليارد تەڭگە؛ از قامتىلعان كوپبالالى وتباسىلار ءۇشىن جالعا بەرىلەتىن تۇرعىن ءۇي سالۋ جانە قازاقستاننىڭ تۇرعىن ءۇي قۇرىلىس جيناق بانكى ارقىلى جەڭىلدىكتى كرەديت بەرۋدى ەنگىزۋ -100 ميلليارد تەڭگە؛ وڭىرلىك ينفراقۇرىلىمدى دامىتۋ 90 ميلليارد تەڭگە؛ «اۋىل - ەل بەسىگى» ارنايى جوباسىن ىسكە اسىرۋ 30 ميلليارد تەڭگە»، - دەدى مينيستر.

مينيستر ەكىنشى باعىتتا «جاستار جىلىن» وتكىزۋ اياسىندا ءىس-شارالاردى ىسكە اسىرۋ 24,6 م ميلليارد تەڭگە بولىنەتىندىگىن جەتكىزدى. ءۇشىنشى باعىتتا پرەزيدەنتتىڭ 2017 جانە 2018-جىلدارداعى جولداۋلارىندا ايتىلعان تاپسىرمالارىن ورىنداۋعا 286 ميلليارد تەڭگە جۇمسالادى.

«وسى قاراجات اياسىندا تۇركىستان وبلىسىنىڭ جانە استانا قالاسىنىڭ كەشەندى دامۋ جوسپارلارىن ىسكە اسىرۋ، استانا قالاسىندا عىلىمي-ونكولوگيالىق ورتالىق سالۋ، «سارىارقا» گاز قۇبىرىن سالۋ، سونداي-اق ەل قاۋىپسىزدىگىن قامتاماسىز ەتۋمەن بايلانىستى ءىس-شارالاردى ىسكە اسىرۋ جوسپارلانىپ وتىر. ەلباسىنىڭ بارلىق بەرگەن تاپسىرمالارى قارجىلاي قامتاماسىز ەتىلەدى»، - دەدى ءا. سمايىلوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى