استانانىڭ كىشكەنتاي تۇرعىندارى بەس ساعات ىشىندە 100 ماماندىقتىڭ يەسى بولا الادى

اۋقىمدى شارا بۇل ەلدە 3 جىلدان بەرى قولعا الىنعان. مامانداردىڭ ايتۋىنشا، جوبا بالالارعا بولاشاق ماماندىعىن دۇرىس تاڭداۋعا ۇلكەن سەپتىگىن تيگىزەدى. 25 قالا، 156 ماماندىق جانە 326 مىڭ بالا. 3 جىل بۇرىن باستالعان «ماماندىقتار قالاسى» اتتى جوبا كىشكەنتاي ۋكراينالىقتار ءۇشىن سۇيىكتى ويىن- ساۋىققا اينالىپ ۇلگەردى.

ەندى جوبا اۆتورلارى حالىقارالىق دەڭگەيگە شىعىپ، ءوز ىستەرىن قازاقستاندا دا جۇزەگە اسىرماق. يدەيانىڭ يەسى تاتيانا ليۋلكا شارانى باس شاھارىمىزدا وتكىزۋ تۋرالى استانا اكىمدىگىمەن كەلىسكەن. جەرگىلىكتى بيلىكتە قىزىعۋشىلىق تانىتىپ، ۇيىمداستىرۋ ماسەلەلەرىندە كومەك قولىن سوزعان. وسىلايشا ەلوردادا وتكەلى تۇرعان بايقاۋعا 10 مىڭ ءبۇلدىرشىن قاتىسىپ، ولار جۇزگە جۋىق ماماندىق يەسىنىڭ كەيپىنە ەنە الادى.

تاتيانا ليۋلكا، «ماماندىقتار قالاسى» جوباسىنىڭ يدەولوگى:

- ءبىز بارلىق مەملەكەتتىك قۇرىلىمدى جۇمىلدىرماق ويدامىز. ونىڭ ىشىندە پوليتسيا، قۇتقارۋشىلار مەن ءورت سوندىرۋشىلەر مىندەتتى تۇردە بولادى. سوڭعىلارىنىڭ قىزىل ءتۇستى كولىگىنە قىزىقپايتىن ەر بالا جوق شىعار الەمدە. دارىگەرلەر مەن مەتەورولوگتار دا بولادى. قازاقستاندىق بالالار جاڭا ماماندىقتارمەن تانىسادى.

استاناعا جول تارتقان «ماماندىقتار قالاسى» اتتى جوبا ۋكراينادا قالىپتاسقان جۇيەمەن وتكىزىلەدى. شاراعا قاتىسۋشى ءار بالاعا جەكە پاسپورت ۇسىنىلادى. ەڭبەك كىتاپشاسىنا بالاما بولاتىن قۇجاتقا ءار ماماندىق بويىنشا باعا قويىلادى. 5 ساعات ىشىندە ۋاقىتشا قىزمەتكەرلەر كەم دەگەندە 15 لوكاتسيادا بولىپ ۇلگەرۋى كەرەك. اتقارعان ەڭبەگىنە قاراي كىشىگىرىم اقى الىپ، وعان وزىنە كەرەك ءتاتتىسى مەن ويىنشىعىن ساتىپ الا الادى. بالالارعا ءار ماماندىقتىڭ قىر- سىرىن ۇيرەتەتىن ءوز ءىسىنىڭ شەبەرلەرى مەن كاسىبي بىلىكتى ماماندار دا شاراعا قاتىسادى. ال بيزنەس قۇرىلىمدار ءۇشىن بۇل تەگىن جارناما. «ماماندىقتار قالاسى» اۋماعىنا كىرۋ بالالار مەن ولاردىڭ اتا- انالارى ءۇشىن تەگىن.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى