الاشوردانىڭ 100 جىلدىعىنا ارنالعان جىر ءمۇشايراسى مارەگە جەتتى
ب ق و مادەنيەت، مۇراعاتتار جانە قۇجاتتاما باسقارماسىنىڭ قولداۋىمەن اتالمىش ورتالىق ۇيىمداستىرعان ولەڭ بايگەسىنە 16-30 جاس ارالىعىنداعى 14 اقىن قاتىسىپ، ب ا ق سىنادى.
ولار ءبىر ولەڭىن الاش قوزعالىسى مەن كوشباسشىلارىنا، ەكىنشىسىن جاھانشاعا ارنادى. بەلگىلى اقىن، قر جازۋشىلار وداعى ب ق و فيليالىنىڭ ءتورايىمى، ق ر ەڭبەك سىڭىرگەن قايراتكەرى اقۇشتاپ باقتىگەرەيەۆا باستاعان قازىلار القاسىنىڭ ۇيعارىمىمەن قىزىلوردا وبلىسىنىڭ تۇلەگى، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتى ماديار تولەۋوۆ باس جۇلدەنى جەڭىپ الدى.
وسى وقۋ ورنىنىڭ ستۋدەنتتەرى جانەركە عينايات پەن مارلەن عيلىمحان سايكەسىنشە ءبىرىنشى، ەكىنشى ورىنعا يە بولدى. سىرىم اۋداندىق «سىرىم ەلى» گازەتىنىڭ ءتىلشىسى باۋىرجان شيرمەدين ۇلى ءۇشىنشى جۇلدەنى ەنشىلەدى.
سونداي-اق الشىنبەك مۇقانعاليەۆ، بەكبولات قالەنوۆ، باۋىرجان زينەشيەۆ، گۇلناز پاتشاعۇلوۆا جانە ابزال سەرىكقالي ۇلىنا ىنتالانتىرۋ سىيلىقتارى تابىس ەتىلدى.
ماراپاتتاۋ راسىمىنە قاتىسقان ب ق و مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆتىڭ اتاپ وتكەنىندەي، قازاقتىڭ «ءوز الدىنا ەل بولعانىن كورەمىز بە؟»، دەپ اڭساپ وتكەن عۇمار قاراش سىندى بابالارىمىزدىڭ ارمانى ورىندالدى. تاۋەلسىزدىك جولىندا جانىن قۇربان ەتىپ، بار ءومىرىن سارپ ەتكەن الاش ارىستارى قانداي قۇرمەتكە دە لايىقتى.
سوندىقتان ولاردىڭ ەڭبەگىن ولەڭمەن ايشىقتاي ءبىلۋ دە - ونەر. «ولەڭ - كيەلى ونەر. قازىرگى تاڭدا اقشاسى بارلار كىتاپ شىعارىپ، جىردىڭ قادىرىن كەتىردى. اقىندار جايىنا قالدى. الايدا دۇنيەدە ءبارى وتكىنشى، اسىل ءسوز عانا قالادى كەيىنگە. بەس عاسىر بويى حالقىنىڭ مۇڭىن جىرلاپ، تۋىن كوتەرگەن بابالارىمىزدىڭ باي مۇراسى ولمەك ەمەس. ەڭ باستىسى، ۇلت ەگەمەندىگى مەن ەركىندىگىن ساقتاي ءبىلۋ كەرەك.
ەلباسىنىڭ «رۋحاني جاڭعىرۋ» باعدارلاماسىنا سايكەس ءسوز ونەرىنىڭ وكىلدەرى دە ۇلتتى ۇيىستىرۋ جولىندا الدىڭعى شەپتە ءجۇرۋى ءتيىس»، دەدى اقىن اقۇشتاپ باقتىگەرەيەۆا.
سونداي-اق وسى كۇنى ا. باقتىگەرەيەۆا جاس قالامگەر، اقىندارمەن كەزدەسىپ، پرەزيدەنت ن. نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنا وراي اتقارىلار ىستەر توڭىرەگىندە وي ءوربىتتى. بەس ادامعا قازاقستان جازۋشىلار وداعى ب ق و بولىمشەسىنىڭ قارجىلاي سىيلىقتارى تابىس ەتىلدى.
اۆتور: ەلجان ەرالى
