ن. نازاربايەۆ شەتەلدەگى قانداستارىمىزدى ۇزدىك 100 وقۋلىقتى قازاق تىلىنە اۋدارۋ ىسىنە قاتىسۋعا شاقىردى
مەملەكەت باسشىسى «بولاشاققا باعدار: رۋحاني جاڭعىرۋ» اتتى باعدارلاما اياسىندا گۋمانيتارلىق باعىتتاعى ەڭ ۇزدىك 100 وقۋلىق قازاق تىلىندە شىعارىلاتىندىعىن اتاپ ءوتتى. بۇل قازاقستاندىقتار ءۇشىن عانا ەمەس بۇكىل دۇنيەجۇزىندەگى قازاقتارى ءۇشىن ماڭىزدى جوبا ەكەندىگىن باسا ايتتى.
«رۋحاني قۇندىلىقتاردى، گۋمانيتارلىق بىلىمدەردى، وقۋلىقتاردى، شەت تىلدەرىنەن، اعىلشىننان ورىسشاعا، ورىس تىلىنەن قازاقشاعا اۋدارعانشا 10-15 جىل وتەدى. سوندىقتان ءبىز ەڭ كەرەكتى 100 وقۋلىقتى شىعارۋ ماسەلەسىن الدىمىزعا قويىپ وتىرمىز. ەندى قانداستارىمىز قاي ەلدە تۇرعانىنا قاراماستان دۇنيەدەگى ەڭ تاڭداۋلى بىلىممەن انا تىلىندە سۋسىندايتىن بولادى دەپ ەسەپتەيمىز»، - دەدى پرەزيدەنت.
ەلباسى بۇگىنگى قۇرىلتايعا ءار ءتۇرلى تىلدە سويلەيتىن، قازىرگى زامانعا ساي تەرەڭ ءبىلىمدى جاستار وتىرعانىن اتاپ ءوتتى. «سىزدەردى كۇللى قازاقتىڭ ءورىسىن كەڭەيتىپ، دەڭگەيىن كوتەرەتىن وسى جوباعا بەلسەنە قاتىسۋعا شاقىرامىن»، - ن. نازاربايەۆ.
اۆتور: مارلان جيەمباي
