مۇناي باعاسى باررەلىنە 100 دوللارعا جەتە مە
تاياۋدا عانا الەمدىك نارىققا شىعاتىن مۇنايدىڭ ۇشتەن ءبىرىن بەرەتىن وسى و پ ە ك مۇشەلەرى الجيردە باس قوسىپ، 2016 -جىلدىڭ قاراشاسىنان باستاپ مۇناي ءوندىرۋ كولەمىن قازىرگى 33،2 ميلليون باررەلدەن 32،5 ميلليون باررەلگە دەيىن تومەندەتۋ تۋرالى كەلىسىمگە قول جەتكىزگەن ەدى.
ءتىپتى، ۇيىمعا مۇشە ساۋد ارابياسى مۇناي ءوندىرۋ قارقىنىن توقتاتىپ قانا قويماي، ونى تومەندەتۋگە دە قاۋقارى جەتەتىندىگىن اشىق ايتقان-دى. ايتىپ قانا قويماي، بۇل ەل وتكەن اپتا ىشىندە مۇنداي ءوندىرۋ كولەمىن 0،6 پايىزعا قىسقارتتى دا. الەمدىك مۇناي نارىعىنىڭ 10 پايىزدىق ۇلەسىنە يە رەسەي دە بۇل ۇسىنىستى قولداپ وتىر.
جالپى، بۇگىندە الەمدىك نارىققا ءبىر تاۋلىكتە شىعارىلاتىن مۇناي كولەمى 95،9 ميلليون باررەلدى قۇراسا، سۇرانىس ودان 0،3 ميلليون تونناعا كەم. دەگەنمەن، مۇنايعا دەگەن سۇرانىستىڭ جىل باسىنان بەرى 0،1 پايىزعا ارتقانى، ال ۇسىنىستىڭ 1،5 پايىزعا ازايعانى بايقالادى. بۇل رەتتە جىل باسىنان بەرى رەسەي مۇناي ءوندىرۋ كولەمىن 1،8، ا ق ش 8، قىتاي 10، ۆەنەسۋەلا 6،6 پايىزعا تومەندەتكەندىگىن ايتا كەتكەن ءجون.
مىنە، وسىنداي جايتتاردىڭ ارقاسىندا Brent ماركالى مۇنايدىڭ باعاسى Caelus Energy ەنەرگەتيكالىق كومپانياسىنىڭ الياسكادا الدىن الا باعالاۋ بويىنشا قورى 1،8-2،4 ميلليارد باررەل بولاتىن ءىرى مۇناي- گاز كەن ورنىنىڭ اشىلعاندىعى تۋرالى اقپاراتتىڭ تاراعاندىعىنا دا قاراماستان بىرتىندەپ كوتەرىلىپ كەلەدى. ماسەلەن، وتكەن اپتادا قارا التىن باعاسى 5،8 پايىزعا ءوسىپ، باررەلىنە 51،9 دوللاردى قۇرادى.
ديزەل باعاسى قاشان تۇراقتايدى؟
قازاقستاندا دا مۇناي ءوندىرۋ كولەمى باياۋلاۋدا. وتكەن اپتانىڭ قورىتىندىسىنا سايكەس مۇناي ءوندىرۋ كولەمى 1 پايىزعا كەمىپ، تاۋلىگىنە 1،580 ميلليون باررەلدى قۇرادى. بۇعان قاراشىعاناق كەن ورنىنان مۇناي مەن گاز كوندەنساتىن ءوندىرۋ كولەمىن تومەندەتۋ سەبەپ بولىپ وتىر. ءدال وسى سەبەپپەن گاز ءوندىرۋ كولەمى دە وتكەن اپتادا 1،7 پايىزعا ازايىپ، 132،5 ميلليون تەكشە مەتر بولدى. ايتا كەتەرلىگى، وسى ايدىڭ سوڭىندا ىسكە قوسىلۋى كۇتىلىپ وتىرعان قاشاعاننان الداعى ۋاقىتتا تاۋلىگىنە 75 مىڭ توننا مۇناي وندىرىلمەك.
ناتيجەسىندە جىل سوڭىنا قاراي ۇكىمەت تارابىنان مۇناي سالاسىن قولداۋ شارالارىنىڭ ارقاسىندا مۇناي ءوندىرۋ كولەمىنىڭ جوسپارى 74 ميلليون توننادان 75 ميلليون تونناعا دەيىن جەتكىزىلەدى دەپ كۇتىلۋدە.
ەلىمىزدىڭ ءۇش جەتەكشى مۇناي وڭدەۋ زاۋىتىنداعى مۇناي وڭدەۋ كولەمى دە اپتا ىشىندە ازداپ قىسقارىپ، تاۋلىگىنە 335،7 مىڭ باررەلگە دەيىن تومەندەدى. ال، جالپى جىل باسىنان بەرى مۇناي وڭدەۋ كولەمى 43،8 پايىزعا وسكەندىگىن اتاپ وتكەن ورىندى. ەستەرىڭىزدە بولسا، قىركۇيەكتىڭ 26-سى كۇنى پاۆلودار مۇناي وڭدەۋ زاۋىتى جاڭعىرتۋ جۇمىستارىنان كەيىن ءوزىنىڭ تولىققاندى وندىرىستىك قۋاتىنا شىققان بولاتىن. الايدا، وسى ايدىڭ 20 سىنان كەيىن «پەتروكازاحستان ويل پروداكتس» كومپانياسىن جاڭعىرتۋ باستالماق.
وتكەن اپتا قورىتىندىسىندا ەلىمىزدە نەگىزگى مۇناي ونىمدەرى باعاسىنىڭ ايتارلىقتاي قىمباتتاعانى بايقالادى. ماسەلەن، ديزەل وتىنى وسىمەن ەكىنشى اپتا قاتارىنان قىمباتتاپ كەلەدى. بۇگىندە رەسپۋبليكا بويىنشا ورتاشا ەسەپپەن ليترىنە 126،8 تەڭگەنى قۇراپ وتىر. ال ديزەل وتىنىڭ ەڭ جوعارى باعاسى استانا مەن الماتى قالالارىندا جانە شىعىس قازاقستان وبلىستارىندا تىركەلگەن. بۇل وڭىرلەردە ولاردىڭ ليترى 128،5-129 تەڭگەنىڭ ارالىعىندا. مۇنداي وسىمىنە ماۋسىمدىق جۇمىستاردىڭ باستالۋى سەبەپ بولعانى انىق. وعان قوسا، وسىدان 2 ايدان استام ۋاقىت بۇرىن ەلىمىزدىڭ ەنەرگەتيكا مينيسترلىگى ديزەل وتىنى باعاسىن مەملەكەتتىك رەتتەۋدەن باس تارتقان بولاتىن. رەسپۋبليكا بويىنشا ا ي-80 نىڭ ءليترى وتكەن اپتادا 0،6، ال ا ي-92 بەنزينى 0،5 پايىزعا قىمباتتادى.
مۇناي باعاسى باررەلىنە 100 دوللارعا جەتە مە؟
و پ ە ك ەلدەرىنىڭ مۇنايدى ءوندىرۋ كولەمىن قىسقارتۋ تۋرالى كەلىسىمگە كەلۋى الەمدىك نارىقتاعى ارتىق قارا التىننان ارىلىپ، ونىڭ باعاسىن تۇراقتاندىرىپ قانا قويماي، كوتەرە تۇسەتىندىگى ءسوزسىز. جالپى، بۇگىندە الپاۋىت مۇناي كومپانيالارى مەن ينۆەستيتسيالىق ينستيتۋتتاردىڭ مۇناي باعاسىنىڭ الداعى تاعدىرىنا قاتىستى پىكىرى الا- قۇلا.
ماسەلەن، Westpac Banking Corp، Itau Unibanco Holding SA، Societe Generale SA، Emirates NBD PJSC، Capital Economics Ltd، Citigroup Inc، Barclays PLC سىندى كومپانيالاردىڭ 2019 -جىلدى قوسا العانداعى بولجامىنا سايكەس، الداعى ءۇش جىلدا مۇناي باعاسى باررەلىنە 70 دوللاردان اسپاق ەمەس. ال National Australia Bank Ltd، Norddeutsche Landesbank Girozentrale سىندى ينۆەستيتسيالىق ينستيتۋتتار 100 دوللارعا جەتەتىندىگىنە سەنىمدى.
ءبىر انىق نارسە، الداعى ۋاقىتتا مۇناي باعاسىنىڭ كوتەرىلۋى و پ ە ك- تىڭ ارەكەتىنە تىكەلەي بايلانىستى. ەگەر، ۇيىمعا مۇشە ەلدەر كەلىسىم شارتتارىن ساقتاپ، وسى جىلدىڭ قاراشاسىنان مۇناي ءوندىرۋ كولەمىن تومەندەتسە، وندا قارا التىننىڭ قۇنى ارتا تۇسەتىندىگى انىق.
اۆتور: مارلان جيەمباي
