قازاقستاندا 100-دەن استام مەملەكەتتەن كەلگەن بىلىكتى ماماندار قىزمەت ەتەدى
بۇل تۋرالى بۇگىن استانادا ق ر دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى ءبىرجان نۇرىمبەتوۆ ءمالىم ەتتى.
«وتكەن جىلدىڭ سوڭىندا ەلىمىزدە كوشى- قون زاڭناماسىنا ءبىرقاتار وزگەرتۋلەر ەنگىزىلدى. بۇل تۇرعىدا جوعارى بىلىكتى شەتەل ماماندارىن تارتۋعا قولايلى جاعدايدى قۇرۋعا باعىتتالعان شارالار قامتىلعان جانە ولار 2017 -جىلدان باستاپ كۇشىنە ەنەتىن بولادى. بۇگىندە كوپتەگەن ەلدەر سەكىلدى قازاقستان دا كۆوتالاۋ جانە جۇمىسقا تۇرۋ رۇقساتناماسىن بەرۋ جۇيەسىن قولدانۋدا. سوڭعى ءۇش جىلدا كۆوتالار اياسىندا ءبىزدىڭ ەلدىڭ جۇمىس بەرۋشىلەرى تاراپىنان ورتاشا ەسەپپەن العاندا جىلىنا 30 مىڭ شەتەل مامانى تارتىلدى. بۇل ءوز كەزەگىندە ەلدىڭ ەكونوميكالىق بەلسەندى حالقىنىڭ 0,3 پايىزىن قۇرايدى»، - دەدى ۆيتسە- مينيستر «كوشى- قوننىڭ الەۋمەتتىك- ەكونوميكالىق اسەرلەرى: ميگرانتتاردىڭ قورعانسىزدىعى جانە ورتالىق ازياداعى ينتەگراتسيالىق قاجەتتىلىكتەر» اتتى دوڭگەلەك ۇستەلدە.
ونىڭ سوزىنە قاراعاندا، قازاقستاندا الەمنىڭ 100 دەن استام ەلىنەن كەلگەن ماماندار قىزمەت ەتۋدە. سونىڭ ىشىندە نەگىزگىلەرى قىتاي، تۇركيا، ءۇندىستاننان تارتىلۋدا.
مۇنىمەن قوسا ب. نۇرىمبەتوۆ قازاقستان جوعارى بىلىكتى ەڭبەك رەسۋرستارىن تارتۋمەن قاتار، ماماندىعى جوق جۇمىس كۇشى دە قابىلدانىپ جاتقاندىعىن اتاپ ءوتتى.
«بىلتىر ەلىمىزدە ىشكى ىستەر ورگاندارىنىڭ رۇقساتىمەن ءۇي شارۋاشىلىقتارىندا تمد ەلدەرىنەن 141 مىڭ شەتەل جۇمىسشىلارى قىزمەت اتقاردى. سونىمەن قاتار باقىلانبايتىن زاڭسىز ەڭبەك كوشى- قونى ساقتالۋدا، ياعني زاڭسىز كەلگەن جۇمىسشىلار تارتىلعان سالالاردا ەل ءۇشىن جانە جۇمىسشىلاردىڭ وزدەرى ءۇشىن ەكونوميكالىق جانە الەۋمەتتىك پروبلەمالار تۋىندايدى. جاسىرىن ميگرانتتاردىڭ قىزمەتى نەگىزىنەن بازارلارداعى ساۋدادا، قۇرىلىستا، اۋىل شارۋاشىلىعىندا بايقالۋدا»، - دەدى ۆيتسە- مينيستر.
ايتا كەتەيىك، كوشى- قون ماسەلەسىنە ارنالعان اتالعان دوڭگەلەك ۇستەل ق ر تۇڭعىش پرەزيدەنتى - ەلباسى كىتاپحاناسىندا ءوتىپ جاتىر. ءبىرقاتار مەملەكەتتەردەن كەلگەن ماماندار وسى سالاداعى پروبلەمالاردى تالقىلاۋدا.
اۆتور: رۋسلان عابباسوۆ
