حالىقارالىق بانك قازاقستاندا جۇمىس ورىندارىن ىنتالاندىرۋ جوباسىنا 100 ميلليون دوللار بولمەك

اتالعان كەلىسىم 2015-جىلدىڭ 20- شىلدەسىندە استانا قالاسىندا جاسالعان.

كەلىسىمنىڭ ماقساتى - جۇمىسپەن قامتۋ مەن نىسانالى بەنەفيتسيارلاردىڭ ەڭبەك داعدىلارى سالاسىنداعى ناتيجەلەردى جاقسارتۋ مەن تەحنيكالىق جانە كاسىپتىك ءبىلىم بەرۋدىڭ، وقىتۋدىڭ جانە جوعارى ءبىلىم بەرۋ باعدارلامالارىنىڭ وزەكتىلىگىن ارتتىرۋ. بۇل رەتتە جوبانىڭ قۇنى 137 ميلليون ا ق ش دوللارىن قۇرايتىن بولادى، ونىڭ ىشىندە قارىزداردى رەسپۋبليكالىق بيۋدجەتتەن قوسا قارجىلاندىرۋ 37 ميلليون دوللار، ال سىرتقى قارىز 100 ميلليون دوللاردى قۇرايتىن بولادى. جوبانى 2020-جىلدىڭ 30- ماۋسىمىنا دەيىن اياقتاۋ جوسپارلانعان.

ياعني، كەلىسىمگە سايكەس، حالىقارالىق قايتا قۇرۋ جانە دامۋ بانكى قازاقستانعا ەڭبەك داعدىلارىن دامىتۋ جانە جۇمىس ورىندارىن ىنتالاندىرۋ جونىندەگى جوبانى قارجىلاندىرۋعا 100 ميلليون ا ق ش دوللارى سوماسىندا قارىز بەرەتىن بولادى.

قارىزدى وتەۋ مەرزىمى بەس جىلدىق جەڭىلدىك كەزەڭىن قوسا العاندا، 19 جىلدى قۇرايدى. بۇل رەتتە تولەنۋگە ءتيىس ءبىرجولعى كوميسسيا قارىز سوماسىنىڭ 0,25 پايىزىن قۇرايتىن بولادى.

جوبانى ىسكە اسىرۋ تاۋەلسىز باعالاۋ جۇيەسىن جانە بىلىكتىلىكتى سەرتيفيكاتتاۋدى ەنگىزۋدى جانە جەتىلدىرۋدى كوزدەيدى. بۇدان بولەك، جۇمىسپەن قامتۋ قىزمەتتەرىن جاقسارتۋدى، ەڭبەككە قابىلەتتى حالىقتى وقىپ-ۇيرەتۋگە قولجەتىمدىلىكتى كەڭەيتۋ قاراستىرىلادى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى