الداعى 100 جىلدا انتاركتيدالىق مۇزدىقتار تولىق ەرىپ كەتۋى مۇمكىن
ال وسىدان ون جىل بۇرىنعى كورسەتكىشتەرمەن سالىستىرعاندا 13,7 پايىزعا كەمىگەن. پينگۆيندەر مەن يتبالىقتار كۇن كوزىنە جىلىنىپ، قاردا ويناپ ءماز. وكىنىشكە قاراي ولار مەكەن ەتەتىن ماتەريكتىڭ كۇن وتكەن سايىن جويىلىپ جاتقانىن بىلمەيدى.
بريتانيالىق انتاركتيكالىق قىزمەت ماماندارىنىڭ ايتۋىنشا، بىلتىر قۇرلىقتىڭ باتىس ايماعى بۇرىنعىدان دا قاتتى ەرىپ، مۇزدى جەر ازايىپ كەتكەن.
پيتەر كونۆي، بريتانياداعى انتاركتيكالىق قىزمەت زەرتتەۋشىسى، پروفەسسور:
- ءبىز العاش رەت انتاركتيكاداعا وسىدان 25 جىل بۇرىن اياق باسقان ەدىك. ول كەزدەگى كورىنىس مۇلدە باسقاشا بولاتىن. قازىر مۇزدىقتاردىڭ كوبى ەرىپ، جويىلسا، كەيبىر جەرلەردە جۇقارىپ كەتتى. بۇعان ەڭ الدىمەن جاھاندىق جىلىنۋ سەبەپ. سالدارىنان قۇرلىقتاعى سۋلاردىڭ اعىسى وزگەرىپ، وسىمدىكتەر مەن جانۋارلاردىڭ ءوسىپ، كوبەيۋىنە زيان كەلتىرىپ جاتىر.
جەر جاھان ءۇشىن باستى ماسەلەنىڭ ءتۇيىنى شەشىلەر ەمەس. الايدا ونى ءوز كوزىمەن كورىپ، تىعىرىقتان شىعار جولدى ىزدەۋگە اتسالىسىپ جاتقان ادامداردىڭ دا قاتارى جىل سايىن كوبەيىپ كەلەدى. عالىمداردىڭ ايتۋىنشا، قۇرلىققا قىزىعۋشىلىق تانىتقان تۋريستەردىڭ سانى سوڭعى كەزدەرى ەكى ەسەگە كوبەيگەن. 2014 - جىلى انتاركتيداعا 37 مىڭ ادام ات باسىن تىرەگەن ەكەن.
لۋيس توررەس، انتاركتيكالىق سۇڭگۋىر:
- ساياحاتشىلاردىڭ كۇن ساناپ ارتۋىنا سەبەپ تىزە بەرسەڭ، كوپ قوي، ارينە. اركىمنىڭ ءوز ماقساتى بار. ءبىراق ولاردىڭ ەڭ باستىسى - وسى جەردەگى تابيعاتتىڭ ادامزات دامۋىنىڭ اسەرىنەن ەشقانداي وزگەرىسكە ۇشىراماي، قاز- قالپىندا ساقتالۋى دەپ ويلايمىن.
وسىدان 200 جىلداي ۋاقىت بۇرىن اشىلعان ماتەريككە العاشىندا ادامدار كيتتەر مەن يتبالىقتاردى اۋلاپ، قانجىعاسىن مايلاۋ ءۇشىن اعىلسا، قازىر مۇندا ونىڭ ەرۋىنە توسقاۋىل بولار جول ىزدەگەن بەلسەندىلەردىڭ قاتارى كوبەيۋدە دەيدى عالىمدار.
