قاراعاندىداعى كاسىپورىن 100 تونناعا دەيىن جۇك كوتەرەتىن كراندار شىعارادى - فوتو

«جوبامىز ايماقتىق يندۋستريالاندىرۋ كارتاسىنا ەنگىزىلدى. قۇنى - 390 ميلليون تەڭگە. 150 جۇمىس ورنىن قۇرۋ قاراستىرىلعان. جوبا قۋاتتىلىعى - جىلىنا 50 كران دايىنداۋ. بۇل كورسەتكىشكە 2017 - جىلى قول جەتكىزۋ كوزدەلگەن»، - دەدى «وپتيم- كران قازاقستان» ج ش س ديرەكتورى ەۆگەنيي ليسيسىن.

كاسىپورىن ءۇش جىل بۇرىن رەسەيلىك «وپتيم كران» ا ا ق ەنشىلەس كومپانياسى بولىپ اشىلعان. قازىر مۇندا 70 ادام جۇمىس ىستەيدى.

«قازىر ءوندىرىس قۋاتتىلىعى شامامەن جىلىنا 30 كران. بۇل - 1 توننادان 100 تونناعا دەيىن جۇك كوتەرەتىن كراندار. قازىرگى ۋاقىتتا 100 توننا جۇك كوتەرەتىن كراندى «پاۆلودار- ەنەرگو» كاسىپورنى ءۇشىن شىعاردىق. «ازيا اۆتو» كومپانياسى 25 توننا جۇك كوتەرەتىن كونتەينەرلىك كرانعا تاپسىرىس بەرگەن. ونى دا ورىندادىق»، - دەدى «وپتيم- كران قازاقستان» ج ش س باس ينجەنەرى دەنيس مالىكين.

جاڭا قوندىرعى ساتىپ الۋ ءۇشىن كاسىپورىن «بيزنەستىڭ جول كارتاسى - 2020» مەملەكەتتىك باعدارلاماسىنىڭ قولداۋىن پايدالاندى. ناتيجەسىندە نەمىستىڭ پلازمالىق جانە قىزدىرىپ كەسۋ ماشيناسى ساتىپ الىندى. «مۇنداي ماشينا قازاقستاندا ەكەۋ عانا. ءبىرى بىزدە بولسا، ەكىنشىسى اتىراۋ وبلىسىندا»، - دەپ اتاپ ءوتتى د. مالىكين.

قازىر مۇندا ءوندىرىس الاڭدارى قالىپقا كەلتىرىلۋدە. وزدەرى شىعارعان 16 توننا جۇك كوتەرەتىن كراندار ورناتىلعان، ينفراقۇرىلىم تارتىلدى. بيىل كاسىپورىن ىشىندەگى جوندەۋ جۇمىستارىن اياقتاپ، جاڭا تەحنيكالىق قوندىرعى ورناتۋ جوسپارلانعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى