ءىلياس ەسەنبەرليننىڭ 100 جىلدىعىنا وراي ونىڭ ءومىرى مەن قىزمەتىنە ارنالعان كىتاپ جارىققا شىقتى
ۇلى عالىمنىڭ 100 جىلدىعىنا ارنالعان كىتاپ جازۋشىنىڭ تۋعان جىلىنان باستاپ، ءومىرىنىڭ سوڭىنا دەيىنگى ارالىقتى قامتىپ وتىر. بۇل ەڭبەك «ۇلى دالا تۇلعالارى» سەرياسىمەن شىعارىلدى.
عىلىمي-تانىمدىق تۇرعىدان جازىلعان بۇل شىعارمادا الماتى مەملەكەتتىك جانە اتباسار قالاسىنداعى ادەبي مۇراجايلاردا، ۇلتتىق مۇراعاتتا ساقتالعان قولجازبالار مەن باسقا دا دەرەكتەر نەگىزىندە ءبىرتۋار جازۋشىنىڭ ومىرلىك كوزقاراستارىنىڭ قالىپتاسۋى، وعان اسەر ەتكەن جاعدايلار مەن تاريحي شىعارمالاردىڭ جازىلۋ سەبەپتەرى قاراستىرىلعان.
كىتاپتىڭ اۆتورى امانگەلدى قاشقىمبايەۆ - تاريح عىلىمدارىنىڭ كانديداتى، دوتسەنت، مەملەكەت تاريحى ينستيتۋتى ديرەكتورىنىڭ ورىنباسارى، ال جالپى رەداكسياسىن تاريح عىلىمدارىنىڭ دوكتورى، پروفەسسور ب. اياعان باسقاردى.
تۋىندى «جاستىق شاق جىلدارى، وسكەن ورتا»، «تۆورچەستۆولىق جولدا»، «ءىلياس ەسەنبەرلين شىعارمالارىنداعى تاريح جانە تاريحي ساباقتاستىق»، «بولاشاققا بەتتەگەن قايىق»، «ءىز قالعان وشپەس سوڭىندا» سىندى كولەمدى بەس تاراۋدى قامتيدى. ءىلياس ەسەنبەرليننىڭ ءومىربايانى نەگىزىنەن ونىڭ ءىنىسى راۋناق ەسەنبەرليننىڭ ەستەلىكتەرى نەگىزىندە بەرىلگەن. مەملەكەتتىك مۇراعاتتار مەن مۋزەيلەردەن، سونىڭ ىشىندە الماتى، جەزقازعان، قىزىلوردا، اتباسار قالاسىنداعى ءى. ەسەنبەرلين اتىنداعى مۇراجايلاردان تابىلعان قۇجاتتاردى جازۋشىمەن زامانداس بولعان بەلگىلى قالامگەرلەردىڭ ەستەلىكتەرىمەن سالىستىرا وتىرا، ەسەنبەرليننىڭ تەرەڭ فيلوسوفياسىن ونىڭ روماندارى مەن پوەمالارىندا كەزدەسەتىن ۇشقىر ويلارىمەن جانداندىرۋ يدەياسىنىڭ كورىنىس تابۋى دا ەڭبەككە پىكىر جازعان عالىمداردىڭ قولداۋىن تاپقان، دەپ حابارلايدى adebiportal.kz.
