ۇلتتىق قوردان شاعىن جانە ورتا بيزنەستى دامىتۋعا قوسىمشا 100 ميلليارد تەڭگە بولىنەدى - ن. نازاربايەۆ

بۇل تۋرالى بۇگىن قازاقستان حالقىنا ءداستۇرلى جولداۋىن جاريالاعان ق ر پرەزيدەنتى نۇرسۇلتان نازاربايەۆ ءمالىم ەتتى.

ەلباسى ءوز سوزىندە اعىمداعى جىلدىڭ اقپانىندا ۇلتتىق قوردان 1 تريلليون تەڭگە ءبولۋ تۋرالى شەشىم قابىلدانعانىن ەسكە سالىپ ءوتتى. 500 ميلليارد تەڭگە كولەمىندە 2 ترانشپەن بولىنگەن قارجى 2014-2015 - جىلداردا ەكونوميكا ءوسىمىن قولداۋعا باعىتتالعان ەدى.

«ءبىزدىڭ جوبالاردى اياقتاۋ، وتكىر تۇرعان ماسەلەلەردى شەشۋ ءۇشىن ۇكىمەتكە ۇلتتىق قوردان 1 ترلن. تەڭگەنىڭ 500 ميلليارد تەڭگە كولەمىندەگى ەكىنشى ترانشىن كەلەسى ماقساتتارعا - كەلەسى جىلعا ءبولىپ، باعىتتاۋدى تاپسىرامىن. ەڭ ءبىرىنشى - شاعىن جانە ورتا بيزنەستى، سونىمەن قاتار ءىرى كاسىپكەرلىكتى جەڭىلدىكتى نەسيەمەن قامتاماسىز ەتۋ ءۇشىن قوسىمشا 100 ملرد. تەڭگە ءبولۋ قاجەت»، - دەدى ن. نازاربايەۆ.

مەملەكەت باسشىسىنىڭ اتاپ وتۋىنشە، اتالعان قارجى تاماق، حيميا، ماشينا جاساۋ، سونىمەن قاتار قىزمەت كورسەتۋ سالالارىنداعى جوبالاردى جۇزەگە اسىرۋدى قامتاماسىز ەتەتىن بولادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى