جەزتاڭداي ءانشىنىڭ 100 جىلدىعىنا وراي ەسكەرتكىش ورناتىلدى - فوتو
ەلباسىمىز ن. نازاربايەۆ: «ونەر سۇيگەن، ونەرپازىن ماپەلەگەن ەلدىڭ قاشاندا مارتەبەسى جوعارى»، - دەپ اتاپ كورسەتكەندەي، وتكىردىڭ جۇزىمەن قاشاپ، كەستەنىڭ بىزىمەن ورنەكتەگەن، بەس ساۋساقتىڭ سالاسىنداي، سارىارقانىڭ ساۋمال اۋاسىنداي سيقىرلى دا سۇلۋ اندەر قالدىرعان حالقىمىزدىڭ سۇيىكتى انشىسىنە ەسكەرتكىش بيۋست قورعالجىن اۋدانىنداعى رابيعا ەسىمجانوۆا اتىنداعى مۋزىكا مەكتەبىنىڭ ىشىنە ورناتىلدى.
وسىناۋ سالتاناتى شاراعا قازاق ونەرىنىڭ ساڭىلىقتارى التىنبەك قورازبايەۆ، تۇنعىشپاي جامانقۇلوۆ، باعدات ساميدينوۆا، سەمبەك جۇماعاليەۆ قاتىستى.
قازاقتىڭ حالىق اندەرى قاشاندا الاش ونەرىندەگى ءمولدىر بۇلاق، كىرشىكسىز قاينار ىسپەتتەس دەسەك، رابيعا اپامىزدىڭ رەپەرتۋارىندا دا نەگىزىنەن، «اۋپىلدەك»، «اپيتوك»، «گاۋھارتاس»، «جالعىز ارشا»، «جونىپ الدى»، «ءلايلىم شىراق»، «قۇداشا»، «ساۋلەم-اي»، «ماڭماڭگەر»، «دۋدار-اي» سىندى اندەر بولعانى ءمالىم.
رابيعا ەسىمجانوۆانىڭ ساحنادان شىرقاعان اندەرىنىڭ ءبارى دە سىيقىرلى اۋەنمەن استاسىپ جاتىر دەسەك، اسىرا ايتقاندىق ەمەس. ولاردىڭ بارلىعى دا شەر قوزعايتىن، ءتۇپسىز ويعا باتىراتىن، ەشقاشان ەشكىمدى بەيجاي قالدىرمايتىن كىلەڭ عاجاپ اندەر.
«ءانشى اپامىزدىڭ داۋىسى تۇلا بويىڭدى تازارتىپ وتەتىن ءمولدىر بۇلاقتاي، جان دۇنيەڭدى جارىق قىلىپ جىبەرەتىن شامشىراقتاي ەدى. انگە ءار قوساتىن، اۋەندى اۋەزىمەن الديلەيتىن ەرەكشە داۋىسى بار ءانشى بولاتىن»، - دەيدى قازاقستاننىڭ ەڭبەك سىڭىرگەن قايراتكەرى، ءانشى سەمبەك جۇماعاليەۆ.
ەسكە سالا كەتسەك، ءانشى اپامىزدىڭ 100 جىلدىعى سوناۋ الماتىدان باستاۋ الىپ، قاراعاندى وبلىسى، سەمەي ءوڭىرى، تاعى باسقا دا وبلىس ورتالىقتارىندا مەرەيتويلىق ءىس-شارالارمەن جالعاسىپ، كۇمىس كومەي ءانشىنىڭ تۋعان جەرىنە دە كەلىپ جەتتى.
