ومىريايەۆ ۇستالعان كۇنى جوعارعى قاباتتان 100 مىڭ دوللار لاقتىرىلعان
پوليتسەيلەر ومىريايەۆتىڭ پاتەرىن ءتىنتۋ كەزىندە كوپقاباتتى ءۇيدىڭ جوعارعى قاباتىنان 100 مىڭ دوللارى بار پاكەتتىڭ لاقتىرىلعانىن ايتتى.
سوتتا قارجى پوليتسەيلەرى - قازىرگى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى كۋالىك ەتىپ، جاۋاپ بەردى.
ولار 2013 - جىلدىڭ 21 - جەلتوقسانى - ءمۇسىلىم ومىريايەۆتىڭ ۇستالعان كۇنى بولعان وقيعا تۋرالى باياندادى.
"ءبىز ومىريايەۆ مىرزانىڭ ءۇيىنىڭ ماڭىندا جەدەل-تەرگەۋ شارالارىن جۇرگىزدىك. ارىپتەسىمىز ەكەۋىمىز كوشەدە تۇرىپ، ءۇيدى باقىلادىق، ارىپتەسىم اسحات مەيراموۆ جوعارعى قاباتتان پاكەت قۇلاعانىن كوردى. ءبىز ول جەردى قورشاۋعا الدىق. بىردەن تەرگەۋشىگە حابارلادىق. كەيىن ونىڭ اقشا سالىنعان پاكەت ەكەنى انىقتالدى، مەنىڭ بىلۋىمشە، وندا 100 مىڭ دوللار بولدى"، - دەدى ايرىقشا ماڭىزدى ىستەر جونىندەگى اعا ينسپەكتور ەركىن بايتۇروۆ.
"21 - جەلتوقسان كۇنى ءبىز شاراعا باردىق، بىزگە پودەزد ماڭىندا تۇرىپ، تەرەزەدەن باقىلاۋ تاپسىرىلدى. مەن تۇرعان كەزدە قاراڭعى بولدى. كوز الدىما اق پاكەت قۇلاپ ءتۇستى. ءبىز پاكەتكە جولامادىق. كەيىن شىعىپ، تەكسەرۋ جۇرگىزدىك. وندا اقشا، دوللارلار بولدى"، - دەدى ەكىنشى قارجى پوليتسەيى اسحات مەيراموۆ. كۋاگەرلەر پاكەتتى كىمنىڭ قاي قاباتتان لاقتىرعانىن كورمەگەندەرىن ايتتى.
ايتا كەتەيىك، بۇگىن سوتتا ولەگ ەرمولايەۆ تا كۋالىك ەتكەن بولاتىن. ول 2013 - جىلى ءمۇسىلىم ومىريايەۆقا ەكى رەت اقشاسى بار پاكەت بەرىپ جىبەرگەنىن ايتتى. "2013 - جىلدىڭ 21 - قاراشاسىندا جانە 21 - جەلتوقسانىندا ەكى رەت بولدى، ەكەۋىندە دە انتيمونوۆ ەۆگەني ۆيكتوروۆيچ مەنەن اقشانى ومىريايەۆ ءمۇسىلىم تايىر ۇلىنا جەتكىزۋدى سۇرادى. ءبىرىنشى جاعدايدا مەن اۋەجايدان جۇرگىزۋشىسى ارقىلى بەرىپ جىبەردىم. ەكىنشى جاعدايدا ءمۇسىلىم تايىر ۇلىنىڭ ۇيىنە كەلىپ بەردىم. ونىڭ نە اقشا ەكەنىن مەن بىلگەن جوقپىن"، - دەدى سوتتا ەرمولايەۆ.
تەرگەۋدىڭ مالىمەتىنشە، ءمۇسىلىم ومىريايەۆ ءوزىنىڭ قىزمەت بابىن پايدالانىپ، اۋسىل اۋرۋىنا قارسى ۆاكسينانىڭ ساتىپ الۋلار بايقاۋىندا جەڭۋگە جاردەم بەرۋ ءۇشىن اسا ءىرى كولەمدە پارا العان. بۇرىنعى جوعارى لاۋازىمدى شەنەۋنىكتىڭ ۇستالعانى 2013 - جىلدىڭ 22 - جەلتوقسانىندا بەلگىلى بولدى. العاشقى سوت وتىرىسىندا ول وزىنە تاعىلعان ايىپتاردى مويىندامايتىنىن ايتتى.
