ءبىلىم بەرۋ وزگەرىستەرىنىڭ 1000 كوشباسشىسى كادرلىق رەزەرۆى جاساقتالادى - مينيستر

بۇل تۋرالى وقۋ- اعارتۋ ءمينيسترى جۇمىس ساپارىمەن اباي وبلىسىنا بارعاندا ايتتى، دەپ حابارلايدى قازاقپارات.

عاني بەيسەمبايەۆ اياگوز، ءۇرجار جانە جارما اۋداندارىنىڭ پەداگوگتەرىمەن كەزدەسۋلەر وتكىزدى. وندا اسىرەسە، ساپالى ءبىلىم بەرۋ مەن كاسىبي دامۋدى قامتاماسىز ەتۋدىڭ نەگىزگى باعىتتارىنا جانە ۇبت (ۇلتتىق بىلىكتىلىك تەست) وتكىزۋ ەرەجەلەرىندەگى وزگەرىستەرگە باسا نازار اۋداردى.

«مينيسترلىك «ءبىلىم بەرۋ وزگەرىستەرىنىڭ 1000 كوشباسشىسى» كادرلىق رەزەرۆىن قالىپتاستىرۋ بويىنشا كەشەندى جۇمىستار جۇرگىزۋدە. باستى ماقسات - پەداگوگتەر بويىندا تۇلعالىق، كاسىبيلىك، باسقارۋشىلىق، ساراپتامالىق داعدىلار مەن قۇزىرەتتەردى دامىتۋ. باعدارلاماعا پسيحولوگيالىق تەستىلەۋ ەنگىزىلىپ وتىر، ول جاس پەداگوگتەردىڭ، بولاشاق كوشباسشىلاردىڭ تۇلعالىق ءتۇرىن، تابىستىلىعىن انىقتاۋعا مۇمكىندىك بەرەدى»، - دەپ مالىمدەدى مينيستر.

بۇعان دەيىن VIII شاقىرىلىمداعى پارلامەنت ءماجىلىسىنىڭ ءبىرىنشى سەسسياسىنىڭ اشىلۋىندا مەملەكەت باسشىسى پەداگوگتەر ءۇشىن ۇبت ەرەجەسىن وڭايلاتۋدى ۇسىنعان بولاتىن. قازىرگى تاڭدا مينيسترلىك مۇعالىمدەردى اتتەستاتسيالاۋ جۇيەسىن جەتىلدىرۋ بويىنشا ءبىرقاتار جۇمىستار اتقارۋدا. «وقىتۋ ءادىسى» باعىتى مەن پورتفوليو قالىپتاستىرۋ پروتسەسى قايتا قارالاتىن بولادى.

ايتا كەتەيىك، بۇگىندە اباي وبلىسىندا 12 مىڭنان استام پەداگوگ قىزمەت ەتەدى، ونىڭ ىشىندە 2000 نان استام پەداگوگ- زەرتتەۋشى، 95 پەداگوگ- شەبەر بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى