فۋتبول كورولى پەلە 1000-گولىن سوققان كۇن
وسىعان وراي برازيليانىڭ بايلانىس ءمينيسترى پوشتا ماركاسىن شىعارادى. بۇل جەكە فۋتبولشىنىڭ جەتىستىگىنە بايلانىستى شىعارىلعان تاريحتاعى العاشقى پوشتا ماركاسى بولدى. برازيليا حالقى ءالى كۇنگە دەيىن 19 قاراشانى «پەلە كۇنى» رەتىندە تويلايدى.
وسىدان جارتى عاسىر، ناقتىراق ايتساق، 53 جىل بۇرىن بولعان تاريحي وقيعا ءالى كۇنگە دەيىن ۇمىت بولعان جوق.
سىنشىلاردىڭ ايتۋىنشا، پەلە ويىنىنىڭ وسال تۇسى جوق ەدى. ەدسون ۇنەمى ءوزىنىڭ كۇشىنە سەنىپ، ءوزىن عانا كورسەتۋگە تىرىسپايتىن ناعىز ۇتىمدى ۇيىمداستىرۋشى قابىلەتىمەن تانىلعان، ستراتەگ ويىنشى. ول الاڭدى سەزىنىپ، ويىندى وقي الاتىن قاسيەتىمەن ەرەكشەلەندى. «اركىم ءوز ۇلەسىن قوسپاسا ويىن العا باسپايدى، - دەيدى پەلە. - فۋتبول - ءبىر-ەكى جۇلدىزدى ويىنشىلار ەمەس، بۇل - كوماندا، ۇجىم».
ونىڭ پاستارىنىڭ دالدىگىنەن ستاديون تولى جانكۇيەرلەردىڭ شۋلاعان دىبىسى ءبىر ءسات تىنا قالاتىن. ال، ءار دريبلينگىنىڭ قاراپايىمدىعى مەن كوركەمدىگى ەرىكسىز اۋىز اشتىراتىن. فۋتبول سۇيەر قاۋىم: «پەلەنىڭ اياقپەن دوپتى يگەرگەنى، قولىمەن قاسىق ۇستاعانىنان ەپتىلەۋ!» - دەپ قالجىڭدايتىن. ول ويىنعا جاڭا تىنىس، جاڭا لەپ الىپ كەلدى، ويتكەنى ونىڭ جاسايتىنى بۇرىن- سوڭدى فانتاستيكاداي، ادام سەنگىسىز كورىنەتىن.
پەلەنىڭ كوپتەگەن گولدارى فۋتبولدىڭ اڭىزىنا اينالدى، مىسالى، 1961 -جىلى «ماراكانا» ستاديونىندا «فلۋمينەنسكە» سوققان گولى. ول ءوز جاعىنىڭ ايىپ الاڭىنان قارسىلاستاردىڭ قاقپاسىنا دەيىن بارلىق ويىنشىلاردى الداپ ءوتىپ گول سوقتى - بۇل الەم تاريحىندا «عاسىر گولى» دەگەن اتاققا يە بولدى. سونىڭ قۇرمەتىنە «ماراكانا» ستاديونىندا ەسكەرتكىش بەلگى ورناتىلعان.
الاڭداعى ەركىندىك پەن ءار قيمىلدىڭ قاراپايىمدىلىعىنىڭ استىندا تىنىمسىز ەڭبەك پەن توگىلگەن تەر جاتتى. جاراتۋشى قابىلەت پەن دارىندى ءۇيىپ- توگىپ بەرسە دە، فۋتبول كورولى شىڭدالۋىن توقتاتقان ەمەس. تەمىردەي ءتارتىپ پەن جوسپارلى جاتتىعۋ ناتيجەسىندە جۇگىرۋ قابىلەتى ناعىز جەڭىل اتلەتتەي، سەكىرۋدەگى مىقتىلىعى سول باعىتتىڭ كاسىبي سپورتشىسىنداي دەڭگەيگە جەتكەن.
وزىنە ءتان دريبلينگ ادىسىندەگى ءداستۇرلى ەمەس ارەكەتتەرىمەن كىمدى بولماسىن تاڭداي قاقتىرعانىمەن قاتار، قورعانىس شەبەرلەرىنىڭ ءوزىن ساستىراتىن. پەلەنىڭ قاتىسۋىمەن بولعان ويىنداردان ۆيدەو ەستەلىكتەر از قالسا دا، ءوز كوزىمەن كورگەن كۋاگەرلەر ايتۋىنشا ول قاقپاشىدان باسقا بارلىق پوزيتسيادا شەبەر ويناي بىلگەن.
وسى تاجىريبەسىمەن پەلە 1958 -جىلى شۆەتسياداعى الەم چەمپيوناتىنا اتتاندى. ۋەلسپەن بولعان شيرەك فينالعا دەيىن گول سوعۋ بۇيىرماسا دا، جاھان نازارىن وزىنە اۋدارتا ءبىلدى. ساتتىلىكتىڭ جۇيرىگىن ەرتتەپ مىنگەن فۋتبول شاباندوزى فرانتسۋزدارمەن بولعان جارتىلاي فينالدا حەت- تريك سوعىپ، تۋرنير يەلەرىمەن بولعان فينالدا دۋبل جاسادى. بۇل پەلە برازيليانى العاش رەت چەمپيون اتاندىرعان ءسات بولاتىن!
ول 1962 جانە 1966 -جىلدارى وتكەن چەمپيوناتتارعا جاراقاتىنان الاڭعا شىعا المادى. 1970 -جىلى بولعان تۋرنيردە (پەلەنىڭ سپورتتىق مانسابىندا 4-شى) تريۋمف جاسادى - سول كەزدەگى برازيليا قۇراماسىنىڭ قۇرامى ەڭ مىقتىلاردىڭ بىرەگەيى رەتىندە ەستە قالدى. برازيليالىق فۋتبولشىلار جيۋل ريمەنىڭ جۇلدەسىنە ءۇشىنشى رەت قول جەتكىزىپ، ونى ءوز قورجىندارىنا ماڭگى ساقتاۋعا مۇمكىندىك الدى. پەلە مەكسيكاداعى قۇرامالىق جەڭىستەن كەيىن فۋتبول تاريحىندا ءۇش رەت الەم چەمپيونى اتاعىن العان جالعىز فۋتبولشى رەتىندە اتى قالدى. سونداي- اق وسى ويىندا الەم چەمپيوناتتارىنىڭ قورىتىندى تۋرنيرلەرىندەگى برازيليا قۇراماسىنىڭ 100-شى گولىن سوققان بولاتىن. ءوزى بۇل ويىنداردا 14 ماتچ وتكىزىپ 12 گول سالعان.
قۇراما ساپىندا كورسەتكەن 92 ماتچتا 77 گول سوققان بىرەگەي ناتيجەنى جاڭارتۋعا ءالى كۇنگە دەيىن ەشكىمنىڭ قاۋقارى كەلمەدى. پەلە «سانتوستان» كەيىن بىرنەشە جىل NASL چەمپيوناتىندا «كوسموس» قۇرامىندا ونەر كورسەتتى. 1977 -جىلى 1 قازاندا فۋتبول كورولى - پەلە سۇيىكتى كومانداسى «سانتوس» ءۇشىن سوڭعى قورىتىندى كەزدەسۋىندە ويناعان بولاتىن.
جالپى، پەلە سوققان 1289 گول ىشىنەن، 92 حەت-تريك، 30 پوكەر (1 ماتچتا 4 گول) بولسا، 6 ويىندا 5 گول، ءتىپتى، «بوتافوگو» كومانداسىنا قارسى ءبىر ويىندا 8 رەت دوپ سوققان.
پەلە ەۋروپادا ونەر كورسەتپەسە دە ونىڭ تانىمالدىعى جەر شارىنداعى ادامدار سانىنىڭ %93 قۇرايتىنىن شىن مانىسىندە تاڭ قالارلىق قۇبىلىس. مۇنداي داڭك پەلەگە دەيىن دە، ودان كەيىن دە بىردە ءبىر سپورتشىنىڭ باعىنا بۇيىرماعان.
ءبىر قىزىعى، قازاقتىڭ بەتكەۇستار ءانشىسى مەيرامبەك بەسبايەۆ «اينا» باعدارلاماسىنا بەرگەن سۇقباتىندا پەلەنى ءوز كوزىمەن كورگەنى تۋرالى ايتقان بولاتىن.
massaget.kz
