قازاقستاندا 1000 ادامعا 252 اۆتوكولىكتەن كەلەدى - ش. نۇرتىلەۋوۆ

بۇل جونىندە قازاقستان ماشينا جاساۋشىلارىنىڭ III فورۋمىندا «PricewaterhouseCoopers قازاقستان» كومپانياسىنىڭ اۆتوموبيل جانە لوگيستيكا سالالارىندا كونسۋلتاتسيالىق قىزمەتتەردى باعىتتاۋ جونىندەگى ديرەكتورى شالقار نۇرتىلەۋوۆ مالىمدەدى، دەپ حابارلايدى BNews.kz تىلشىسى.

«رەسەيلىك رۋبلدىڭ قۇلدىراۋىنا بايلانىستى 2014-جىلدىڭ سوڭىندا جانە قازاقستاننىڭ ە ا ە و- عا كىرۋىنەن شەكارالاردىڭ اشىلۋىنا بايلانىستى 2015-جىلدىڭ باسىندا قازاقستاننىڭ اۆتوموبيل نارىعى ءبىرقاتار قيىندىقتارعا تاپ بولدى. مۇنىڭ بارلىعى جاڭا دا، ەسكى دە اۆتوكولىكتەر ساتىلىمىنىڭ قازاقستاندىق نارىعىنا اسەر ەتپەي قويمادى. وسى جىلدىڭ بەس ايىندا 67 مىڭ جاڭا اۆتوكولىك تىركەلگەن. ارينە، بۇل وتكەن جىلعى كورسەتكىشتەن تومەن، الايدا قارقىن ساقتالۋدا. قازاقستان نارىقتا اۆتوموبيل ساتۋدان الەمنىڭ ۇزدىك ەلۋ ەلىنىڭ قاتارىندا تۇر. قازاقستانداعى اۆتوكولىكتەردىڭ ورتاشا جاسى 12 جىلدى قۇرايدى. ايتا كەتۋ كەرەك، قازىر ەلدە جاڭا اۆتوكولىك ساتىپ الۋ قارقىنى بايقالادى. ياعني، جىل سايىن ەسكى اۆتوكولىكتەر ۇلەسى قىسقارىپ كەلەدى. بۇعان تەحنيكالىق رەگلامەنت، مەملەكەت تاراپىنان جەڭىلدەتىلگەن كرەديتتەۋ سەكىلدى مەملەكەتتىك رەتتەمەلەۋ اسەر ەتتى»، - دەدى ش. نۇرتىلەۋوۆ.

ونىڭ ايتۋىنشا، ەلىمىزدە جان باسىنا شاققاندا جەڭىل اۆتوكولىكتەر سانى ارتىپ كەلەدى.

«ستاتيستكالىق مالىمەتتەرگە سۇيەنە وتىرىپ، قاۋىمداستىق جۇرگىزگەن تالداۋعا سايكەس، جان باسىنا شاققانداعى جەڭىل كولىك سانىنا توقتالىپ وتەيىن. قازاقستاندا جەڭىل اۆتوكولىكتەر پاركى 4,4 ميلليون دانانى قۇرايدى. اۆتوموبيلدەر ءوسىمىنىڭ قارقىنى حالىقتىڭ ءوسۋ قارقىنىنان الدا كەلە جاتىر. قازىر قازاقستاندا 1000 ادامعا 252 اۆتوكولىكتەن كەلەدى»، - دەپ تۇيىندەدى «PricewaterhouseCoopers  قازاقستان» وكىلى.

اقمارال شاعاتاي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى