بيىلعى 10 ايدا جالپى ىشكى ءونىم 2,9 پايىزعا تومەندەدى

بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.

«الەمدىك ەكونوميكا مەن ساۋدادا بەلگىسىزدىك ساقتالۋدا. حالىقارالىق قارجى ۇيىمدارىنىڭ 2020-جىلعا ارنالعان جاڭارتىلعان بولجامدارى بويىنشا الەمدىك ەكونوميكانىڭ ءوسۋ قارقىنىنىڭ تومەندەۋى مينۋس 4,4-تەن مينۋس 7,6 پايىز، الەمدىك ساۋدا - مينۋس 7 دەن مينۋس 10,6 پايىز ارالىعىندا باعالانادى. جاھاندىق ينۆەستيتسيالار وسى جىلعى ءبىرىنشى جارتىجىلدىقتا 2 ەسەگە تومەندەدى. جەكەلەگەن ەلدەردە قايتا شەكتەۋ شارالارى ەنگىزىلدى»، - دەدى ول.

وسى رەتتە مينيستر بيىلعى 10 ايدا قازاقتان ەكونوميكاسىندا قانداي وزگەرىستەر بايقالعانىنا توقتالدى.

«ءوندىرۋشى ەمەس سەكتورلارعا سالىنعان ينۆەستيتسيالار ۇلعايدى. ناقتى سەكتوردا ءوسۋ ساقتالۋدا. قىزمەتتەر سالاسى تۇراقتاندى جانە ەكونوميكانى كرەديتتەۋ ۇلعايۋدا. قازان ايىندا قىركۇيەكپەن سالىستىرعاندا قىزمەتتەر سالاسى وسۋدە. الايدا شەكتەۋلىك سالالارى ءالى دە تەرىس اسەر ەتۋدە»، - دەدى رۋسلان دالەنوۆ.

ونىڭ دەرەگىنشە، 10 ايدىڭ قورىتىندىلارى بويىنشا تاۋارلار ءوندىرىسى 1,9 پايىزعا ءوستى. بۇل رەتتە، قىزمەتتەر كولەمى 6,1 پايىزعا قىسقاردى.

«ناتيجەسىندە جەدەل دەرەكتەر بويىنشا، جالپى ىشكى ءونىم 2,9 پايىزعا تومەندەدى. جىلدىق ينفلياتسيا 7,1 پايىزدى قۇرادى»، - دەدى مينيستر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى