قازاقستاندا ەڭ كەمى 10-12 ميلليون ادام ۆاكسينا الۋى قاجەت - ساراپشى
بۇل پىكىردى مەديتسينا عىلىمدارىنىڭ دوكتورى، يممۋنولوگ، پروفەسسور، ق ر دەنساۋلىق ساقتاۋ مينيسترلىگى مەديتسينالىق جانە فارماتسيەۆتيكالىق باقىلاۋ كوميتەتى دارىلىك زاتتار مەن مەديتسينا بۇيىمدارىن ساراپتاۋ ورتالىعىنىڭ ساراپشىسى پاۆەل دەريابين ايتتى، دەپ حابارلايدى قازاقپارات ءتىلشىسى.
«ءبىز ءالى ۆاكسينالاۋدىڭ باس جاعىندا تۇرمىز. ۆاكسيناتسيانى جەدەلدەتۋ قاجەت، ويتكەنى قازاقستان ءۇشىن ەكپە العان ءبىر ميلليون ادامنىڭ سانى وتە از. ەگەر يزرايلدىڭ تاجىريبەسىن الساق، وندا قازىر حالىقتىڭ %65 دان استامى ەگىلدى. وسىنداي جاپپاي ۆاكسيناتسيانى جۇرگىزۋ ارقىلى ولار شەكتەۋلەردى الىپ جاتىر. ول جاقتا ءىس جۇزىندە Covid-تەن ادام قايتىس بولىپ جاتقان جوق. سوندىقتان دا ءبىز وسىنداي كورسەتكىشتەرگە ۇمتىلۋىمىز كەرەك. قازاقستاندا 18 ميلليون حالىقتىڭ بارىن ەسكەرسەك، ەڭ كەمى 10-12 ميلليون ادام ينفەكسيانىڭ تارالۋىنا جول بەرمەيتىن وسى يممۋندىق قاباتتى الۋ ءۇشىن ەكپە سالدىرۋى ءتيىس. ۇجىمدىق يممۋنيتەت قالاي قاداعالانادى؟ ول تەك ءبىر ناقتى ينديكاتورمەن - ۆاكسينا العانداردىڭ سانىمەن عانا باسقارىلادى. بارلىق باسقا كورسەتكىشتەر ۇجىمدىق يممۋنيتەتتىڭ ءمانىن كورسەتپەيدى»، - دەدى دارىگەر ونلاين دارىستە.
ونىڭ پىكىرىنشە، جاپپاي ۆاكسينالاۋدى اسىرەسە ۇلكەن قالالاردا مۇمكىندىگىنشە تەز جۇرگىزۋ كەرەك. سونىمەن بىرگە، زەرتتەۋشى ۆاكسينادان بۇرىن جانە ۆاكسينادان كەيىن كوروناۆيرۋسقا انتيدەنەلەردىڭ بار-جوعىن زەرتتەۋ قاجەت ەمەستىگىن ايتتى، ويتكەنى يممۋنيتەت تەك انتيدەنەلەرمەن عانا قالىپتاسپايدى.
ۆاكسينالاۋدان كەيىن «جادى جاسۋشالارى» پايدا بولادى، ولار بەلگىلى ءبىر انتيدەنەلەر انىقتالماسا دا، دەنەنىڭ ۆيرۋستان قورعالۋىنا ىقپال ەتەدى. سونىمەن قاتار، كوروناۆيرۋسقا قارسى انتيدەنەلەردىڭ بارلىعىندا بىردەي قورعانىس قاسيەتتەرى بولمايدى. قورعاۋدى ۆيرۋستىڭ جاسۋشالارعا ەنۋىن تەجەيتىن انتيدەنەلەر عانا قامتاماسىز ەتەدى، بۇل «S اقۋىزى» دەپ اتالاتىن انتيدەنەلەر، سونىڭ ارقاسىندا ۆيرۋس جاسۋشا رەتسەپتورلارىنا قوسىلادى. بۇل انتيگەن ءبىرقاتار ۆاكسينالار جاساۋدا قولدانىلادى جانە ناقتى ۆاكسينالاۋدان كەيىن پايدا بولاتىن انتيدەنەلەر دەنەنى ينفەكسيادان قورعايدى»، - دەيدى پ. دەريابين.
