قازاقستاننىڭ 10 جوعارى وقۋ ورنىنا قوسىمشا 10 ميلليارد تەڭگە بولىنەدى

بۇگىن ءبىلىم جانە عىلىم مينيسترلىگىندە وتكەن القا ماجىلىسىندە ۆەدومستۆو باسشىسى اسلان ءسارىنجىپوۆ وسىلاي مالىمدەدى.

ءمينيستردىڭ ايتۋىنشا، بۇگىنگى تاڭدا ەلىمىزدىڭ جوعارى ءبىلىم بەرۋ جۇيەسىندە 127 جوعارى وقۋ ورنى قىزمەت ەتسە، وندا 500 مىڭنان استام ادام وقىپ جاتىر. بۇل رەتتە كادرلار دايارلاۋ بويىنشا مەملەكەتتىك تاپسىرىس اعىمداعى جىلى باكالاۆرلار ءۇشىن 34 مىڭ گرانتتى جانە ماگيسترانتتار ءۇشىن 7 مىڭ گرانتتى قۇرادى.

«ال PhD دوكتورلارىن دايارلاۋعا 656 گرانت ءبولىندى، ولاردىڭ ىشىندە ەلىمىزدىڭ عىلىمي- زەرتتەۋ ينستيتۋتتارى ءۇشىن ينتەگراتسيالانعان باعدارلاما بويىنشا بولىنگەن قوسىمشا گرانتتار دا بار. جالپى، «نۇرلى جول - بولاشاققا باستار جول» اتتى مەملەكەت باسشىسىنىڭ جولداۋىندا جۇكتەلگەن تاپسىرمانى ورىنداۋ اياسىندا 2015-2017 -جىلدارى ەلىمىزدىڭ 10 جوعارى وقۋ ورنىنا بۇعان دەيىن بيۋدجەتتە بەكىتىلگەن قاراجاتقا قوسىمشا 10 ميلليارد تەڭگە بولىنەدى» ، - دەدى ا. ءسارىنجىپوۆ.

ونىڭ سوزىنە قاراعاندا، قوسىمشا قاراجاتتى نەگىزىنەن جوعارى وقۋ ورىندارىنىڭ ينفراقۇرىلىمىن دامىتۋعا، ولاردى ماتەريالدىق- تەحنيكالىق جابدىقتارمەن قامتاماسىز ەتۋگە جۇمساۋ كوزدەلىپ وتىر.

 اۆتور: قانات مامەتقازى ۇلى 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى