سوڭعى 10 جىل ىشىندە ۇ ق ك تەررورلىق سيپاتتاعى 100 شاقتى اكسيانىڭ الدىن الدى - كارىم ءماسىموۆ
«ەگەمەن قازاقستان» گازەتىندەگى ماقالاسىندا قازاقستان رەسپۋبليكاسى ۇ ق ك ءتوراعاسى كارىم ءماسىموۆ وسىلاي جازدى، دەپ حابارلايدى قازاقپارات.
«15 جىل بۇرىن مەملەكەت باسشىسى ۇ ق ك- گە كەلىپ، وندا ارنايى قىزمەت جۇمىسى قالاي قۇرىلۋى كەرەكتىگى تۋرالى ءوزىنىڭ كوزقاراسى مەن باسىمدىقتارىن بەلگىلەپ بەردى»، دەپ جازادى ق ر ۇلتتىق قاۋىپسىزدىك كوميتەتىنىڭ ءتوراعاسى.
ءتوراعانىڭ ايتۋىنشا، مەملەكەت باسشىسىنىڭ ستراتەگياسىنا ساي ۇ ق ك، وزگە دە مەملەكەتتىك ورگاندارمەن بىرگە، ىشكى ساياسي تۇراقتىلىقتى، ۇلتارالىق جانە كونفەسسياارالىق كەلىسىمدى ساقتاۋدى قامتاماسىز ەتىپ وتىر.
«بۇگىندە قازاقستان مەن ۇ ق ك ورگاندارى العاش رەت حالىقارالىق تەرروريزم جانە ءدىني ەكسترەميزم سەكىلدى قۇبىلىستارمەن بەتپە- بەت كەلدى. ءبىز اتالعان توپتارمەن كۇرەستە جولداستارىمىزدىڭ ومىرلەرىن قۇربان ەتىپ، اسا اۋىر ساباق الدىق. سول جولى پرەزيدەنت ناقتى تاپسىرما - قازاقستاندىقتاردى وسى قاۋىپ- قاتەرلەردەن قورعاۋ تۋرالى مىندەت قويدى. قىسقا مەرزىم ىشىندە ۇ ق ك ورگاندارى دۇرىس قورىتىندىلار جاساپ، جاعدايدى باقىلاۋلارىنا الدى. ەلىمىزدە تەررورلىق ينفراقۇرىلىمدار قۇرۋ ارەكەتى جۇزەگە اسىرىلماي تاستالسا، ءبىرقاتار لاڭكەستىكتەرگە دايىندىقتىڭ جولى كەسىلدى. سوڭعى 10 جىل ىشىندە عانا ۇ ق ك- نىڭ تەرروريزمگە قارسى قىزمەتى تەررورلىق سيپاتتاعى 100 شاقتى زورلىق- زومبىلىق اكسياسىنىڭ الدىن الدى.
حالىقارالىق تەررورلىق ۇيىمداردىڭ قازاقستانعا قاراي ۇمتىلىستارى جوققا شىعارىلدى. كۇردەلىلىگى جاعىنان بىرەگەي وپەراتسيالار جۇزەگە اسىرىلىپ، «ورتالىق ازيا مودجاحەتتەرىنىڭ جامااتى»، «دجۋند- ءال- حاليفات»، «حيزب- ۋت- تاحرير» جانە باسقا دا قۇرىلىمدار جويىپ جىبەرىلدى. ارىپتەس ارنايى قىزمەتتەرمەن بىرگە ونداعان تەررورشىلار مەن ەكسترەميستەر ىزدەپ تابىلىپ، ەكستراديتسيالاندى»، - دەپ جازدى كارىم ءماسىموۆ.
وسى وپەراتسيالارعا 160 تان استام انتيتەررورلىق جانە جەدەل- اسكەري شارالار وتكىزگەن ارنايى ماقساتتاعى «ا» قىزمەتىنىڭ قىزمەتكەرلەرى ۇلكەن ۇلەس قوسقان. «ولاردىڭ كوپشىلىگى باتىلدىق پەن باتىرلىقتىڭ ەرەن ۇلگىسىن كورسەتكەندەرى ءۇشىن مەملەكەتتىك ناگرادالارعا يە بولسا، وكىنىشكە قاراي، كەيبىرەۋلەرى وپات بولدى.
قازىر ارنايى ماقساتتاعى «ا» قىزمەتى ەڭ زاماناۋي قارۋ- جاراق، ەكيپيروۆكا جانە تەحنيكا ۇلگىلەرىمەن جاراقتانعان جوعارى كاسىبي بولىمشە بولىپ تابىلادى. ونىڭ جاۋىنگەرلەرى - ارنايى قىزمەتتىڭ سۇزگىسىنەن وتكەن بەتكە ۇستارلارى دەۋىمىز كەرەك. ولار كۇن دەمەي، ءتۇن دەمەي اسا كۇردەلى اسكەري مىندەتتەردى شەشۋگە قابىلەتتى. مۇنى 2016 -جىلدىڭ جەلتوقسان ايىندا اتالعان قىزمەتتە بولعان كەزىندە مەملەكەت باسشىسىنىڭ ءوزى ەرەكشە اتاپ كورسەتتى.
سول جولى ەلباسى «ا» قىزمەتىنىڭ جەكە قۇرامىمەن اڭگىمە- دۇكەن قۇرىپ، بولىمشەنىڭ ماتەريالدىق- تەحنيكالىق بازاسىمەن تانىسقان بولاتىن»، - دەلىنگەن ماقالادا.
پرەزيدەنتتىڭ وكىمىمەن 20 جىل بۇرىن تەرروريزم قاتەرىنىڭ وسە ءتۇسىپ وتىرعانى ەسكەرىلە كەلىپ، قازاقستان رەسپۋبليكاسىنىڭ ۆەدومستۆوارالىق انتيتەررورلىق ورتالىعى (ا ت و) قۇرىلدى.
