تايۋاندا ءماجبۇرلى شارا قابىلدانىپ، 1 ميلليون 700 مىڭ قۇس جويىلدى

ءتىپتى ءالى كۇنگە دەيىن قۇس اسىراۋمەن اينالىساتىن شارۋالاردىڭ شىعىنى ەسەپتەلمەگەن. تايۋاندا 1 ايدىڭ ىشىندە 1 ميلليون 700 مىڭنان استام قۇس جويىلدى.

مۇنداي ءماجبۇرلى شارا ارالدا تارالعان قۇس تۇماۋىنا بايلانىستى شۇعىل قولعا الىندى.

تايۋاندىق اۋىل شارۋاشىلىعى كەڭەسىنىڭ باسشىسى «وسى جولعى قۇس تۇماۋىنىڭ تارالۋ وقيعاسى سوڭعى ونجىلدىقتاعى ەڭ قاتەرلىسى» دەپ مالىمدەدى.

جەرگىلىكتى شەنەۋنىكتەر جاعدايدى باقىلاۋعا الدىق دەپ حابارلايدى.

ۆان جەنتەن، جانۋارلار مەن وسىمدىكتەردى تەكسەرۋ بيۋروسى ديرەكتورىنىڭ ورىنباسارى:

- قۇستاردى فەرمالاردان بارلىق اۋىلدار مەن قالالارعا تاسىمالداۋدا، كولىكتەر مەن ادامداردا ساۋ ەكەندىگى جانە دەزينفەكسيا تۋرالى كۋالىكتەرى بولۋى ءتيىس. مۇنداي مىندەتتى شارا ۆيرۋستىڭ تارالۋ مۇمكىندىگىن شەكتەيدى.

ۆان قاتاڭ شارالار قابىلداۋ قاجەتتىگىن قاتاڭ ەسكەرتتى. سونداي-اق ول كوپ جاعدايدا سۋدا تىرشىلىك ەتەتىن قۇستار ۆيرۋسقا شالدىققانىنا باسا نازار اۋداردى. بۇدان باسقا، قاتەرلى ۆيرۋس باسقا جاققا ۇشىپ كەتەتىن قۇستار ارقىلى كەڭ تارالعانى دا بەلگىلى بولىپ وتىر.

ۆان جەنتەن، جانۋارلار مەن وسىمدىكتەردى تەكسەرۋ بيۋروسى ديرەكتورىنىڭ ورىنباسارى:

- قۇس تۇماۋىنىڭ تارالۋ جولدارى ءارتۇرلى. ۆيرۋستار قۇستاردىڭ باسقا جاققا قونىس اۋدارۋى ارقىلى جايىلۋى ءورشىپ بارادى. ۆيرۋس شتاممدارى كوبەيىپ جاتىر. سوندىقتان ەگەر قۇس شارۋاشىلىعى ءارى قاراي جۇمىس ىستەسىن دەسەك، وندا بيوقاۋىپسىزدىكى قامتاماسىز ەتۋىمىز كەرەك.

جاقىندا جەرگىلىكتى ۇيرەك، تاۋىق جانە قازداردان قۇس تۇماۋى شتاممدارىنىڭ H5N8, H5N3 جانە H5N2 دەگەن جاڭا تۇرلەرى تابىلعان. ال قولداعى قۇستارىن جويۋعا ءماجبۇر بولعان 500 دەن استام قۇس فەرماسىنداعى قارجىلاي شىعىندى بيلىك قازىرگى كۇنى ەسەپتەپ جاتىر.

www.khabar.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى