قازاقستاندا پورنوگرافيالىق ماتەريال تاراتقان 1,5 مىڭعا جۋىق ينتەرنەت-رەسۋرس بۇعاتتالعان
بۇل تۋرالى ونلاين بريفينگىدە ق ر ءى ءى م اكىمشىلىك پوليتسيا كوميتەتى يۋۆەنالدى پوليتسيا جانە ايەلدەردى زورلىق- زومبىلىقتان قورعاۋ ءبولىمى باستىعىنىڭ ورىنباسارى ديلبار تولەگەنوۆا ايتتى، دەپ حابارلايدى قازاقپارات ءتىلشىسى.
«كامەلەتتىك جاسقا تولماعانداردىڭ جىنىستىق قول سۇعىلماۋشىلىعىنا قارسى قىلمىستاردىڭ الدىن الۋ ءۇشىن بەلگىلى شارالار قولدانىلۋدا. بۇگىنگى كۇنى تۇزەتۋ مەكەمەلەرىندە كامەلەتكە تولماعانداردىڭ جىنىستىق قول سۇعىلماۋشىلىعىنا قارسى قىلمىستار ءۇشىن 1800 دەن استام (1843) سوتتالۋشى بار. سوتتالۋشىلاردىڭ تاربيە جۇمىسىمەن پسيحولوگتار اينالىسادى، ولار ءار سوتتالعاننىڭ جەكە باسىنىڭ پسيحولوگيالىق ەرەكشەلىكتەرىن انىقتايدى»، - دەيدى ديلبار تولەگەنوۆا.
باس بوستاندىعىنان ايىرۋ ورىندارىندا جازاسىن وتەگەن بارلىق ادامدارعا سوت ارقىلى جىل سايىن ۇزارتۋ مۇمكىندىگىمەن 6 ايدان 3 جىلعا دەيىنگى مەرزىمگە اكىمشىلىك قاداعالاۋ ورناتادى. ىشكى ىستەر ورگاندارىنىڭ رۇقساتىنسىز تۇراقتى تۇرعىلىقتى جەرىنەن كەتكەن جاعدايدا قىلمىستىق جاۋاپكەرشىلىك قاراستىرىلعان. سونداي-اق، بۇل ادامدار تۋرالى اقپارات باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ينتەرنەت- رەسۋرسىندا ورنالاستىرىلعان قىلمىستىق قۇقىق بۇزۋشىلىقتار كارتاسىندا كورسەتىلگەن جانە «كامەلەتكە تولماعاندارعا قاتىستى جىنىستىق زورلىق-زومبىلىق جاساعان ادامدار» رەتىندە كورسەتىلەدى (بۇل تۋرالى اقپاراتتى «Сamсor.gov.kz « اقپاراتتىق جۇيەسى ارقىلى الۋعا بولادى).
سونىمەن قاتار، پوليتسيا دەپارتامەنتتەرىندە قۇرىلعان مامانداندىرىلعان توپتار ينتەرنەتتى قولدانۋ ارقىلى قىلمىس جاسايتىن پەدوفيلدەردى انىقتاۋ بويىنشا شارالار جۇرگىزۋدە.
«اۋماقتىق ىشكى ىستەر ورگاندارىندا الەۋمەتتىك جەلىلەردە، مەسسەندجەرلەر مەن پوشتا سەرۆيستەرىندە 200 دەن استام جالعان اككاۋنت قۇرىلدى. قۇرىلعان توپتاردىڭ مىندەتتەرى - بالالارعا قارسى قىلمىس جاساۋ ءۇشىن العىشارتتار جاساي الاتىن الەۋمەتتىك جەلىلەردى، پاراقتاردى، قاۋىمداستىقتاردى، توپتاردى، تانىسۋ سايتتارىن انىقتاۋ جانە باقىلاۋ. جىل باسىنان بەرى پورنوگرافيالىق ماتەريالداردى تاراتقان 2 مىڭنان استام ينتەرنەت- رەسۋرس انىقتالدى. اقپارات جانە قوعامدىق دامۋ مينيسترلىگى ونىڭ 1,5 مىڭعا جۋىعىن بۇعاتتاپ تاستادى»، - دەيدى ديلبار تولەگەنوۆا.
