سوڭعى ءتورت جىلدا سولتۇستىك قازاقستانعا 1,5 مىڭعا جۋىق وتباسى كوشىپ كەلگەن

وبلىس اكىمىنىڭ ورىنباسارى اسقار ساقىپكەرەيەۆ بريفينگتە اتاپ وتكەندەي، قونىس جاڭارتقانداردىڭ تەڭ جارىمى - ەڭبەككە قابىلەتتى جاندار. ونىڭ 73 پايىزى تۇراقتى جۇمىسقا ورنالاستىرىلعان.

ۇكىمەت باسشىسىنىڭ ورىنباسارى بەردىبەك ساپاربايەۆتىڭ وڭىرگە ساپارى كەزىندە وبلىس باسشىلىعى كوشى- قون باعدارلاماسىن ىسكە اسىرۋداعى پروبلەمالاردى ايتقان. ونىڭ ءبىرى - كوشىپ كەلۋشىلەردىڭ بىلىكتىلىگى. بۇل ماسەلە تەك سولتۇستىك قازاقستان عانا ەمەس، باسقا دا قابىلداۋشى ايماقتاردا بار. سول كەزدە ا. ساقىپكەرەيەۆ ءوز ازاماتتارىن باسقا وڭىرگە اتتاندىراتىن ايماقتارعا ولاردى قابىلداۋشى جاقتىڭ سۇرانىسىنا سايكەس ىرىكتەۋ جانە بىلىكتى مامان ەتىپ وقىتۋ جاۋاپكەرشىلىگىن جۇكتەۋدى ۇسىندى.

«قونىس اۋدارۋشىلاردىڭ وتباسىن جۇمىسقا تۇرعىزۋعا، باسپانامەن قامتۋعا، مەكتەپكە جانە بالاقشاعا ورنالاستىرۋعا كومەك كورسەتىلىپ وتىر. كاسىپكەرلىكپەن، باقشا وسىرۋمەن اينالىسقىسى كەلەتىندەرگە ءتيىستى جاعداي جاسالۋدا. اتاپ ايتقاندا جەر تەلىمى بەرىلىپ، قايتارىمسىز گرانت الۋىنا قولداۋ كورسەتىلەدى»، - دەيدى وبلىس اكىمىنىڭ ورىنباسارى.

ولاردى باسپانامەن قامتۋ ءۇشىن وڭىردە قاناتتى جوبا ىسكە اسىرىلىپ جاتىر. وتكەن جىلى بەس تيپتىك جوبا اياسىندا 428 ءۇي تۇرعىزىلدى. ءار ءۇيدىڭ اۋماعى - 90 شارشى مەترگە دەيىن. الداعى ءۇش جىلدا تاعى وسىنداي 2100 ءۇي سالىنادى دەگەن جوسپار بار.

«جالپى العاندا بۇل باعدارلاما ميگراتسيالىق پروتسەستەردى تۇراقتاندىرىپ، جالپى ءبىلىم بەرەتىن مەكتەپتەر جەلىسىن ساقتاۋعا، اۋىلداعى ۆاكانسيالاردى تولتىرۋعا مۇمكىندىك بەرەدى. اسىرەسە ۇستازدار مەن دارىگەرلەر، اۋىل شارۋاشىلىعىندا - اگرونومدار، مەحانيزاتورلار مەن ۆەتەرينارلار تاپشىلىعىنان قۇتىلامىز» ، - دەپ اتاپ ءوتتى ا. ساقىپكەرەيەۆ.

جالپى، باعدارلاما باستالعان 2016 -جىلدان بەرى سولتۇستىك قازاقستان وبلىسىنا 5 مىڭعا جۋىق ادام نەمەسە 1428 وتباسى كوشىپ كەلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى